I. RITO HA PAGTIKANG

 

AWIT HA PAGTIKANG

Kon tirok na an mga tawo, an ministro upod an magbarasa nga nakadara han Basahan han Santos nga Kasuratan (Biblia), napasingadto ha altar. Naluhod hiya ha atubangan han Santisimo (kon ginhipos ine didto ha kapelya), ngan nayukbo ha atubangan han altar, samtang an mga tawo magkakanta. Ibubutang han magbarasa an Basahan han bawbaw han altar ngan an ministro, sugad man an magbarasa, napakadto ha ira lingkuranan.

​

An ministro upod an mga tawo nangungudos upod an pagsering:

Ha ngaran han Amay ug han Anak +

ug han Espiritu Santo. Amen.

 

Mga kabugtuan ko,

gin-aabiabi ta kamo ha ngaran

han aton Ginoo Jesucristo.

Aanhi hiya upod ha aton kay nagsering hiya ngahaw,

“kon magkatirok in duha

o tulo ha akon ngaran,

aada ako kaupod ha ira.”

 

Kon ini

Akon kabugtuan,

gintirok kita ni Cristo dinhe nga iya bungto

hin pagsingba han langitnon nga Amay.

Ha ngaran han aton Cura Parroco, hi N.,

gin-aabiabi ta kamo nganhi hini nga Pagsaurog.

​

Kon ini

Akon kabugtuan,

nag-aabiabi ha aton an Ginoo

hin pamati han iya Pulong

ngan hin pakaangbit

dida hine nga sakramento han iya gugma.

Dayawon ta hiya

tungod han iya mapuanguron nga  gugma.

 

 

RITO HAN PAGBASOL

 

Ministro:

Dida ha pagbunyag, namatay kita han sala

ngan nahimo kita nga bag-o nga gintuha han Dios;

kundi kon makasala kita hi Cristo dire nahunong

hin panginyupo sa Dios tungod ha aton.

Pangaro kita sa Dios

nga pasayloon an aton mga sala

basi mahingpit an kalipay han aton pagsaurog

ha adlaw han Domingo.

 

Nagtutug-an ako ha makagarahum nga Dios

ug ha iyo, akon kabugtoan,

kay nakasala ako han hunahuna,

pulong, buhat ug pagpasibaya:

(mapukpok ha dughan)

tungod han akon sala, akon sala,

han akon dako nga sala.

Sanglit nangangamaya ako

kan Santa Maria Virgen,

han mga anghel ug mga santos,

ug ha iyo, akon kabugtoan,

nga ig-ampo ako niyo ha aton Ginoo nga Dios.

 

Kahuman han Rito han pagbasol, an tigaman han kalinaw ihahatag ngadto han mga tawo sugad han nababatasan.

 

Ministro:

Ipakita ta yana nga an kamurayaw

naghahadi dinhi ha aton.

 

 

II. LITURHIYA HAN PULONG

 

PAGPASIDUNGOG HAN SANTOS NGA KASURATAN

 

Natukdaw an mga tawo. An ministro napakadto ha altar, naharok han Santos nga Kasuratan ngan nasering:

Akon kabugtoan,

pagpasidunggi ta an Santos nga Kasuratan

basi an pagturon-an

nga nahatag hin kapawa ha aton

mahipatik dinhe ha aton hunahuna ug kasingkasing.

 

Binabayaw han ministro an Basahan han Santos nga Kasuratan ngan an mga tawo hin hilom nagpapasidungog han Basahan o kon di’ man may-ada kanta.

 

 

SYAHAN NGA PAGBASA

 

Kahuman, ihahatag an Basahan ngadto han Magbarasa,. Binabasa an Pulong pinangungunahan hine nga mga pulong:

Pagbasa kinuha dida…

Kahuman pagbasa:

An Pulong han Ginoo.

Katirok:

Salamat sa Diyos.

​

SALMO RESPONSORIO

​

IKADUHA NGA PAGBASA

​

Magbarasa:

Pagbasa kinuha dida…

Kahuman pagbasa:

An Pulong han Ginoo.

Katirok:

Salamat sa Diyos.

​

​

ALLELUIA

An ngatanan natukdaw hin pagkanta han alleluia o kon panahon han Adviento o kwaresma, usa nga aklamasyon kinuha dida han ebanghelyo.

 

 

EBANGHELYO

 

An ministro ngahaw an nabasa han ebanghelyo. Nasering hiya:

Pagbasa kinuha dida han ebanghelyo nga sinurat ni N.

Katirok:

Paghimayaon ka, Ginoo.

 

Kahuman pagbasa han ebanghelyo:

An maupay nga sumat han aton Ginoo.

Katirok:

Pagdayawon ka, Cristo.

 

 

WALI

Kahuman han ebanghelyo, babasahon han ministro an gin-andam nga Wali han Cura parroco o kon di’ man, igpapaangbit han ministro an iya ginpamalandong bahin han ginbasa.

 

 

PAGTUG-AN HAN PAGTOO

 

Natoo ako han Dios,

Amay nga makagarahum han ngatanan,

magburuhat han langit ug han tuna,

ug kan Jesuscristo, Iya bugtong

nga Anak ug aton Ginoo;

Nga iginpanamkon ha larang ha Espiritu Santo,

igin-anak ni Santa Maria Virgen

iginsakit ha sugo ni Poncio Pilato,

iginraysang ha krus, namatay ngan iginlubong,

linmusad ha mga infierno.

Ha ikatulo ka adlaw

nabuhi liwat dida ha mga minatay.

Sinaka ha langit, nalingkod ha tuo han Dios Amay

nga makagarahum han ngatanan.

Tikang didto makanhi liwat

kay maghuhukom han mga buhi ug mga patay.

Natoo ako han Dios Espiritu Santo,

han Santa Iglecia Catolica,

han pagkaanbitan han mga santos,

han pagwara han mga sala,

han pagkabuhi han mga lawas

ug han kinabuhi nga dayon.

Amen.

 

 

PAG-AMPO HAN BUNGTO

Kahuman han wali, isusunod an pag-ampo han Bungto. Ini nga nga pag-ampo nag-uupod han mga panuyo han bug-os nha Singbahan, han mga pamuno-an, hadton mga nagkikinahanglan ngan han kasurok’an han katilingban.

 

​

III. AN SANTOS NGA PAGKARAWAT

 

 

PAGSINGBA HAN SANTISIMO SAKRAMENTO

 

Naluhod an mga tawo. Kukuhaon han ministro an Santisimo Sakramento dido han dapit nga ginhipusan, ibubutang ha altar nga nasering:

Mga kabugto-an ko,

pagsingba kita han aton Ginoo Jesucristo

nga aanhi kausa naton dida han Santisimo Sakramento

nga itinubyan ha aton nga usa nga sakramento han gugma,

tigaman ha aton pagkaurosa ug gapos han paghigugma.

 

Inaalsa han ministro an santisima samtang nagsisingba hin hilom an mga tawo omay-ada kanta.

 

 

PAG-AMPO HIN PAGDAYAW UG PAGPASALAMAT

​

Kahuman pagsingba han Santisimo, natukdaw an mga tawo ngan an ministro mag–aampo hini nga masunod:

Dios nga amon Amay,

amo ini an adlaw nga an imo Anak

ug amon Ginoo Jesucristo,

nabanhaw ha mga minatay

ngan nagdara hin kalipay nganhi ha kalibutan.

Amo ini nga adlaw nga nagpakita hiya

hin mga pulong hin paglaom ug paglipay

ngan ihinatag ha ira an iya kalinaw.

Amo ini nga adlaw nga nakigsaro hiya ha iya mga tinun–an

ngan nagpakilala hiya dida han pagpinitpinit han tinapay.

Sanglit nasering kami: himaya ug pagdayaw ha imo, O Diyos.

Katirok:

Himaya ug pagdayaw ha imo, O Diyos.

 

Ministro:

Amay namon,

pagkadako han imo gugma ha amon!

Kon an amon pagkatirok harayo

han katig–uban han amon parokya,

diri ka nabaya ha amon,

diri nimo sinasalikway an imo gugma ha amon!

Nagdadayaw ug nagpapasalamat kami ha imo

tungod han mga hatag mo ha amon

yana nga adlaw,

tungod han pulong han kalinaw

ngan tungod han tinapay han kinabuhi.

Sanglit nasiring kami; Himaya ug pagdayaw ha imo, O Diyos.

Katirok:

Himaya ug pagdayaw ha imo, O Diyos.

 

Ministro:

Tungod han mapuanguron nga gahom

han Espiritu Santo,

magdilaab unta an amon mga kasingkasing.

Mahinumdum unta kami

han gintutdo han imo Anak

dida han Santos nga Kasuratan

ngan kumilala unta kami ha iya

dida han Santisimo Sakramento ha altar.

Sanglit nasiring kami: Himaya ug pagdayaw ha imo, O Diyos.

Katirok:

Himaya ug pagdayaw ha imo, O Diyos.

 

Ministro:

Upod an amon Obispo, hi N.,

an amon Cura Parroco, hi N.,

ngan an Singbahan nga nakakalukop han bug–os nga kalibutan,

gindadayaw ug ginpapasalamatan ka namon, Diyos nga amon Amay,

pinaagi han imo Anak, an amon Ginoo Jesucristo,

nga buhi ug nagahadi upod ha imo ug han Espiritu Santo,

uusa nga Dios, ha dayon nga mga katuigan.

Katirok:

Amen.

 

 

AMAY NAMON

 

Kahuman han Pag–ampo han Pagdayaw ug Pagpasalamat, pangungunahan han ministro an pangadi han Amay Namon:

Pag–ampo kita upod an pagtapod

ngadto han Amay

dida hini nga pulong

nga ihinatag han Manunubos ha aton.

 

Amay namon, nga aada ka mga langit;

Pagdayawon an imo ngaran;

Ikanhi mo ha amon an imo ginhadian,

Ipasunod an imo pagbuot dinhi ha tuna,

sugad han pagsunda didto ha langit.

Tagan mo kami niyan

han karan-on namon ha ikaina-adlaw;

Pagwad-on mo an amon mga sala

sugad han pagwara namon han nakasala ha amon;

ngan diri mo kami bayaan,

basi diri kami pagdag-on han mga panulay,

kundi bawia kami ha karat-an.

 

_________________________

Ihatag dinhi an tigaman han kalinaw, kon waray pa buhata ini didto han rito han pagtikang.

 

Ministro:

Ipakita ta yana nga an kamurayaw

nga naghahadi dinhi ha aton.

_________________________

 

 

PAGKARAWAT HAN MGA TAWO

​

Nagkakaluhod an mga tawo, naluhod an ministro; kakaptan niya an ostiya ngan aalsahon ha bawbaw han ciborio ngan nasering hin dako nga tingog:

Iini an Kordero han Diyos

nga nagkukuha han mga sala han kalibutan.

Baraan adton gintatawag ngada han iya sasaro.

Katirok:

Ginoo, diri ako takos hin pagkarawat ha imo;

kundi pagluwas la hin Pulong,

ngan mag–uupay ako.

 

Dida ha pagkarawat han mga tawo, maupay kon may-ada kanta.

 

 

PAG-AMPO HUMAN PANGARAWAT

 

Natukdaw an mga tawo, nag–aampo an ministro:

Diyos nga amon Amay,

ginpakaon nimo kami han tinapay han kinabuhi.

Igbuot nga tumubo kami  sugad hin usa nga katilingban

nga nagkakaurosa dida hin paghigugma

ug panginlabot han amon igkasitawo.

Pinangangaro namon ini pinaagi kan Jesucristo nga amon Ginoo.

Katirok:

Amen.

 

 

PAGHALAD

Kahuman hini nga pag–ampo, an ministro nagaabiabi han mga tawo hin paghalad han ira mga hatag para han mga kablas ug kasurok’an han katilingban.

 

Pagkahuman han paghalad, mahihimo nga kantahan an imno han baranggay kon di’ man an imno han parokya.

​

​

IV. RITO HAN PAGTAPOS

 

Ministro:

Mga kabugtoan ko kan Cristo,

yana nga nagsaurog kita han kamtayon

ug kabanhaw han aton Ginoo, Jesucristo,

pagkalakat kita ngan ipasangyaw ta an Pulong nga aton hinbatian

ngan magkinabuhi kita

dida han espiritu han sakramento nga aton kinarawat.

 

Bendisyonan kita han makagarahum nga Dios,

Amay ug an Anak ug Espiritu Santo.

Katirok:

Amen.

 

Ministro:

Kalakat kita nga malinawon han paghigugma ug pag-alagad han Ginoo.

Katirok:

Salamat sa Dios.

​

​