Kinaadlaw nga Pagbasa

PAGBASA I

Jer 18:18-20

Pagbasa tikang han basahan ni Jeremias nga manaragna.

Niyan nagsiring an mga tawo, “Pagsarabot kita kon ano an aton pagbubuhaton kan Jeremias! Dayuday may-ada kapadian nga magtututdo ha aton, mga makinaadmananon nga magsasagdon ha aton, ngan mga manaragna nga magsasangyaw han mensahe han Dyos. Igsumbong ta hiya ngan ayaw kita pamati han iya igyayakan.”

Sanglit nag-ampo ako, “O Ginoo, pamatii an akon igyayakan ha imo, ngan pamatii an iginsisiring hiunong ha akon han akon mga kaaway. Angay ba baloson hin maraot an maupay? Kundi nagluong hira para han akon kinabuhi. Hinumdomi kon an akon pagkada ha imo ngan paghimangraw tungod ha ira, basi diri mo hira kasinahan.”

An Pulong han Ginoo.

SALMO RESPONSORIO

Sal 31:5-6, 14, 15-16

℟. Talwasa ako, Ginoo, pinaagi han imo gugma.

1. Talwasa ako han bitik nga gin-andam ha akon;

kay ikaw an akon darangpanan.

Ha imo kamot itinutubyan ko an akon espiritu.

Tatalwason mo ako, Ginoo;

matinumanon ka nga Dyos.

℟. Talwasa ako, Ginoo, pinaagi han imo gugma.

2. Nabati ako hin damo nga kaaway

nga naghuhuringhuring;

naglilibot ha akon in dako nga kahadlok.

Naglalarang hira pagsupil ha akon,

pagkuha han akon kinabuhi.

℟. Talwasa ako, Ginoo, pinaagi han imo gugma.

3. Kundi an akon pagsarig aada ha imo, O Ginoo;

ikaw an akon Dyos.

Dayuday ginmamangnoan mo ako;

talwasa ako han akon mga kaaway,

hadton mga nagtitimaraot ha akon.

℟. Talwasa ako, Ginoo, pinaagi han imo gugma.

PAGBASA II

Mt 20: 17-28

Pagbasa tikang han santos nga Ebanghelyo sumala kan Mateo.

Samtang nasagka hi Jesus tipakadto ha Jerusalem, ginlain niya an dose nga mga tinun-an, ngan ginhilit hira hin pagsiring, “Pamati kamo: matukad kita ngadto ha Jerusalem, diin igtutubyan an Anak han Tawo ngadto han mga kamot han mga puno han kapadian ngan mga magturutdo han Balaod. Ira paghuhukman hiya ha kamatayon, ngan igtutubyan hiya ha mga Hentil. Pagbibiaybiayon, paglalatobon, ngan igraraysang hiya ha kros; kundi mababanhaw hiya ha ikatulo ka adlaw.”

Niyan, kinadto kan Jesus an iroy han mga anak ni Sebedeo, upod an iya mga anak nga lalake, ngan yinukbo ha iya ngan may-ada niya pinangaro. Nagpakiana hi Jesus ha iya, “Ano an imo karuyag?” Binaton hiya, “Igsaad gad ha akon nga palilingkoron mo ini nga duduha ko nga mga anak, ha imo tuo ngan ha imo wala kon maghadi ka na.” Nagbaton hi Jesus ha ira, “Diri kamo maaram kon ano an iyo pinangangaro. Makakainom ba kamo han kupa han mga pag-antos nga ha diri maiha akon iimnan?” “Makakahimo kami,” binaton hira. Ginsiring hira ni Jesus, “Matuod, makakainom kamo han akon kupa, kundi waray ako katungod hin pagpili kon hin-o an malingkod ha akon tuo ngan ha akon wala. Ini nga mga dapit para ini hadton gin-andaman han akon Amay.”

Han pakabati hini han iba nga napulo nga mga tinun-an, nagkasisina hira han duha nga magbugto. Sanglit gintirok ni Jesus hira ngatanan ngan ginsiring, “Maaram kamo nga an mga punoan han mga pagano may gahom han ira mga tawo, ngan an ira mga pangulo naghahadi ha ira. Kundi diri ini amo nga paagi an angay niyo sundon. Kon may usa ha iyo nga karuyag magin labaw, kinahanglan magin surugoon hiya han iba; ngan kon may usa ha iyo nga karuyag magin gilalabawi, kinahanglan magin oripon hiya niyo— sugad han Anak han Tawo nga waray makanih hin pagpaataman, kundi hin paghatag han iya kinabuhi para hin pagtubos hin damo nga mga tawo.”

An Ebanghelyo han Ginoo.