Kinaadlaw nga Pagbasa

TUIG A

PAGBASA I

Ex 17:3-7

Pagbasa tikang han Basahan han Exodo.

Kundi inuuhaw na hin duro an mga tawo ngan nagpadayon hira hin pagngurutob kan Moises. Nagsiring hira, “Kay ano nga ginpagawas mo kami ha Ehipto? Pagpatay ba hin uhaw ha amon, han amon mga anak, ngan han amon kabakahan?” Nag-ampo hi Moises hin kinasingkasing ha Ginoo ngan nagsiring, “Ano an akon sadang pagbuhaton hini nga mga tawo? Andam na hira hin pagbato ha akon.” Nagsiring kan Moises an Ginoo, “Paupda ha imo in pira han mga pangulo han Israel ngan pag-una kamo han mga tawo. Dad-a an tungkod nga imo iginbalbag han Nilo. Matindog ako ha imo atubangan dida hin usa nga bato didto ha Bukid Sinai. Balbaga an bato ngan maawas tikang hini in tubig nga irimnon para han mga tawo.” Ginbuhat ini ni Moises ha atubangan han mga pangulo han Israel. Ginngaranan niya nga Masa ug Meriba an dapit, kay nagngurutob an mga Israelita ngan ginsarihan nira an Ginoo han pagpakiana nira, “Kaupod ba naton an Ginoo o diri?”

An Pulong han Ginoo.

SALMO RESPONSORIO

Sal 95:1-2, 6-7, 8-9

℟. Kon yana nga adlaw mamamati la kamo han iya tingog: “Ayaw patig-aha an iyo kasingkasing.”

1. Kadi, an Ginoo aton pagdayawon!

Magkanta, magrayhak kit’ hin malipayon;

ngadto han Dyos hiya'n panalipod naton,

hiya nga magtaralwas ta an pagdaygon.

Hin pagpasalamat ngadto kit’ ha iya,

magrugya hin mga pagdayaw nga kanta.

℟. Kon yana nga adlaw mamamati la kamo han iya tingog: “Ayaw patig-aha an iyo kasingkasing.”

2. Kadi, yukbo kita, aton pagsingbahon,

luhod ha Ginoo, naghimo ha aton!

Kay amo man ada hiya an Dyos naton,

kita katawhan, gin-ataman nga panon.

℟. Kon yana nga adlaw mamamati la kamo han iya tingog: “Ayaw patig-aha an iyo kasingkasing.”

3. Pamati hiya nagyayakan yana:

“Kasingkasing niyo ayaw patig-aha;

sugad kaapoyan niyo ha Meriba,

sugad didto han kamingawan ha Masa.

Didto ak’ ginsulay, ira ginsarihan,

Bis’ ak’ mga buhat ira nakita na.”

℟. Kon yana nga adlaw mamamati la kamo han iya tingog: “Ayaw patig-aha an iyo kasingkasing.”

PAGBASA II

Rom 5:1-2, 5-8

Pagbasa tikang han Surat ni San Pablo ngadto han mga taga Roma.

Yana, tungod nga gin-isip na kita nga matadong sa Dyos pinaagi hin pagtoo, may-ada na naton malinaw nga pakig-usa sa Dyos, pinaagi han aton Ginoo Jesu-Cristo. Gindara kita niya pinaagi hin pagtoo, ngan kinarawat naton an grasya han Dyos nga amo an nahatag hin kinabuhi ha aton yana. Sanglit nalilipay kita ha paglaom nga makakaangbit kita han himaya han Dyos!

Diri nakakapaturaw ha aton ini nga paglaom kay ginbubo han Dyos an iya gugma ha aton mga kasingkasing pinaagi han Espiritu Santo nga hatag han Dyos ha aton. Kay han waray pa naton sadang mahimo, nagpakamatay hi Cristo para han mga magpakasasala, ha amo nga panahon nga gintalaan han Dyos. Makuri an pagpakamatay para hin tawo nga matadong. Bangin may umilob pagpakamatay para hin maupay nga tawo. Kundi iginpakita han Dyos an iya dako nga paghigugma ha aton nga dida han magpakasasala pa kita, nagpakamatay hi Cristo para ha aton.

An Pulong han Ginoo.

PAGBASA III

Jn 4:5-42

[Jn 4: 5-15, 19b-26, 39a, 40-42]

Pagbasa tikang han santos nga Ebanghelyo sumala kan Juan.

[Inabot hiya ha Sicar, usa nga bungto ha Samaria, nga hirani han tuna nga iginhatag ni Jacob kan Jose nga iya anak. Nakadto an atabay ni Jacob. Tungod han kakapoy han pagbaktas, liningkod hi Jesus ha ligid han atabay, kay tikaurudto na.

May inabot nga usa nga Samaritana hin pag-alog, ngan nagsiring hi Jesus ha iya, “Paimna gad ako.” Binaton an babaye, “Judiyo ka ngan Samaritana ako, kay ano nga nagahom ka pangaro ha akon hin pag-inom?” (Kay diri nagkakasarabot an mga Judiyo ngan mga Samaritano. Diri ngani nagamit an mga Judiyo han amo nga mga karaonan nga ginagamit han mga Samaritano.) Nagbaton hi Jesus, “Kon maaram ka la han ihinahatag han Dyos, ngan kon hin-o hiya nga naaro ha imo hin pag-inom, mangangaro ka unta ha iya ngan tatagan ka niya hin tubig nga nahatag hin kinabuhi.” Nagsiring an babaye, “Hain ka man kukuha hito nga tubig, kay waray ka man ikarabo, ngan hilarom an atabay? Hi Jacob nga amon ginikanan an naghatag ha amon hini nga atabay, ngan nanginom hini hira ngatanan: hiya, an iya mga anak, ngan an iya mga hayop. Labaw ka pa ba kan Jacob?” Binaton hi Jesus, “Uuhawon la gihapon an bisan hin-o nga mainom hini nga tubig, kundi diri na gud uuhawon an bisan hin-o nga mainom han tubig nga akon ihahatag. Mahihimo nga burabod dida ha iya an ihahatag ko nga tubig, an buhi nga tubig nga mahatag ha iya han dayon nga kinabuhi.” Nagsiring an babaye, “Tagi gad ako hini nga tubig, basi diri na ako uhawon, ngan diri na ako magbinalikbalik nganhi hin pag-alog.”]

Nagsiring hi Jesus ha iya, “Kadto na, tawaga an imo bana ngan balik nganhi.” “Waray ako asawa,” nagsiring an babaye. Binaton hi Jesus, “Tama an imo siring nga waray ka bana, kay lima na an imo iginkaasawa, ngan diri mo bana iton iginkakalungon mo yana. Matuod gud an imo siring.” [“Naabat ako nga usa ka nga manaragna,” nagsiring an babaye. “Nagsingba dinhe hini nga bukid an amon mga kaapoy-apoyan nga Samaritano, kundi kay ano nga nagdidig-on man kamo nga mga Judiyo nga didto la ha Jerusalem an dapit nga angay naton pagsingbahon an Dyos?” Nagsiring hi Jesus ha iya, “Babaye, tuod na la ha akon: maabot an panahon nga diri na an mga tawo magsisingba han Amay dinhe hini nga bukid o didto ha Jerusalem. Diri kamo nga mga Samaritano maaram kon hin-o an iyo ginsisingba; maaram kami nga mga Judiyo han amon ginsisingba, kay natikang ha mga Judiyo an katalwasan. Kundi maabot an panahon, ngan aanhi na, nga magsisingba han Amay ha espiritu ngan ha kamatuoran an matuod nga mga magsiringba. Amo ini nga mga magsiringba an naruruyagan han Amay nga magsisingba ha iya. Espiritu an Dyos, ngan kinahanglan magsingba ha espiritu ngan ha kamatuoran an mga nagsisingba ha iya.” Nagsiring an babaye ha iya, “Maaram ako nga maabot an Mesiyas, nga gintatawag nga Cristo. Kon umabot na hiya, susumatan kita niya han ngatanan nga mga butang.” Binaton hi Jesus, “Ako amo hiya, ako nga nakikighimangraw ha imo.”]

Hito ngahaw nga takna nagkaabot an mga tinun-an ni Jesus, ngan duro an ira paghipausa nga nakikighimangraw hiya hin babaye. Kundi waray ha ira nagpakiana han babaye, “Ano an imo tuyo?” o kan Jesus, “Kay ano nga nakikighimangraw ka ha iya?” Binayaan han babaye an iya tibod ngan binalik ngadto ha bungto. Nagsiring hiya ha mga tawo didto, “Tana, kitaa niyo an tawo nga nagsumat ha akon han ngatanan nga akon nabuhat. Amo na ba hiya an Mesiyas?” Sanglit binayaan nira an bungto ngan napakadto hira kan Jesus. Hito ngahaw nga takna naghinangyo an mga tinun-an kan Jesus, “Magturutdo, kaon na!” Kundi nagbaton hiya, “May-ada ako pagkaon nga waray niyo hibabaroi.” Sanglit may hin parupakiana an mga tinun-an, “May-ada ba nagdul-ong ha iya hin pagkaon?” Nagsiring hi Jesus ha ira, “An akon pagkaon amo an pagtuman han kaburot-on han nagsugo ha akon ngan paghuman han iya ipinapagbuhat ha akon. Di ba nasiring kamo, ‘Upat ka bulan anay san-o mag-ani?’ Kundi nasiring ako ha iyo, tan-awa daw niyo hin maupay an kaumhan: hinog ngan igo na anihon. Sinusuholan an mag-arani ngan gintitirok niya an mga inani para han dayon nga kinabuhi, basi magkaurosa hin pagkalipay an magtaranom ngan an mag-arani. Matuod an darahunon, ‘Usa an nagtatanom, iba an nag-aani.’ Ginsugo ko kamo hin pag-ani dida hin uma nga waray niyo pagkabudlayi; iba in nagkabudlay hito, ngan kamo an nagpapahimulos han ira ginkabudlayan.”

[Tinoo kan Jesus in damo han mga Samaritano hito nga bungto] kay nagsiring an babaye, “Ginsumatan ako niya han ngatanan nga akon nabuhat.” [Sanglit han pag-abot han mga Samaritano, naghangyo hira ha iya nga magpabilin hiya dida ha ira. Ngan nagpabilin didto hi Jesus hin duha ka adlaw. Damo pa in tinoo tungod han iya mensahe, ngan ginsumatan nira an babaye, “Natoo na kami yana, diri tungod han imo iginsiring, kundi tungod han hinbatian namon ngahaw ha iya, ngan maaram kami nga hiya amo an tinuod nga Magtaralwas han kalibutan.”]

An Ebanghelyo han Ginoo.