Kinaadlaw nga Pagbasa

22 MARSO 2026

IKALIMA NGA DOMINGO HAN CUARESMA

TUIG A

PAGBASA I

Ezeq 37:12-14

Pagbasa tikang han Basahan ni Ezequiel nga manaragna.

Nagsiring ha akon an Dyos, “Sanglit panagna ngadto han akon mga tawo, an Israel, ngan sidnga hira nga bubuksan ko, an Ginoo nga Dyos, an ira mga lubnganan. Igagawas ko hira ngan ibabalik hira ngadto han tuna han Israel. Kon buksan ko na an mga lubnganan nga ginlubngan han akon mga tawo ngan mahigawas na hira, makilala hira nga ako amo an Ginoo. Giginhawaan ko hira, bubuhion ko hira, ngan pauokyon ko hira didto han ira kalugaringon nga tuna. Niyan makilala hira nga ako amo an Ginoo. Nagsaad ako nga pagbubuhaton ko ini—ngan pagtutumanon ko gud. Ako nga Ginoo an nagyakan.”

An Pulong han Ginoo.

SALMO RESPONSORIO

Sal 130:1-2, 3-4, 5-6, 7-8

℟. Aada han Ginoo an kalooy ngan aada ha iya an hingpit nga katalwasan.

1. Ha butnga han akon pagturaw, O Ginoo,

natawag ug nasangpit ako ha imo.

Pamatii, Ginoo, an akon mga pangamuyo,

dungga an akon pangaro han tambulig nimo.

℟. Aada han Ginoo an kalooy ngan aada ha iya an hingpit nga katalwasan.

2. Kon manumdom ka han amon mga kasal-anan,

hin-o man an diri kasisirotan?

Kundi ha amon ikaw napasaylo,

sanglit magsusugot gud kami ha imo.

℟. Aada han Ginoo an kalooy ngan aada ha iya an hingpit nga katalwasan.

3. Naghihinulat ako han bulig han Ginoo,

ngan han iya mga pulong natapod ako.

Ngan naghuhulat ako han Ginoo,

labaw pa han mga sirino nga naghuhulat

han kaagahon nga bag-o.

O Israel, an Ginoo paglaomi.

℟. Aada han Ginoo an kalooy ngan aada ha iya an hingpit nga katalwasan.

4. Kay an iya gugma dayuday gud pirme,

ngan andam hiya hin katalwasan pagserbi.

Tutobson niya an mga tawo han Israel,

han ngatanan nira nga mga pagsupil.

℟. Aada han Ginoo an kalooy ngan aada ha iya an hingpit nga katalwasan.

PAGBASA II

Rom 8:8-11

Pagbasa tikang han Surat ni San Pablo ngadto han mga taga Roma.

Diri nakakalipay han Dyos an nagsusugot han ira lawasnon nga kinaiya. Kundi diri na kamo nabubuhi sumala han mando han iyo lawasnon nga kinaiya, kundi han espirituhanon—kon ha tinuod nag-uokoy dida ha iyo an Espiritu han Dyos. Adton waray Espiritu ni Cristo, diri sakop ni Cristo. Kundi kon nag-uukoy hi Cristo dida ha iyo, an Espiritu amo an iyo kinabuhi bisan kon an iyo mga lawas mamatay tungod han sala, kay ginpakamatadong na kamo han Dyos. Kon nag-uukoy dida ha iyo an Espiritu han Dyos nga nagbanhaw kan Jesus, hiya nga nagbanhaw kan Cristo mahatag hin kinabuhi ha iyo mga lawas nga may kamatayon pinaagi han iya Espiritu nga aada ha iyo.

An Pulong han Ginoo.

PAGBASA III

Jn 11:1-45

Pagbasa tikang han santos nga Ebanghelyo sumala kan Juan.

May usa nga tawo nga hi Lazaro an ngaran. Nag-ukoy hiya ha Betania upod an iya kabugtoan nga kababayen-an, hira Maria ug Marta. (Amo ini nga Maria an nagbubo hin pahamot ha mga tiil han Ginoo ngan ginpahiran han iya buhok. Nasakit hi Lazaro nga iya bugto.) [Nagpatugon ini nga magbugto nga kababayen-an ngadto kan Jesus nga sidngon hiya, “Ginoo, masakit an imo suok nga sangkay.” Han pakabati ni Jesus hini, nagsiring hiya, “Diri ikamamatay ni Lazaro ini nga sakit. Nahinabo ini basi pasidunggan an Dyos, ngan pinaagi hito, pasidunggan man liwat an Anak han Dyos.” Hinigugma ni Jesus hira Marta, Maria, ug Lazaro. Han pakabati niya nga masakit hi Lazaro, duha anay ka adlaw an iya ginpalabay san-o hiya kumadto. Katapos, nagsiring hiya ngadto han iya mga tinun-an, “Tana, balik kita ha Judea.”] Nagbaton an mga tinun-an, “Magturutdo, diri pa la maiha nga gin-iibarato ka didto han mga Judiyo, ngan karuyag mo na liwat hin pagkadto?” Nagsiring hi Jesus, “Di ba may dose ka oras an usa ka adlaw? Sanglit diri mahipapakdol an tawo nga maglalakat ha kapaw-an, kay nakita hiya han kapawa hini nga kalibutan. Kundi mahipapakdol hiya kon maglakat hiya ha gab-i, kay masirom man.” Ginsiring ini ni Jesus ngan sinumpayan pa niya pagsiring, “Nakaturog hi Lazaro nga aton sangkay, kundi makadto ako hin pagpukaw ha iya.” Nagbaton an mga tinun-an, “Ginoo, mag-uupay hiya kon nakaturog la hiya.” Karuyag sidngon ni Jesus nga patay na hi Lazaro; kundi naghunahuna an mga tinun-an nga nagsiring hi Jesus nga nakaturog la hiya. Sanglit ginsumatan hira ni Jesus hin waray lipodlipod, “Patay na hi Lazaro; kundi tungod ha iyo nalilipay ako nga waray ako didto upod ha iya, basi tumoo kamo. Kadtoa ta hiya.” Nagsiring ngadto han iya mga igkasi tinun-an hi Tomas, an ginngangaranan nga Karuha, “Tana, bunyog kita ngatanan han Magturutdo, basi mamatay kita upod ha iya!”

Pag-abot ni Jesus, nasayran niya nga upat na ka adlaw nga iginlubong hi Lazaro. Mga tulo la ka kilometro an Betania tikang ha Jerusalem, ngan damo nga mga Judiyo an kinmadto hin pagliaw kanda Marta ug Maria mahitungod han kamatay han ira bugto. Han pakabati ni Marta nga tiarabot hi Jesus, kinmadto hiya hin pagtapo, samtang hi Maria nagpabilin ha balay. Nagsiring hi Marta kan Jesus, “Ginoo, diri unta napatay an akon bugto kon nakanhi ka pa! Kundi maaram ako nga bisan yana, ihahatag ha imo han Dyos an bisan ano nga imo pangaroon ha iya.” Ginsumatan hiya ni Jesus, “Mababanhaw an imo bugto.” Nagbaton hi Marta, “Maaram ako nga mababanhaw hiya ha kataposan nga adlaw.” Nagsiring hi Jesus ha iya, “Hi ako an pagkabanhaw ngan an kinabuhi. Mabubuhi an bisan hin-o nga natoo ha akon, bisan kon mamatay hiya; ngan diri na gud mamamatay an bisan hin-o nga buhi nga natoo ha akon. Natuod ka ba hini?” Nagbaton hiya, “Oo, Ginoo, natoo ako nga amo ka an Mesiyas, an Anak han Dyos, nga makanhi ha kalibutan.”

Katapos pagsiring hini ni Marta, binalik hiya ngan gintawag hi Maria nga iya bugto. (Waray pa abot hi Jesus ha baryo, kundi nakadto pa han dapit nga ginkatapoan niya ngan hi Marta.) Ginhuringan niya hi Maria, “Hahani an Magturutdo ngan nagpipinakiana ha imo.” Pakabati ni Maria hini, binuhat hiya ngan nagdagmit hin paggawas pagtapo kan Jesus. Hinkit-an ngan ginsunod hiya han mga Judiyo nga nakadto ha ira balay hin pagliaw ha iya. Naghunahuna hira nga tikadto hiya ha lubnganan hin pagtangis didto. Inabot hi Maria ha dapit diin nakadto hi Jesus. Pakakita niya kan Jesus, hinapa hiya ha atubangan niya ngan nagsiring, “Ginoo, diri unta napatay an akon bugto kon nakanhi ka pa!” Hinkit-an hiya ni Jesus nga nagtatangis, sugad man an mga Judiyo nga upod niya; nabantad an iya kasingkasing ngan inalpan hiya hin kalooy. Nagpakiana hiya ha ira, “Diin niyo iglubong hiya?” Nagbaton hira, “Kadi, Ginoo, ngan kitaa.” Nagtangis hi Jesus. Sanglit nagsiring an mga Judiyo, “Kitaa, pagkadako han iya paghigugma kan Lazaro!” Kundi an iba ha ira nagsiring, “Hiya nga nakapakita han mga mata han buta, diri ba hiya takos makapugong han kamatayon ni Lazaro?”

Kinadto hi Jesus ha lubnganan kay inalpan na liwat hiya hin kabido. Usa adto nga lungib nga sinadhan hin bato. Nagsugo hi Jesus, “Kuhaa niyo an bato!” Nagbaton hi Marta nga bugto han minatay, “Naninimaho na hiya yana, Ginoo, kay upat na ka adlaw tikang hiya iginlubong.” Nagsiring hi Jesus ha iya, “Diri ba nagsiring ako ha imo nga hikikit-an mo an gahom han Dyos kon tumoo ka?” Ginkuha nira an bato. Hinangad hi Jesus ngan nagsiring, “Nagpapasalamat ako ha imo, Amay ko, nga pinamamatian mo ako. Maaram ako nga dayuday ka namamati ha akon, kundi iginyakan ko ini tungod hini nga mga tawo nga aanhi yana, basi tumoo hira nga ginsugo mo ako.” Katapos niya magsiring hini, ginoliat hiya, “Lazaro! Gawas ngadi!” Ginawas an minatay nga inalikosan pa an iya mga tiil han mga dugnit hin paglubong, pati an iya nawong. Nagsiring hi Jesus ha ira, “Hubari niyo ngan palakta hiya.” Nakakita han ginbuhat ni Jesus in damo han mga Judiyo nga nagduaw kan Maria, ngan tinmoo hira ha iya.

An Ebanghelyo han Ginoo.

_________________

Halipot nga Ebanghelyo

Jn 11:3-7, 17, 20-27, 33b-45

Pagbasa tikang han santos nga Ebanghelyo sumala kan Juan.

Pag-abot ni Jesus, nasayran niya nga upat na ka adlaw nga iginlubong hi Lazaro. Han pakabati ni Marta nga tiarabot hi Jesus, kinmadto hiya hin pagtapo, samtang hi Maria nagpabilin ha balay. Nagsiring hi Marta kan Jesus, “Ginoo, diri unta napatay an akon bugto kon nakanhi ka pa! Kundi maaram ako nga bisan yana, ihahatag ha imo han Dyos an bisan ano nga imo pangaroon ha iya.” Ginsumatan hiya ni Jesus, “Mababanhaw an imo bugto.” Nagbaton hi Marta, “Maaram ako nga mababanhaw hiya ha kataposan nga adlaw.” Nagsiring hi Jesus ha iya, “Hi ako an pagkabanhaw ngan an kinabuhi. Mabubuhi an bisan hin-o nga natoo ha akon, bisan kon mamatay hiya; ngan diri na gud mamamatay an bisan hin-o nga buhi nga natoo ha akon. Natuod ka ba hini?” Nagbaton hiya, “Oo, Ginoo, natoo ako nga amo ka an Mesiyas, an Anak han Dyos, nga makanhi ha kalibutan.”

An Ebanghelyo han Ginoo.