Kinaadlaw nga Pagbasa

PAGBASA I

Is 7:10-14; 8:10

Pagbasa tikang han basahan ni Isaias nga manaragna.

Nagpadara an Ginoo hin lain nga mensahe ngadto kan Acas: “Pangaroi hin tigaman an Ginoo nga imo Dyos. Diri ngani tikang ha kahiladman han kalibutan han mga patay o tikang didto ha kahitas-an.” Binaton hi Acas, “Diri ako maaro hin tigaman. Diri ko pagsasarihan an Ginoo.” Nagbaton hi Isaias, “Pamati yana, mga tulin ni Hadi David. Kon diri maupay para ha iyo an paghulop han mga tawo—paghuhulopon ba liwat niyo an akon Dyos? Sanglit an Ginoo ngahaw an mahatag ha iyo hin tigaman: Mag-aanak hin lalake in usa nga burod nga daragita ngan pagngangaranan hiya nga ‘Emmanuel’ nga karuyag signgon “Upod naton an Dyos.”

An Pulong han Ginoo.

SALMO RESPONSORIO

Sal 40:7-8a, 8b-9, 10, 11

℟.  Iini ako, Ginoo, pagtuman han imo kaburot-on.

1. Diri ka naruruyag hin mga halad-sinunog ngan mga halad;

diri ka nangangaro hin mga mananap

nga ginsunog hin bug-os ha halaran,

o mga halad-sinunog pagkuha hin mga sala.

Gintagan mo lugod ako hin mga igdurungog pamati ha imo,

sanglit binmaton ako, “Iini ako.”

℟.  Iini ako, Ginoo, pagtuman han imo kaburot-on.

2. Aada ha basahan han Balaod

an imo mga tugon para ha akon.

Hin kamaruruyagon ko pagbuhat

han imo kaburut-on, O Dyos ko!

Tinitipigan ko ha akon kasingkasing

an imo pagturon-an.”

℟.  Iini ako, Ginoo, pagtuman han imo kaburot-on.

3. Iginsumat ko an maupay nga sumat

nga nagtatalwas ka,

dida han katig-oban han ngatanan nimo

nga mga tawo, O Ginoo.

Maaram ka nga diri gud ako mahunong pagsinumat hito.

℟.  Iini ako, Ginoo, pagtuman han imo kaburot-on.

4. Waray ko pagtagoa ha akon la ngahaw

an sumat han katalwasan;

dayuday iginhimangraw ko

an imo kamatinumanon ngan tambulig.

Waray ako maghilom dida han katig-oban

han ngatanan nimo nga mga tawo

mahitungod han imo dayuday

nga gugma ngan kamaunongon.

℟.  Iini ako, Ginoo, pagtuman han imo kaburot-on.

PAGBASA II

Heb 10:4-10

Pagbasa tikang han surat ngadto han mga Hebreo.

Kay diri gud makakakuha han mga sala an dugo han mga baka ngan mga kanding. Tungod hini, han tikanhi na hi Cristo ha kalibutan, nagsiring hiya sa Dyos, “Diri ka buot hin mga tinubod nga unong ngan mga halad, kundi nag-andam ka hin lawas para ha akon. Diri ka nalilipay hin mga mananap nga ginsusunog ha bawbaw han halaran, o hin mga halad pagkuha hin mga sala. Niyan nagsiring ako, ‘Aadi ako, O Dyos, pagtuman han buot mo ipabuhat ha akon, sumala han nahisurat hiunong ha akon, dida han basahan han Balaod.’” Syahan nagsiring hiya, “Diri ka naruruyag o nalilipay hin mga tinubod nga unong ngan mga halad, o hin mga mananap nga tinubod ha halaran, ngan han mga halad pagkuha hin mga sala.” Ginsiring ini niya bisan kon iginhahalad ini nga mga tinubod nga unong sumala han Balaod. Ngan nagsiring hiya, “Aadi ako, O Dyos, pagtuman han karuyag mo ipabuhat ha akon.” Sanglit iginsalikway han Dyos an ngatanan nga daan nga mga tinubod nga halad, ngan ginliwanan niya ini han paghalad ni Cristo. Tungod nga gintuman ni Cristo an karuyag han Dyos ipabuhat ha iya, nalinisan kita ngatanan han sala pinaagi han paghalad niya han iya kalugaringon nga lawas makausa ngan para han ngatanan.

An Pulong han Ginoo.

EBANGHELYO

Lc 1:26-38

Pagbasa tikang han santos nga Ebanghelyo sumala kan Lucas.

Han burod ni Elizabet hin unom ka bulan, ginsugo han Dyos hi Gabriel nga anghel ngadto ha Galilea, ha usa nga bungto nga Nazaret an ngaran. May dara hiya nga sumat para hin usa nga daraga nga sinayoran na hin lalake nga ginngaranan kan Jose, nga tulin ni Hadi David. Maria an ngaran hini nga daraga. Kinadto an anghel ha iya ngan nagsiring, “Maghimaya ka! Puno ka hin grasya! An Ginoo aada ha imo!” Dako an kagupong ni Maria han iginpasabot han anghel, ngan ginpainoino niya kon ano an kahulogan han iya mga pulong. Nagsiring ha iya an anghel, “Ayaw kahadlok, Maria, kay ginpalabi ka han Dyos. Magbuburod ngan mag-aanak ka hin lalake, ngan pagngangaranan mo hiya nga Jesus. Mahihimo hiya nga dako nga pagkatawo ngan tatawgon nga Anak han Gihahataasi nga Dyos. Hihimoon han Ginoo nga Dyos nga hadi hiya, sugad kan David nga iya ginikanan, ngan mahihimo hiya nga hadi ha kadayonan han mga tulin ni Jacob; an iya ginhadian waray kataposan!”

Hi Maria nagsiring han anghel, “Uray ngan putli ako. Uunanhon man hin kahimo hini?” Nagbaton an anghel, “Makunsad ha imo an Espiritu Santo, ngan magpapabilin ha imo an gahom han Dyos. Tungod hini, tatawgon nga Anak han Dyos ini nga santos nga bata. Kitaa! Hi Elisabet nga imo urupod bisan kon baw-as hiya ngan lagas na kaupay yana, burod na hin unom ka bulan. Kay waray butang nga diri mahihimo han Dyos.” Nagsiring hi Maria, “Iini ako nga surugoon han Ginoo. Matuman unta dinhe ha akon sumala han imo pulong.” Ngan binayaan hiya han anghel.

An Ebanghelyo han Ginoo.