Kinaadlaw nga Pagbasa

(Domingo han Pasyon o Lukay)

__________________________

AN PAGSULOD HAN GINOO NGADTO HA JERUSALEM

TUIG A

EBANGHELYO

Mt 21: 1-11

Pagbasa tikang han santos nga ebanghelyo sumala kan Mateo.

Han tikahirani na hi Jesus ug an iya mga tinun-an han Jerusalem, inabot hira ha Betfage, ha Bukid han mga Olibo. Ginpauna ni Jesus in duha han iya mga tinun-an upod ini nga tugon: “Kadto kamo ha baryo nga inaatubang niyo, ngan hiaagian dayon niyo in hinigtan nga asno upod an iya nati. Hubari niyo ngan dad-a nganhi. Ngan kon may-ada magpakiana ha iyo, sidnga niyo hiya, ‘Ginkikinahanglan ini han Ginoo,’ ngan ipadadara dayon ha iyo.” Nahinabo ini basi matuman an iginsiring han manaragna: “Sumati an syudad han Sion, maabot yana ngada ha imo an imo hadi. Mapinaubsanon hiya ngan nasakay hin asno, ug han iya nati.” Sanglit linakat an mga tinun-an ngan gintuman nira an iginsugo ni Jesus ha ira. Gindara nira an asno ngan an nati, ngan ginhapinan nira han ira mga kurugpos, ngan sinakay hi Jesus. An dako nga hugpo hin mga tawo nagbitad dida ha dalan han ira mga kurugpos, samtang an iba nangutod hin mga sanga hin mga kahoy ngan iginkatag nira ha dalan. Naggoliat an mga tawo nga nag-uuna kan Jesus ngan an mga nagsusunod ha iya: “Dayawon an Anak ni David! Dayawon han Dyos hiya nga nakanhi ha ngaran han Ginoo! Dayawon an Dyos!” Han pagsulod na ni Jesus han Jerusalem, narigumok an bug-os nga syudad. Nagpakiana an mga tawo, “Hin-o man ini hiya?” Binaton an hugpo han mga tawo, “Amo ini hi Jesus, an manaragna nga taga-Nazaret, ha Galilea.”

An Ebanghelyo han Ginoo.

__________________________

AN MISA

PAGBASA I

Is 50:4-7

Pagbasa tikang han basahan ni Isaias, an Manaragna.

Gintutdoan ako han Ginoo nga Dyos kon ano an akon igsisiring, basi makahatag ako hin kusog hadton mga ginugul-an. Kada aga gin-aaghat ako niya hin pamati han iya igtututdo ha akon. Gintagan ako han Ginoo hin pagsabot, ngan waray ako sumupil o bumaya ha iya. Ginlubasan ko an akon taludtod ngadto hadton mga naghahampak ha akon, tinugotan ko hira hin pagtamay ha akon, han pagrabot han akon bungot, ngan pagtupra ha akon bayhon. Kundi diri makakadaot ha akon an ira mga pagtamay, kay ginbubuligan ako han Ginoo nga Dyos. Maniniguro ako nga mailob ko ini, maaram ako nga diri ako kaalohan.

An Pulong han Ginoo.

SALMO RESPONSORTO 

Sal 22:8-9, 17-18a, 19-20, 23-24

℟. Dyos ko, Dyos ko, kay ano nga ginbayaan mo ako?

1. Gintataw-an ako han ngatanan nga nakita ha akon;

nanyayam-id hira ngan naglilingolingo.

“Tinapod ka han Ginoo,” nasiring hira.

“Kay ano nga diri ka tinatalwas niya?

Kon kinaruruyag ka han Ginoo,

kay ano nga diri ka niya binubuligan?

℟. Dyos ko, Dyos ko, kay ano nga ginbayaan mo ako?

2. Ginlilibotan ako hin hugpo nga mga yawan-on;

ginduduok ako nira pareho hin kaayaman;

ginkakagat nira an akon mga kamot ngan mga tiil.

Nakikita an ngatanan ko nga mga tul-an.

℟. Dyos ko, Dyos ko, kay ano nga ginbayaan mo ako?

3. Ginriripahan nira an akon mga panapton

ngan hira la ngahaw an nagbahinbahin.

O Ginoo, ayaw ako pagbayai!

Kadi dayon pagtalwas ha akon!

℟. Dyos ko, Dyos ko, kay ano nga ginbayaan mo ako?

4. Susumatan ko an akon mga tawo han imo nabuhat,

pagdadayawon ko ikaw ha ira katirok:

“Pagdayawa hiya, kamo nga mga surugoon han Ginoo!

Pasidunggi hiya, kamo nga mga tulin ni Jacob!

Pagsingbaha hiya, kamo nga mga tawo han Israel!

℟. Dyos ko, Dyos ko, kay ano nga ginbayaan mo ako?

PAGBASA II

Fil 2.6-11

Pagbasa tikang han surat ni San Pablo han mga taga Filipos.

Dayuday may-ada niya kinaiya han Dyos, kundi waray hiya makahuna-huna hin pagtupong han Dyos pinaagi hin kusog. Lugod, ha iya kaburot-on, itinubyan niya an ngatanan nga pagka-Dyos, ngan kinuha hiya han kinaiya hin surugoon. Natawo hiya sugad ha aton, ngan pinmakita hiya nga sugad hin tawo. Nagpaubos hiya ngan nagsugot tubtob ha kamatayon—an kamatayon ha kros. Tungod hini, gin-undong hiya han Dyos ngadto han gihahataasi nga langit, ngan ihinatag ha iya an ngaran nga labaw han iba nga mga ngaran. Ha pagpasidungog han ngaran ni Jesus, maluhod an ngatanan nga aadto ha langit an aanhi ha tuna,  ngan aadto ha kahiladman, ngan ha dayag magpapasangyaw nga hi Jesu-Cristo amo an Ginoo, ha pagpasidungog han Dyos nga Amay.

An Pulong han Ginoo.

Tuig A

PAGBASA III (Pasyon)

Mt 26:14—27:66

An Pasyon han aton Ginoo Jesucristo sumala kan Mateo.

Parag-asoy: Kinadto han mga puno han kapadian in usa han dose nga mga tinun-an, nga ginngangaranan kan Judas Iscariote, ngan nagsiring,

Tawo: “Ano man an ihahatag niyo ha akon kon itubyan ko ha iyo hi Jesus?”

Parag-asoy: Nag-ihap hira hin katloan (30) ka salapi ngan iginhatag nira ha iya. Tikang hadto nga takna naghingita na hi Judas hin maupay nga higayon hin paglingo kan Jesus.

Ha syahan nga adlaw han Pyesta han Tinapay nga Waray Patubo, hinarani kan Jesus an iya mga tinun-an ngan nagpakiana,

Katawhan: “Diin an imo karuyag nga amon pag-aandaman para ha imo han kanan Paglabay nga pangaon?”

Parag-asoy: Binaton hiya,

Jesus: “Pakadto kamo hin usa ka tawo didto ha syudad, ngan sidnga hiya: ‘Nasiring an Magturutdo. Inabot na an akon takna; magsasaurog ako ngan an akon mga tinun-an han Paglabay dida ha imo balay.’”

Parag-asoy: Gintuman han mga tinun-an an iginsugo ha ira ni Jesus, ngan gin-andam an kanan Paglabay nga pangaon. Han pagkagab-i na, liningkod hin pagkaon hi Jesus ngan an dose niya nga mga tinun-an. Samtang nangangaon hira, nagsiring hi Jesus,

Jesus: “Susumatan ta kamo, usa ha iyo in maglilingo ha akon.”

Parag-asoy: Duro an kabido han mga tinun-an ngan an tagsatagsa nagpakiana ha iya,

Katawhan: “Ako ba, Ginoo?”

Parag-asoy: Binaton hi Jesus,

Jesus: “An madungan ha akon hin pagtunlob han iya tinapay ha plato, amo hiya an maglilingo ha akon. Mapatay an Anak han Tawo sumala han iginsiring han Kasuratan, kundi kamakaharadlok para han tawo nga maglilingo han Anak han Tawo! Mauruupay pa unta kon waray ini hiya matawo!”

Parag-asoy: Nagpakiana hi Judas, an malingo nga tawo,

Tawo: “Magturutdo, ako ba an karuyag mo sidngon?”

Parag-asoy: Binaton hi Jesus,

Jesus: “Ginyakan mo ini.”

Parag-asoy: Han nangangaon hira, kinuha ni Jesus an tinapay, nag-ampo hin pagpasalamat, ginpinitpinit ini niya, ngan iginhatag ha iya mga tinun-an upod an pagsiring,

Jesus: “Karawata niyo ngan kaon kamo. Amo ini an akon lawas.”

Parag-asoy: Ngan kinuha niya an kupa, nagpasalamat sa Dyos, ngan iginhatag ini ha ira upod an pagsiring,

Jesus: “Inom kamo ngatanan hini. Amo ini an akon dugo nga nagpapadig-on han ginsaaran han Dyos, an akon dugo nga gin-ula para han kadam-an, basi mapasaylo an mga sala. Nasiring ako ha iyo nga diri na gud ako mainom hini nga bino tubtob han adlaw nga imnon ko an bag-o nga bino upod ha iyo didto han Ginhadian han akon Amay.”

Parag-asoy: Ngan nagkanta hira hin usa nga imno ngan nagpasingadto hira ha Bukid han mga Olibo. Niyan nagsiring hi Jesus ha ira,

Jesus: “Yana gud nga gab-i mapalagiw kamo ngatanan ngan babayaan ako niyo kay nasiring an Kasuratan, ‘Papatayon han Dyos an magbarantay ngan magsasarang an mga karnero.’ Kundi kon mabanhaw na ako, mag-uuna ako ha iyo ngadto ha Galilea.”

Parag-asoy: Nagsiring hi Pedro kan Jesus,

Tawo: “Diri gud ako mabaya ha imo bisan pa kon bayaan ka han ngatanan!”

Parag-asoy: Nagsiring hi Jesus kan Pedro,

Jesus: “Tigamni ini: diri pa matugaok an manok yana nga gab-i iglilirong mo na ako makatulo.”

Parag-asoy: Binaton hi Pedro,

Tawo: “Diri gud ako maglilirong ha imo bisan kon patayon ako upod ha imo!”

Parag-asoy: Ngan amo man an iginsiring han ngatanan nga mga tinun-an. Niyan kinadto hi Jesus upod an iya mga tinun-an hin dapit nga ginngangaranan nga Getsemane, ngan nagsiring hiya ha ira,

Jesus: “Pangalingkod kamo dinhe samtang makadto ako ha unhan hin pag-ampo.”

Parag-asoy: Igin-upod niya hira Pedro ngan an duha nga mga anak ni Sebedeo. Binati hiya hin dako nga kasakit ngan kabido, ngan nagsiring hiya ha ira,

Jesus: “Tugob hin kabidoan an akon kasingkasing nga haros ko ikamatay. Pabilin kamo dinhe ngan pagbantay upod ha akon.”

Parag-asoy: Napakadto hiya ha unhan, hinapa ha tuna, ngan nag-ampo,

Jesus: “Amay ko, kon mahimo, kuhaa gad ha akon ini nga kupa! Kundi matuman an imo pagbuot, diri an akon.”

Parag-asoy: Niyan binalik hiya ngadto han tulo nga mga tinun-an ngan hin-agian niya hira nga nangangaturog. Nagsiring hiya kan Pedro,

Jesus: “Naunan-o nga kamo nga tulo waray makahimo hin pag-agma upod ha akon bisan hin usa la ka oras? Pagbantay ngan pag-ampo kamo, basi diri kamo mahulog ngadto hin kasulay. Andam an espritu, kundi maluya an lawas.”

Parag-asoy: Binaya ha ira hi Jesus ngan nag-ampo,

Jesus: “Amay ko, kon diri man makukuha ini nga kupa labot kon imnon ko, matuman an imo kaburut-on.”

Parag-asoy: Binalik liwat hiya ngan hin-agian niya an mga tinun-an nga nangangaturog kay piraw na gud hira hin duro. Sanglit binayaan liwat hira ni Jesus, pinaharayo hiya, ngan nag-ampo hin ikatulo, hin amo gihapon nga mga pulong. Niyan binalik hiya ngadto han mga tinun-an ngan nagsiring,

Jesus: “Nangangaturog ngan namamahuway la gihapon kamo? Kitaa! Inabot na an takna nga itutubyan an Anak han Tawo ngadto han gahom han mga makasasala. Pagkabuhat kamo, pagkalakat na kita. Kitaa, aanhi na an tawo nga maglilingo ha akon!”

Parag-asoy: Nagyiyinakan pa hi Jesus han pag-abot ni Judas nga usa han dose nga mga tinun-an. Upod niya in damo nga mga tawo nga may dara nga mga espada ngan mga balbag. Ginsugo hira han mga puno han kapadian ngan han katigurangan han mga Judiyo. Naghatag an malingo hin usa nga tigaman ngadto han mga tawo:

Tawo: “An tawo nga akon hadkan amo an iyo ginbibiling. Dakpa niyo hiya!”

Parag-asoy: Han pag-abot ni Judas, kinadto dayon hiya kan Jesus ngan siniring,

Tawo: “Magturutdo, an kalinaw maada ha imo,”

Parag-asoy: ngan ginhadkan hiya. Binaton hi Jesus,

Jesus: “Sangkay, tumana dayon an imo karuyag pagbuhaton!”

Parag-asoy: Ngan dinaop hira, gindakop nira hi Jesus, ngan gintalo hiya. Hinulbot ha iya espada in usa han mga kaupod ni Jesus, ngan tigbason an oripon han Labaw nga Padi, ngan napalong an usa niya nga talinga. Siniring hi Jesus ha iya,

Jesus: “Ibalik ha takob an imo espada, kay adton magamit hin espada, mapatay pinaagi hin espada. Diri ka ba maaram nga makakaaro ako hin bulig tikang han akon Amay, ngan ha gilayon magpapadara hiya ha akon hin sobra dose nga mga hugpo hin kasondalohan nga mga anghel? Kundi kon buhaton ini, ano man hin katuman han Kasuratan nga nasiring nga kinahanglan ini mahinabo?”

Parag-asoy: Niyan nagyakan hi Jesus ngadto han mga tawo,

Jesus: “Tulisan ba ako nga kinanhi man kamo dara in mga espada ngan mga balbag hin pagdakop ha akon? Kada adlaw nalingkod ngan nagtutdo ako didto ha Templo, ngan waray ako niyo dakpa. Kundi nahinabo ini ngatanan basi matuman an iginsurat han mga manaragna dida han Kasuratan.”

Parag-asoy: Niyan an ngatanan nga mga tinun-an binaya ha iya ngan nangalagiw. Gindara hi Jesus han mga tawo nga nagdakop ha iya ngadto han balay ni Caifas, an Labaw nga Padi, diin nagkatirok an mga magturutdo han Balaod ngan an katigurangan. Sinunod ha iya hin antaw hi Pedro tubtob han libong han balay han Labaw nga Padi. Niyan sinulod hi Pedro han libong ngan liningkod upod han mga bantay, basi mahibaroan niya kon ano man an mahinanabo. An mga puno han kapadian ngan an bug-os nga konseho nagtalinguha hin pagbiling hin sadang igbutangbutang kan Jesus basi patayon nira. Kundi waray gud nira hin-agian, bisan kon damo in dinaop ngan nagsumat hin mga buwa mahitungod ha iya. Ha kataposan dinaop in duha ka tawo ngan nagsiring,

Tawo: “Nagsiring ini nga tawo, ‘Makakahimo ako hin pagruba han Templo han Dyos, ngan akon liwat titindogon sulod hin tulo ka adlaw.’”

Parag-asoy: Tinindog an Labaw nga Padi ngan nagpakiana kan Jesus,

Tawo: “Waray ba nimo sadang ibaton hini nga sumbong kontra ha imo?”

Parag-asoy: Kundi hinilom la hi Jesus. Nagsiring liwat ha iya an Labaw nga Padi,

Tawo: “Ha ngaran han Dyos nga buhi, pinapagsumpa ko ikaw: pagsumati kami kon amo ka ba an Mesiyas, an Anak han Dyos.”

Parag-asoy: Binaton ha iya hi Jesus,

Jesus: “Imo ito ginyakan. Kundi susumatan ko kamo ngatanan: tikang yana hikikit-an niyo an Anak han Tawo nga nalingkod ha tuo han Labi Kamakagarahum ngan maabot dida ha bawbaw hin mga dampog han langit!”

Parag-asoy: Han pakabati hini han Labaw nga Padi, ginggisi niya an iya panapton ngan nagsiring,

Tawo: “Dako nga pagpanamastamas han Dyos! Waray na kita kinahanglan hin mga testigo! Hinbatian na niyo dinhe an iya pagpanamastamas han Dyos! Ano an iyo ighuhukom?”

Parag-asoy: Binaton hira,

Katawhan: “Salaan hiya ngan kinahanglan mamatay.”

Parag-asoy: Niyan gintuprahan nira an iya bayhon ngan ginlatob hiya. Nagsiring an mga nagtampalo ha iya,

Katawhan: “Pagtagna ha amon, Mesiyas, tigoha kon hin-o an nagtampalo ha imo!”

Parag-asoy: Nalingkod hi Pedro didto han libong ha gawas. Hinarani ha iya in usa han mga babaye nga surugoon han Labaw nga Padi ngan siniring,

Tawo:  “Upod ka liwat ni Jesus nga taga-Galilea.”

Parag-asoy: Kundi iginlirong niya ini ha atubangan nira ngatanan.

Tawo: “Diri ako maaram han imo ginyayakan,”

Parag-asoy: Binaton hiya, ngan ginawas hiya ngadto han ganghaan han libong. Hinkit-an hiya hin lain nga surugoon nga babaye, ngan nagsumat hiya han mga tawo didto,

Tawo: “Kaupod hiya ni Jesus nga taga-Nazaret.”

Parag-asoy: Kundi naglirong liwat hi Pedro ngan binaton,

Tawo: “Iginsusumpa ko nga diri ako nakilala hito nga tawo!”

Parag-asoy: Waray pag-iha hinirani kan Pedro an kalalaken-an nga nakadto. Nagsiring hira,

Katawhan: “Waray ruhaduha usa ka ha ira, kay hinsasabutan namon pinaagi han imo pagyakan!”

Parag-asoy: Niyan nagsumpa hi Pedro ngan nagsiring,

Tawo: “Mamatay pa ako kon buwa an akon siring! Diri gud ako nakilala hito nga tawo!”

Parag-asoy: Dida dayon tinugaok in manok, ngan nahinumdom hi Pedro han iginsiring ha iya ni Jesus, “Iglilirong mo ako makatulo nga diri pa matugaok an manok.” Ngan ginawas hiya ngan nagtangis upod an pagbasol.

Timprano pa han aga nagsarabot na an ngatanan nga mga puno han kapadian ngan katigurangan han mga Judiyo kon uunanhon nira hin pagpatay kan Jesus. Ginggapos nira hiya, gindara, ngan igintubyan kan Pilato, an gobernador nga Romano.

Han pakasabot ni Judas, an malingo, nga ira hi Jesus papatayon, nagbasol hiya ngan igin-oli an katloan (30) ka salapi nga sensilyo ngadto han mga puno han kapadian ngan katigurangan han mga Judiyo. Nagsiring hiya,

Tawo: “Nakasala ako kay akon igintubyan ha kamatayon an tawo nga waray sala!”

Parag-asoy:  Binaton hira,

Katawhan: “Ano man an amon labot hini? Imo na ito baratonon!”

Parag-asoy: Ipinilak ni Judas an kwarta ngadto han ruwang han Templo ngan ginawas hiya. Katapos, linakat hiya ngan naghikog. Ginpurot han mga puno han kapadian an kwarta ngan siniring hira,

Katawhan: “Kwarta ini nga naunongan hin kinabuhi, ngan supak han aton Balaod nga ini ibutang didto han hiriposan han Templo.”

Parag-asoy: Ira ginkatarangdoan nga gamiton an kwarta hin pagpalit han Uma han Maghirimo hin Daba, basi himoon nga lubnganan hin mga lumalangyaw. Sanglit ginngaranan an uma nga “Uma hin Dugo” ngada yana nga adlaw. Sanglit natuman an iginsiring ni Jeremias nga manaragna: “Ginkuha nira an katloan (30) ka bug-os nga salapi, an ginkatangdoan han mga tawo han Israel hin pagpalit ha iya, 10ngan ginamit nira hin pagpalit han uma han maghirimo hin daba, sumala han sugo ha akon han Ginoo.”

_________

Dinhi nagtitikang an halipot nga pagbasa.

Parag-asoy: Tinindog hi Jesus ha atubangan han gobernador nga Romano ngan ginpakianhan hiya.

Tawo: “Ikaw ba an hadi han mga Judiyo?”

Jesus: “Imo ito ginyakan,”

Parag-asoy: nagbaton hi Jesus. Kundi waray hiya magbaton han mga sumbong han mga puno han kapadian ngan katigurangan. Sanglit nagsiring hi Pilato ha iya,

Tawo: “Diri ka ba nabati han ngatanan nga ira sumbong ha imo?”

Parag-asoy: Kundi waray gud hi Jesus magbaton bisan na man la usa ka pulong, sanglit duro gud an paghipausa han gobernador. Kada Pyesta han Paglabay may batasan han gobernador hin pagbuhi hin bisan hin-o nga priso nga pangaroon han mga tawo. Hadto nga panahon may kilala kaupay nga preso nga Jesus Barabas an ngaran. Sanglit han pagkatirok na han mga tawo, nagpakiana hi Pilato ha ira,

Tawo: “Hin-o man an iyo karuyag nga akon buhian? Hi Jesus Barabas ba o hi Jesus nga ginngangaranan nga Cristo?”

Parag-asoy: Nasayod hi Pilato nga igintubyan nira hi Jesus ha iya tungod la hin kaawa. Han nalingkod hi Pilato didto han hukmanan, ginpatugonan hiya han iya asawa nga nasiring:

Tawo: “Ayaw gud paghilabot hito nga tawo nga waray sala, kay kagab-i, pinaagi hin inop, nag-antos ako hin duro tungod ha iya.”

Parag-asoy: Ginhugay han mga puno han kapadian ngan katigurangan an mga tawo nga pangaroon nira kan Pilato nga buhian niya hi Barabas ngan patayon hi Jesus. Kundi ginpakianhan hira han gobernador,

Tawo: “Hin-o man hini nga duha an iyo karuyag nga akon buhian?”

Katawhan: “Hi Barabas!”

Parag-asoy: nagbaton hira.

Tawo: “Kon sugad, ano man an akon bubuhaton kan Jesus nga ginngangaranan nga Cristo?”

Parag-asoy: nagpakiana hi Pilato ha ira. Nagbaton hira ngatanan,

Katawhan: “Igraysang hiya ha kros!”

Parag-asoy: Kundi nagpakiana hi Pilato,

Tawo: “Ano nga sala an iya nabuhat?”

Parag-asoy: Ngan hira ha makusog nga tingog nagdurungan hin paggoliat,

Katawhan: “Igraysang hiya ha kros!”

Parag-asoy: Han pakasabot ni Pilato nga kawang la an pagpadayon, ngan bangin la mahinabo in kasamok, kinuha hiya hin tubig, naghunaw hiya ha atubangan han mga tawo, ngan nagsiring,

Tawo: “Waray ko labot han kamatayon hini nga tawo! Iyo ini karuyag!”

Parag-asoy: Binaton an ngatanan nga mga tawo,

Katawhan: “Kami ngan han amon mga anak an mabaton han kamatayon hini nga tawo!”

Parag-asoy: Niyan ginbuhian ni Pilato hi Barabas, iginpalatob niya hi Jesus, ngan igintubyan hiya ha ira basi igraysang ha kros. Niyan gindara hi Jesus han mga sondalo ni Pilato ngadto han palasyo han gobernador ngan gin-alirongan hiya han bug-os nga hugpo han mga sondalo. Ginlubasan hiya han iya panapton ngan ginsul-otan hiya hin hilawig nga pula nga bado. Naghimo hira hin tunokon nga korona, iginbutang ini ha iya ulo, ngan ginpakapot hin sipak ha iya tuo nga kamot. Nagluhodluhod hira ha atubangan niya ngan nag-ooyan-oyan hira ha iya,

Katawhan: “Mabuhi an hadi han mga Judiyo!”

Parag-asoy: siniring hira. Ginludhan hiya ngan kinuha nira an sipak han iya kamot ngan ginbalbag an iya ulo. Kahuman na nira pag-oyan-oyan ha iya, ginlubas nira an hilawig nga bado, iginsul-ot an iya kalugaringon nga panapton, ngan gindara hiya ha gawas basi igraysang ha kros.

Han tigawas na hira han bungto, iginkatapo nira in tawo nga ginngaranan kan Simon nga taga Cirene, ngan ginpirit ini hiya nira hin pagpas-an han kros ni Jesus.

Inabot hira ha usa nga dapit nga ginngangaranan nga Golgota, nga an kahulogan, “An Dapit han Klabera.” Didto gintagan nira hi Jesus hin bino nga sinaktan hin apdo basi niya imnon. Kundi han pakatilaw ni Jesus, waray hiya uminom. Niyan iginraysang hiya nira ha kros ngan ginbahinbahin nira an iya mga panapton pinaagi hin ripa. Pagkatapos, liningkod hira ngan ginbantayan nira hiya. Iginpaskin nira ha igbaw han iya ulo an sinurat nga sumbong kontra ha iya: “Amo ini hi Jesus, an hadi han mga Judiyo.” Ngan iginraysang liwat nira ha kros in duha nga mga tulisan upod kan Jesus, an usa ha iya tuo ngan an usa ha iya wala. An mga tawo nga nangangagi nagpilingpiling han ira ulo ngan nagyubit kan Jesus hin pagsiring,

Katawha: “Ikaw man ngay-an an magruruba han Templo ngan magtitindog liwat hini sulod hin tulo ka adlaw! Pagtalwas na ha imo ngahaw kon Anak ka manggud han Dyos! Lusad dida ha kros!”

Parag-asoy: Ha amo man nga paagi ginyubitan hiya han mga puno han kapadian, han mga magturutdo han Balaod, ngan han katigurangan nga nasiring:

Katawhan: “Gintalwas niya an iba, kundi diri hiya nakakatalwas han iya kalugaringon! Diri ba hiya amo an hadi han Israel? Kon lumusad hiya yana ha kros, matoo kita ha iya! Nasarig hiya han Dyos ngan nasiring nga amo hiya an Anak han Dyos. Kitaon ta kon karuyag man han Dyos hin pagtalwas ha iya yana!”

Parag-asoy: Bisan pa ngani an mga tulisan nga iginraysang upod ha iya nagbiaybiay ha iya.

Han pagka-udto, nagsirom an bug-os nga tuna sulod hin tulo ka oras. Han mga alas tres na, ginoliat hi Jesus hin dako nga tingog,

Jesus: “Eli, Eli, lema sabachthani?” 

Parag-asoy: nga an karuyag sidngon, “Dyos ko, Dyos ko, kay ano nga ginpabay-an mo ako?” Nakabati ha iya an iba nga mga tawo nga nagkakatukdaw didto ngan nagsiring hira,

Katawhan: “Nagtatawag hiya kan Elias!”

Parag-asoy: Dinalagan dayon in usa ha ira, kinuha hin espongha nga hinumog hin bino, igintaod ini ha kataposan hin sipak, ngan iginhungit ngadto kan Jesus hin pagpainom ha iya. Kundi nagsiring an iba,

Katawhan: “Hulat anay, kikitaon ta kon kumanhi manggud hi Elias hin pagtalwas ha iya!”

Parag-asoy: Hin makusog nga tingog ginuliat hi Jesus, ngan nabunosan hiya han iya kinabuhi.

Alayon pagkaluhod. (Mamalandong hin madaliay.) Alayon pagkatukdaw.

Tigda la nga nagisi ha butnga an biray han Templo, tikang ha igbaw ngadto ha ubos. Nabay-og an tuna, nagkabubuka an mga bato, nagkaabre an mga lubnganan, ngan damo nga mga patay na nga magtinuohon han Dyos an nabanhaw. Ginawas hira han mga lubnganan; ngan katapos mabanhaw hi Jesus, kinadto hira han Syudad nga Baraan, ngan didto hinkit-an hira hin damo nga mga tawo.

Nahadlok an kapitan ngan an mga sondalo nga kaupod niya nga nagbabantay kan Jesus, han pag-abat nira han linog ngan pagkita nira han ngatanan nga nahinabo. Nagsiring hira,

Katawhan: “Matuod gud nga hiya amo an Anak han Dyos!”

_________

Dinhi natatapos an halipot nga pagbasa.

Parag-asoy: Damo in kababayen-an nga nagkikinita tikang ha hirayo. Nagsinunod ini hira kan Jesus tikang pa ha Galilea, ngan nagbulig ha iya. Upod ha ira, amo hira Maria Magdalena, Maria nga iroy nira Santiago ug Jose, ngan an asawa ni Sebedeo.

Han kulopay na, inabot in usa nga taga-Arimatea nga ginngaranan kan Jose. Usa hiya nga tinun-an ni Jesus. Nakigkita hiya kan Pilato ngan gin-aro niya an lawas ni Jesus. Nagsugo hi Pilato nga ihatag an lawas kan Jose. Sanglit gindara ni Jose an lawas ngan ginputos hin bag-o nga taklap nga lino. Iginbutang ini niya didto han iya kalugaringon nga lubnganan nga bag-o pa la nga gin-ukab dida hin bato. Niyan ginpakaliding niya in dako nga bato ngadto han ganggang hin pagtakop han porta han lubnganan, ngan linmakat hiya. Nakadto hira Maria Magdalena ngan an usa pa nga Maria, nalingkod ha atubangan han lubnganan.

Han pagkasunod nga adlaw, nga amo an Adlaw nga Iparahuway, nakigkita kan Pilato an mga puno han kapadian ngan an mga Parisiyo, ngan nagsiring hira,

Katawhan: “Nahinunumdom kami nga han buhi pa adto nga buwaon, nagsiring hiya, ‘Mababanhaw ako katapos hin tulo ka adlaw.’ Sanglit pabantayi hin maupay an lubnganan tubtob han ikatulo ka adlaw, basi diri makakadto an iya mga tinun-an pagkawat ha iya, ngan katapos, igpabantog nira ha mga tawo nga nabanhaw hiya. Ini nga orhe nga buwa labaw pa hin kamaraot kay han syahan.”

Parag-asoy: Ngan nagsiring hi Pilato ha ira,

Tawo: “Kuha kamo hin magbarantay ngan pabantayi ha iya hin maupay an lubnganan.”

Parag-asoy: Sanglit nagkalakat hira ngan basi masiguro nga waray gud maglabot han lubnganan, ira gintimrehan an lubnganan, ngan ginpabantayan pa.

An Ebanghelyo han Ginoo.