PAGBASA I
Dan 7:9-10, 13-14
Pagbasa tikang han Basahan ni Daniel nga manaragna.
Samtang nagkikinita ako, iginpahimutang in mga trono. Liningkod dida han usa han mga trono an Usa nga Daan Buhi tikang pa ha tinikangan. An iya panapton nabusag sugad hin gapas ngan an iya buhok lubos kabusag sugad hin barahibo hin karnero. Naglalahinggab hin kalayo an iya trono nga natungtong dida hin naglalaga nga mga kaliding, ngan nag-aawas tikang han trono in usa nga sapa hin kalayo. Nakadto in yinukotyukot nga mga tawo nga nag-alagad ha iya ngan naninindog ha atubangan niya in makalilisang kadamo nga mga tawo. Nagtikang an paghukom ngan ginbuklad an mga basahan.
Dida hini nga panan-awon ha gab-i, may-ada usa nga sugad hin tawo pagkit-on. Nagtitipakanhi hiya ha akon, ngan napuputos hiya hin mga dampog. Kinadto hiya han Usa nga Daan Buhi tikang pa ha tinikangan ngan iginpakilala hiya. Gintagan hiya hin pagburot-on, kadungganan, ngan hadianon nga gahom, basi makag-alagad ha iya an katawhan han ngatanan nga kanasoran ngan mga pinulongan. Magpapadayon hin waray kataposan an iya pagburot-an ngan diri gud matatapos an iya ginhadian.
An Pulong han Ginoo.
SALMO RESPONSORIO
Sal 97:1-2, 5-6, 9
℟. Hadi an Ginoo, an gihahataasi ha ngatanan nga tuna.
1. Hadi an Ginoo! Pagkalipay, tuna!
Kapupod-an ha dagat, pagkalipay na!
Magdakmol nga dampog nalibot ha iya;
matadong ug husto an paghadi niya.
℟. Hadi an Ginoo, an gihahataasi ha ngatanan nga tuna.
2. Natutunaw bisan adton kabukiran,
sugad hin taro ha iya atubangan;
kay amo gud hiya an Ginoo gudman,
an Ginoo han bug-os nga kalibutan.
Iginsasangyaw na hadton kalangitan
ha ngatanan adton iya katadongan;
ngan han mga nasod ini hinkikit-an.
An himaya niya kita han katawhan.
℟. Hadi an Ginoo, an gihahataasi ha ngatanan nga tuna.
3. Ginoo Makagarahum han Ngatanan,
labaw nga punoan hinin kalibutan;
larulabaw ka hin duro han ngatanan,
han ngatanan gud nga kadiyosdiyosan.
℟. Hadi an Ginoo, an gihahataasi ha ngatanan nga tuna.
PAGBASA I I
2 Ped 1:16-19
Pagbasa tikang han Ikaduha nga Surat ni San Pedro.
Hinigugma: Waray kami tumapod hin mga hinimohimo nga mga susumaton, han amon pagpahibaro ha iyo mahitungod han gamhanan nga pag-abot han aton Ginoo Jesu-Cristo. Hinkit-an han amon kalugaringon nga mga mata an iya pagkaharangdon. Nakadto kami han pagpasidunggi ngan paghimaya ha iya han Dyos nga Amay. Inabot ha iya an tingog nga tikang han Gilalabawi nga Himaya nga nagsiring, “Amo ini an akon hinigugma nga Anak nga akon nalipayan!” Hinbatian namon ngahaw ini nga tingog nga tikang ha langit, han upod kami niya dida han baraan nga bukid.
Sanglit labaw pa gud an amon pagtapod han mensahe nga iginpasangyaw han mga manaragna. Maghihingaupay kamo kon iyo ini pamatian hin maupay, kay sugad ini hin suga nga malamrag ha masirom nga dapit, tubtob han pagpunias han Adlaw han Ginoo ngan pagsirang ha iyo mga kasingkasing han bitoon ha kaagahon.
An Pulong han Ginoo.
EBANGHELYO
Tuig A [2026, 2029, 2032, 2035, 2038, 2041, 2044, 2047]
Mt 17:1-9
Pagbasa tikang han santos nga Ebanghelyo sumala kan Mateo.
Pag-agi hin unom ka adlaw igin-upod ni Jesus hi Pedro ngan an magbugto, hira Santiago ug Juan. Gindara niya hira ngadto hin hitaas nga bukid ug hira la didto. Samtang nagkikinita hira kan Jesus, nabalhin an iya panagway; nagmasilaw an iya bayhon sugad han adlaw ngan nagbusag an iya panapton sugad han kapawa. Niyan an tulo nga mga tinun-an kinita kanda Moises ug Elias nga nakikighimangraw kan Jesus. Nagsiring hi Pedro kan Jesus, “Ginoo, maupay nga hahani na la kita; kon maruyag ka, maghihimo ako dinhe hin tulo nga tulda: usa para ha imo, usa para kan Moises, ngan usa para kan Elias.” Han nagyiyinakan pa hiya, linambongan hira hin masilaw nga dampog, ngan nagsiring in tingog tikang han dampog, “Amo ini an akon kalugaringon nga Anak nga hinigugma, nga akon ikinalilipay. Pamatii niyo hiya!” Nagkahadlok gud an mga tinun-an han pakabati nira han tingog, ngan hinmapa hira ha tuna. Dinaop hi Jesus ngan ginkaptan hira. Nagsiring hiya, “Buhat! Ayaw kamo kahadlok!” Han paghangad nira, waray na nira hinkit-an labot kan Jesus.
Han paglugsong nira han bukid, gintugon hira ni Jesus, “Ayaw kamo pagsumat bisan kan kanay mahitungod hini nga iyo hinkit-an tubtob han kabanhaw han Anak han Tawo.”
An Ebanghelyo han Ginoo.
Tuig B [2027, 2030, 2033, 2036, 2039, 2042, 2045, 2048]
Mc 9:2-10
Pagbasa tikang han santos nga Ebanghelyo sumala kan Marcos.
Paglabay hin unom ka adlaw, sinagka hi Jesus hin hitaas nga bukid. Waray iba nga igin-upod niya labot kanda Pedro, Santiago ug Juan. Samtang nagkikinita hira, nabalhin an panagway ni Jesus. Nagsilaw an iya panapton ngan nagmabusag hin duro. Waray bisan hin-o dinhe ha tuna in makakapabusag hin sugad hini. Hinkit-an han tulo nga mga tinun-an nga nakikighimangraw kan Jesus hira Elias ug Moises. Nagsiring hi Pedro kan Jesus, “Magturutdo, maupay nga hahani na la kita. Maghihimo kami hin tulo nga tulda: usa ha imo, usa kan Moises, ngan usa kan Elias.” Tungod han kahadlok ni Pedro ngan han iba nga mga tinun-an, waray hira sabot han iya iginyakan. Linambongan hira hin dampog ngan hinbatian nira in tingog tikang ha dampog, “Amo ini an hinigugma ko nga Anak. Pamatii niyo hiya!” Nanginano hira dayon, kundi waray nira hinkit-an nga iba labot kan Jesus nga kaupod nira.
Han pagkalugsong nira han bukid nagtugon hi Jesus ha ira, “Ayaw kamo pagsumat bisan kan kanay han nakita niyo ngada han kabanhaw han Anak han Tawo.” Gintuman nira an iya tugon, kundi naggiparopakiana hira kon ano an karuyag sidngon han pagkabanhaw han mga minatay.
An Ebanghelyo han Ginoo.
Tuig C [2028, 2031, 2034, 2037, 2040, 2043, 2046, 2049]
Lc 9:28b-36
Pagbasa tikang han santos nga Ebanghelyo sumala kan Lucas.
Igin-upod niya hira Pedro, Juan, ug Santiago, ngan sinagka hira hin bukid para hin pag-ampo. Samtang nag-aampo hi Jesus, nag-iba an dagway han iya bayhon, ngan tungod hin kamasilaw, nagmabusag an iya panapton. Ha gilayon pinakita in duha ka tawo nga nakikighimangraw ha iya. Hira Moises ug Elias adto, nga pinakita dida ha langitnon nga himaya, ngan nakighimangraw kan Jesus mahitungod han paagi nga diri maiha magtutuman hiya han tuyo han Dyos, pinaagi han iya pagkamatay didto ha Jerusalem. Maupay gud an paghingaturog ni Pedro ngan han iya mga kaupod, kundi nagmata hira ngan nakakita han himaya ni Jesus ngan han duha nga mga tawo nga nagkakatukdaw upod ha iya. Han tibaraya na kan Jesus an mga tawo, nagsiring hi Pedro ha iya, “Agaron, maupay nga hahani kita. Maghihimo kami hin tulo nga mga tulda, usa para ha imo, usa para kan Moises, ngan usa para kan Elias.” (Waray gud hiya sabot han iya ginyiyinakan.) Samtang nagyiyinakan pa hiya, pinakita in usa nga dampog nga nakalambong ha ira; ngan nahadlok an mga tinun-an dida han pagtungod han dampog ha ira. Nagsiring in tingog tikang han dampog: “Amo ini an akon Anak nga akon pinili; pamatii hiya niyo!” Pag-ukoy na han tingog, nag-usaan na la hi Jesus. Ginhilom han mga tinun-an ini ngatanan, ngan hadto nga mga adlaw waray gud hira magsumat bisan kan kanay han ira hinkit-an.
An Ebanghelyo han Ginoo.