PAGBASA I
Heb 5:7-9
Pagbasa tikang han Surat ngadto han mga Hebreo.
Han nakanhi pa hiya ha tuna, nag-ampo ngan nangamuyo hi Jesus upod in makusog nga mga pagtangis ngan mga luha ngadto sa Dyos nga makakatalwas ha iya tikang han kamatayon. Tungod kay mapinaubsanon ngan buotan man hiya pinamatian hiya han Dyos. Kundi bisan kon Anak hiya han Dyos nahibaro hiya hin kamasinugtanon pinaagi han iya mga pag-antos. Han kahingpit na niya, nahimo hiya nga burabod han dayon nga katalwasan para hadton ngatanan nga masinugtanon ha iya.
An Pulong han Ginoo.
SALMO RESPONSORIO
Sal 31:2 & 3b, 3cd-4, 5-6, 15-16, 20
℟. Talwasa ako, Ginoo, dida han imo waray pagpapas nga paghigugma.
1. Nadangop ako ha imo, Ginoo, hin pagpanalipod;
ayaw gud itugot nga pagdag-on ako.
Dyos ka nga matadong,
talwasa ako, ako nag-aampo!
Pamatii ako! Talwasa ako yana!
Magin akon ka darangpanan hin pagpanalipod ha akon.
℟. Talwasa ako, Ginoo, dida han imo waray pagpapas nga paghigugma.
2. Akon panalipod hin pagtalwas ha akon.
Ikaw an akon arayopan ngan akon panalipod;
mandoi ngan pag-unhi ako sugad han imo iginsaad.
℟. Talwasa ako, Ginoo, dida han imo waray pagpapas nga paghigugma.
3. Talwasa ako han bitik nga gin-andam ha akon;
kay ikaw an akon darangpanan.
Ha imo kamot itinutubyan ko an akon espiritu.
Tatalwason mo ako, Ginoo;
matinumanon ka nga Dyos.
℟. Talwasa ako, Ginoo, dida han imo waray pagpapas nga paghigugma.
4. Kundi an akon pagsarig aada ha imo, O Ginoo;
ikaw an akon Dyos.
Dayuday ginmamangnoan mo ako;
talwasa ako han akon mga kaaway,
hadton mga nagtitimaraot ha akon.
℟. Talwasa ako, Ginoo, dida han imo waray pagpapas nga paghigugma.
5. Hin pagkaorosahon han mag-upay nga mga butang
nga imo gin-aandam para hadton
nagpapasidungog ha imo!
Maaram an ngatanan han imo pagkamaupay
sinasalipdan mo hin madig-on adton nasarig ha imo.
℟. Talwasa ako, Ginoo, dida han imo waray pagpapas nga paghigugma.
EBANGHELYO
Jn 19:25-27
Pagbasa tikang han santos nga Ebanghelyo sumala kan Juan.
Natukdaw hirani han kros ni Jesus hira iya nanay, an bugto nga babaye ni iya nanay, hi Maria nga asawa ni Cleopas, ngan hi Maria Magdalena. Hinkit-an ni Jesus hi iya nanay ngan an tinun-an nga iya hinigugma nga natukdaw harani han kros; sanglit nagsiring hiya kan iya nanay, “Babaye, iini an imo anak.” Ngan nagsiring hiya ngadto han tinun-an, “Iini an imo nanay.” Ngan tikang hadto gindara hiya han tinun-an hin pag-ukoy tampo han iya panimalay.
An Ebanghelyo han Ginoo.
Kon di’ man, ini nga ebanghelyo:
Lc 2:33-35
Pagbasa tikang han santos nga Ebanghelyo sumala kan Lucas.
Nanhipausa an amay ug iroy han bata han mga butang nga iginsiring ni Simeon mahitungod ha iya. Ginbendisyonan hira ni Simeon, ngan nagsiring hi Simeon kan Maria nga iroy han bata, “Ginpili han Dyos ini nga bata para han pagkapukan ngan han katalwasan hin damo ha Israel. Magigin tigaman hiya tikang sa Dyos nga pagsusupakon hin damo nga mga tawo, ngan tungod hini, ipadadayag niya an ira tinago nga mga panhunahuna. Ngan sasamaron sugad hin matarom nga espada an imo kasingkasing tungod hin kabido.”
An Ebanghelyo han Ginoo.