PAGBASA I
1 Cron 15:3-4, 15-16; 16:1-2
Pagbasa tikang han syahan nga Basahan han Cronicas.
Gintawag ni David an ngatanan nga mga tawo han Israel ngadto ha Jerusalem basi madara an Kahon han Ginsaaran ngadto han iya gin-andam nga dapit. Kasunod, ginpasugoan niya an mga tulin ni Aaron ug an mga Levita.
Ginpasag an Kahon han Ginsaaran han mga Levita sumala han sugo han Ginoo kan Moises. Ginsugo ni David an mga pangulo han mga Levita hin pagpili hin mga Levita nga magkakanta ug magtotokar han mga arpa ug gimbal.
Gindara nira an Kahon han Ginsaaran ngadto ha sakob han tulda nga gin-andam ni David. Nagdara hira hin mga halad nga tutuboron ug mga halad hin pagkaurosa ngadto han Dyos. Kahuman ni David pagtubod han mga halad, ginbendisyonan niya an mga tawo ha ngaran han Ginoo.
An Pulong han Ginoo.
SALMO RESPONSORIO
Sal 132:6-7, 9-10, 13-14
℟. Ginoo, pakadto han dapit han imo pahuwayan, ikaw ug an arka han imo pagkabaraan.
1. Ha Betlehem amon ito hinbatian,
hiunong han Kahon hadton Ginsaaran.
Ngan amon gihapon ito hin-agian,
didto han kan Jaar mga kapatagan.
Amon iginsiring, “Aton na kadtoon,
adton urokyanan han Ginoo naton;
ngan didto aton na hiya pagsingbahon,
atubangan han iya trono gihapon!”
℟. Ginoo, pakadto han dapit han imo pahuwayan, ikaw ug an arka han imo pagkabaraan.
2. Igsangyaw na unta han im’ kapadian,
nga magtaralwas ka han imo katawhan.
Manggogliat unta nga may kalipayan
hira adton imo katawhan ngatanan!
Tungod gud kan David, iginsaad
nimo ngadto gud ha iya nga surugoon mo.
Ayaw isalikway, ayaw pahirayo,
han im’ pinili nga hadi, O Ginoo!
℟. Ginoo, pakadto han dapit han imo pahuwayan, ikaw ug an arka han imo pagkabaraan.
3. An Sion man an ginpili han Ginoo,
karuyag gud niya an pag-ukoy didto:
“Amo ini an dayon nga urokyan ko,
dinhe’n karuyag ko nga maghadi ako.”
℟. Ginoo, pakadto han dapit han imo pahuwayan, ikaw ug an arka han imo pagkabaraan.
PAGBASA II
1 Cor 15:54b-57
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Sanglit kon mahinabo na ini nga an may pagkadunot mabalhin na ngadto hin waray pagkadunot, ngan an may-ada kamatayon ngadto hin waray na kamatayon, matutuman na an siring han Kasuratan: “Nabungkag na an kamatayon; hingpit na an pagdarag-an!” “Hain na, kamatayon, an imo pagdarag-an? Hain na, kamatayon, an imo kamalara?” An kamalara han kamatayon natikang han sala, ngan an gahom han sala natikang han Balaod. Kundi salamat han Dyos nga naghatag ha aton han pagdarag-an pinaagi han aton Ginoo Jesu-Cristo!
An Pulong han Ginoo.
EBANGHELYO
Lc 11:27-28
Pagbasa tikang han santos nga Ebanghelyo sumala kan Lucas.
Kahuman ni Jesus pagyakan hini, may nagyakan nga babaye dida han kadam-an ngan nagsiring ha iya, “Pagkapalaran han babaye nga nag-anak ngan nagpasuso ha imo!” Kundi binmaton hi Jesus, “Lugod pagkapalaran hadton mga namamati ngan nagtutuman han pulong han Dyos!”
An Ebanghelyo han Ginoo.