PAGBASA I
Am 5:14-15, 21-24
Pagbasa tikang han Basahan ni Amos nga manaragna.
Talinguhaa an pagbuhat han matadong ngan diri han maraot, basi mabuhi kamo. Niyan maupod ha iyo hin tinuod an Ginoo nga Dyos nga Labi Kamakagarahum, sumala han iyo siring. Pagdumti an maraot, higugmaa an maupay, ngan parig-ona an katadongan didto han mga hukmanan. Bangin malooy an Ginoo ha mga tawo hini nga nasod nga nanhisalin pa nga buhi.
Nasiring an Ginoo, “Nadiri ako han iyo mga pyesta, makuri ko na mailob ini! Kon maghalad kamo han iyo mga hayop nga tinubod ngan mga halad nga pagkaon, diri ako makarawat hini. Diri ako makarawat han mga mananap nga iyo ginpatambok, nga gindadara nga halad ngadi ha akon. Pahunonga na an iyo mag-aringasa nga mga kanta; diri ako karuyag mamati han iyo mga arpa. Paawasa lugod niyo an katadongan sugad hin sapa ngan an pagkamatadong sugad hin salog nga diri gud nagmamara.
An Pulong han Ginoo.
SALMO RESPONSORIO
Sal 50:7, 8-9, 10-11, 12-13, 16bc-17
℟. Ipapakita ko an pagtalwas han Ginoo ha mga magtadong nga mga tawo.
1. Pamati, o akon mga tawo,
ngan magyayakan ako;
magpapamatuod ako kontra ha imo, Israel.
Amo ako an Dyos nga iyo Dyos.
℟. Ipapakita ko an pagtalwas han Ginoo ha mga magtadong nga mga tawo.
2. Diri ako nagsasaway ha iyo
tungod han iyo mga tinubod nga unong,
ngan han mga tinubod nga halad
nga ha dayuday iyo gindadara ha akon.
Diri ako nagkikinahanglan
hin mga todo nga baka tikang han iyo kaumhan
o kakandingan tikang han iyo mga panon.
℟. Ipapakita ko an pagtalwas han Ginoo ha mga magtadong nga mga tawo.
3. Kay akon man an ngatanan
nga kamanampan ha kagurangan
pati an kabakahan ha yinukot nga kapungtoran.
Akon an ngatanan nga katamsihan ha kalangitan,
ngan an ngatanan nga buhi
nga mga binuhat ha kaumhan.
℟. Ipapakita ko an pagtalwas han Ginoo ha mga magtadong nga mga tawo.
4. Kon gutomon ako, diri ko ikaw pagsusumatan,
kay an kalibutan ngan an ngatanan
nga aada hini, akon man.
Nakaon ba ako han karne hin kabakahan
o mainom han dugo hin kakandingan?
℟. Ipapakita ko an pagtalwas han Ginoo ha mga magtadong nga mga tawo.
5. Kay ano nga ginpapamatbat niyo an akon mga sugo?
Kay ano nga ginhihimangraw niyo an akon ginsaaran?
Nadiri kamo nga pagsawayan ko kamo;
iginsisikway niyo an akon mga sugo.
℟. Ipapakita ko an pagtalwas han Ginoo ha mga magtadong nga mga tawo.
PAGBASA II
Mt 8:28-34
Pagbasa tikang han santos nga Ebanghelyo sumala kan Mateo.
Han pag-abot ni Jesus ha tabok han lanaw, ha tuna han mga taga-Gadara, gintapo hiya hin duha ka tawo nga tikang han mga lubnganan. Sinasangkayan hira hin yawa, ngan mga magisog, sanglit waray nagpapasipara hin pag-agi hadto nga dalan. Sininggit hira dayon, “Ano an imo karuyag ha amon, Anak han Dyos? Kinanhi ka ba hin pagkastigo ha amon nga diri pa man igo nga panahon?” May dako nga panon hin kababoyan nga naniningaon hirani hini nga dapit. Nakimalooy kan Jesus an mga yawa, “Kon pagagawson mo man kami, pasudla kami ngadto hito nga panon hin kababoyan.” Ginsiring hira ni Jesus, “Kadto na kamo.” Sanglit ginawas hira ngan sinulod han kababoyan. Tigda nga nagdadlagan an bug-os nga panon han kababoyan ngadto ha ligid han umpas, nagkahuglog ngadto ha lanaw, ngan nagkalulumos. Nagdadlagan an mga magmarangno han kababoyan, ngan pag-abot nira ha bungto, iginsumat an ngatanan ngan an nahinabo han mga tawo nga sinasangkayan hin yawa. Sanglit nagkagawas an ngatanan nga tawo han bungto hin pagtapo kan Jesus; ngan han paghikit-i nira ha iya nakimalooy hira nga bumaya hiya han ira tuna.
An Ebanghelyo han Ginoo.