PAGBASA I
Amos 9:11-15
Pagbasa tikang han Basahan ni Amos nga manaragna.
Nasiring an Ginoo, “Maabot an adlaw nga ipapahiuli ko an ginhadian ni David, nga sugad hin balay nga naruba. Pag-aaydon ko an mga pader hini ngan ipapahiuli ko ini. Titindogon ko na liwat ini ngan hihimoon ko nga sugad han kadaan. Sanglit sasakopon han mga tawo han Israel an nahisalin nga tuna han Edumea ngan an ngatanan nga mga nasod nga akon sakop hadto anay.” Amo ini an siring han Ginoo nga magburuhat hini. “Maabot an adlaw,” nasiring an Ginoo, “nga magmamalaksi an pagtubo han mga trigo nga diri ini maaakos han mga mag-arani, ngan magmamalaksi an pagtubo han mga ubas nga diri ini maaakos hin paghimo han bino. Maturo hin matam-is nga bino an kabukiran, ngan mag-aawas hini an kapungtoran. Ibabalik ko an akon mga tawo ngadto han ira tuna. Pagtitindogon na liwat nira an ira mga syudad nga nagkaruruba ngan mag-uokoy hira didto. Magtatanom hira hin mga urubasan ngan manginginom hira han bino. Maghihimo hira hin mga tanaman ngan mangangaon hira han mga bunga. Igtatanom ko an akon mga tawo dida han tuna nga iginhatag ko ha ira, ngan diri na gud hira paggagaboton.” An Ginoo nga iyo Dyos an nagyakan.
An Pulong han Ginoo.
SALMO RESPONSORIO
Sal 85:9ab & 10, 11-12, 13-14
℟. An Ginoo nagpasamwak hin kalinaw ha iya bungto.
1. Namamati ako han kanan Dyos mga pulong,
nga nasaad hin kalinaw ug kadait ha aton.
Waray ruhaduha hin pagtalwas hiya andam,
hadton nahatag ha iya hin kadungganan;
ngan aanhi an iya katalwasan,
magpapabilin ha aton katunaan.
℟. An Ginoo nagpasamwak hin kalinaw ha iya bungto.
2. Magtatapo an gugma ug an kamatinumanon,
maghahangkopay an kalinaw ug an kamatadong;
Tikang ha tuna an kamatinumanon,
tikang ha langit an pagpamatadong.
℟. An Ginoo nagpasamwak hin kalinaw ha iya bungto.
3. An Ginoo an magpapauswag ha aton,
ngan mahatag an tuna hin hura nga aranihon.
Mag-uuna han Ginoo an pagkamatadong,
ngan mag-aandam han dalan para ha aton.
℟. An Ginoo nagpasamwak hin kalinaw ha iya bungto.
EBANGHELYO
Mt 9:14-17
Pagbasa tikang han santos nga Ebanghelyo sumala kan Mateo.
Dinaop kan Jesus an mga sakop ni Juan nga Parabunyag ngan nagpakiana, “Kay ano nga agsob magpuasa kami ngan an mga Parisiyo, kundi diri man nagpupuasa an imo mga tinun-an?” Binaton hiya, “Magmamasulob-on ba an mga dinapit ngadto hin pakasal samtang upod pa nira an lalake nga kinasal? Diri gud! Kundi maabot an panahon nga mabaya ha ira an kinasal nga lalake, ngan amo na an pagpuasa nira. “Waray nagamit hin bag-o nga dugnit para hin pagtangkop hin daan nga panapton; kay nakakagisi han daan nga panapton in sugad nga tangkop, ngan mahiluag lugod an tarangkopan. Waray liwat naipis hin bag-o nga bino ngadto hin daan na nga anit nga surudlan. Kon buhaton ini, mabuburit an surudlan, kay magigisi man an anit, ngan makakarag an bino. Lugod, isinusulod an bag-o nga bino ngadto hin bag-o nga anit nga surudlan ngan waray may nakakarag.”
An Ebanghelyo han Ginoo.