PAGBASA I
Zac 9:9-10
Pagbasa tikang han Basahan ni Zacarias nga manaragna.
Pagrayhak, pagrayhak, mga tawo han Sion! Goliat hin kalipay, kamo nga mga tawo han Jerusalem! Tan-awa, naabot an iyo hadi ngada ha iyo! Naabot hiya nga madinaogon ngan daogan, kundi mapinaubsanon ngan nasakay dida hin asno—dida hin usa nga nati hin asno. Nasiring an Ginoo, “Kukuhaon ko tikang ha Israel an mga karuwahe, ngan kukuhaon ko tikang ha Jerusalem an kakabayohan. Pamamarion ko an mga pana nga ginamit didto ha pag-awayan. An iyo hadi makikigsabot hin kalinaw dida han mga nasod; maghahadi hiya ha pataboktabok han kadagatan, tikang han salog Eufrates ngadto han kasidsiran han tuna.”
An Pulong han Ginoo.
SALMO RESPONSORiO
Sal 145:1-2, 8-9, 10-11, 13-14
℟. Magdadayaw ako han imo ngaran ha kadayunan, O Dyos, amon hadi.
1. Isangyaw ko ikaw, O Dyos, ngan hadi ko,
magpapasalamat hin dayon ha imo.
Adlaw-adlaw magpapasalamat ako,
hin waray paghunong ikaw dayawon ko.
℟. Magdadayaw ako han imo ngaran ha kadayunan, O Dyos, amon hadi.
2. An Ginoo mahigugmaon, maloloy-on,
mahinay masina, may gugma nga dayon.
Maupay ha tanan hiya nga Ginoo,
ha tanan binuhat napaid hin husto.
℟. Magdadayaw ako han imo ngaran ha kadayunan, O Dyos, amon hadi.
3. Tanan nga im’ mga binuhat, Ginoo,
mananagdayaw gud ngatanan ha imo.
Ngan pagpapasalamatan ka na hadto,
han ngatanan gud nga imo mga tawo.
An kaharangdon han imo ginhadian
amo gud an ira paghihimangrawan.
Ira igsusumat ngadto han ngatanan
an imo kakusgan, imo kagamhanan.
℟. Magdadayaw ako han imo ngaran ha kadayunan, O Dyos, amon hadi.
4. An im’ ginhadian magpapadayon man,
maghahadi ka hin waray kataposan.
Iya saad, Ginoo matinumanon,
ngan tangkod han iya mga buruhaton.
Iya binubuligan an nagugupong,
an ginraogdaog iya binabangon.
℟. Magdadayaw ako han imo ngaran ha kadayunan, O Dyos, amon hadi.
PAGBASA II
Rom 8:9, 11-13
Pagbasa tikang han Surat ni San Pablo ngadto han mga taga Roma.
Mga kabugtoan: Kundi diri na kamo nabubuhi sumala han mando han iyo lawasnon nga kinaiya, kundi han espirituhanon—kon ha tinuod nag-uokoy dida ha iyo an Espiritu han Dyos. Adton waray Espiritu ni Cristo, diri sakop ni Cristo. Kon naguukoy dida ha iyo an Espiritu han Dyos nga nagbanhaw kan Jesus, hiya nga nagbanhaw kan Cristo mahatag hin kinabuhi ha iyo mga lawas nga may kamatayon pinaagi han iya Espiritu nga aada ha iyo. Sanglit, kabugtoan ko, may-ada naton katungdanan nga mabuhi kita diri ha pagsunod han karuyag han aton lawasnon nga kinaiya. Kay kon mabuhi kamo sumala han iyo lawasnon nga kinaiya, mapatay kamo, kundi mabubuhi kamo kon patayon niyo an iyo salaan nga mga binuhatan pinaagi han Espiritu.
An Pulong han Ginoo.
EBANGHELYO
Mt 11:25-30
Pagbasa tikang han santos nga Ebanghelyo sumala kan Mateo.
Hito nga panahon nagsiring hi Jesus, “O Amay, Ginoo han langit ngan han tuna! Nagpapasalamat ako ha imo, kay imo iginpahayag hadton mga tapang an imo gintago ha mga mag-aram ug may-ada hibaro. Tinuod, Amay ko, nahimo ini tungod han imo kalugaringon nga pagbuot ug karuyag. “Iginhatag ha akon han akon Amay an ngatanan nga mga butang. Waray makilala han Anak labot han Amay, ngan waray makilala han Amay labot han Anak, ngan hadton karuyag han Anak nga magpadayag han Amay.
“Kadi kamo ha akon, ngatanan kamo nga ginugul-an hin pagdara han iyo mabug-at nga mga paras-anon, ngan tatagan ta kamo hin pahuway. Kuhaa an akon yugo ngan ibutang dida ha iyo, ngan pagtuon kamo ha akon kay malumo ako ngan mapinaubsanon ha kasingkasing; ngan hiaagian niyo an pagpahuway. Kay masayon an yugo nga ihinahatag ko ha iyo, ngan magaanay an darad-on nga ipapapas-an ko ha iyo.”
An Ebanghelyo han Ginoo.