PAGBASA I
Os 2:16, 17c-18, 21-22
Pagbasa tikang han Basahan ni Oseas nga manaragna.
Sanglit dadad-on ko na liwat hiya ngadto han kamingawan; didto lulukmayon ko hiya hin mga pulong hin paghigugma. Ig-uuli ko ha iya an iya mga urubasan ngan hihimoon ko nga aragian hin paglaom an Kahamub-an hin Kakurian. Mabaton hiya ha akon didto sugad han iya pagbaton han batan-on pa hiya, han pag-abot niya tikang ha Ehipto. Niyan tatawgon na liwat ako niya nga iya bana—diri na gud ako niya tatawgon nga iya Baal.
Israel, hihimoon ko ikaw nga akon asawa; diri na ako maglilingo ngan magbibinuwa ha imo. Ipapakita ko ha imo an dayuday nga paghigugma ngan pagkalooy, ngan aangkonon ko ikaw ha kadayonan.
An Pulong han Ginoo.
SALMO RESPONSORIO
Sal 145:2-3, 4-5, 6-7, 8-9
℟. An Ginoo maloloy-on ug mahigugmaon.
1. Adlaw-adlaw magpapasalamat ako,
hin waray paghunong ikaw dayawon ko.
Pagkadako gudman niya nga Ginoo,
angay hiya pagdayawon hin tutoo.
Diri gud masantop iya pagkadako,
labaw pa gud han ngatanan kahibaro.
℟. An Ginoo maloloy-on ug mahigugmaon.
2. An ngatanan gud nga imo binuhatan
pagdadayawon ha tanan katuigan.
Dagkong’ mga buhat mo igsasangyaw man
han sunod-sunod nga mga katulinan.
Imo kagamhanan ngan pagkaharangdon
hadton mga tawo paghihimangrawon.
Akon dudumdumon, pamamalandungon,
mga binuhatan mo nga urosahon.
℟. An Ginoo maloloy-on ug mahigugmaon.
3. Paghihimangrawon buhat mo’ng gamhanan,
ngan im’ pagkadako ak' igsasangyaw man.
Igsusumat nira'n imo kaupayan,
hiunong han im' kalooy kakantahan.
℟. An Ginoo maloloy-on ug mahigugmaon.
4. Ginoo mahigugmaon, maloloy-on,
mahinay masina, may gugma nga dayon.
Maupay ha tanan hiya nga Ginoo,
ha tanan binuhat napaid hin husto.
℟. An Ginoo maloloy-on ug mahigugmaon.
PAGBASA II
Mt 9:18-26
Pagbasa tikang han santos nga Ebanghelyo sumala kan Mateo.
Han nagyayakan pa hi Jesus hini, hinarani ha iya in usa nga Judiyo, linuhod ha iya atubangan, ngan naghangyo: “Kamamatay pa la yana han akon anak nga babayehay, kundi upod gad ha akon ngan ipadapat an imo kamot ha iya, ngan mabubuhi hiya.” Sanglit, binuhat hi Jesus ngan sinunod ha iya ngan inupod ha iya an iya mga tinun-an. May usa nga babaye nga gindidinogoan sulod hin dose na ka tuig, ngan pinaluyo hiya kan Jesus. Kinamkam niya an sidsid han bado ni Jesus. Nagsiring hiya ha iya kalugaringon, “Kon makakamkam la ako han iya bado, mauupay gud ako.” Liningi hi Jesus ngan hinkit-an niya an babaye, ngan ginsiring niya, “Ayaw kahadlok, anak! Nakaupay ha imo an imo pagtoo.” Ngan dida dayon naupay an babaye.
Sanglit, kinadto hi Jesus ha balay han opisyal. Han pakakita niya han mga magtotokar para han paglubong ngan han nagkarigumok nga mga tawo, nagsiring hiya, “Kagawas kamo ngatanan! Diri patay an bata; nakaturog la hiya!” Ngan gintinawaan hiya nira. Han pagkagawas la han mga tawo, sinulod hi Jesus han kwarto han babayehay, kinaptan ni Jesus an kamot han bata, ngan binuhat an bata. Ngan nahisangyaw ini nga nahinabo ha ngatanan nga dapit didto hito nga tuna.
An Ebanghelyo han Ginoo.