PAGBASA I
Is 6:1-8
Pagbasa tikang han Basahan ni Isaias nga manaragna.
Dida han tuig nga namatyan ni Hadi Oseas hinkit-an ko an Ginoo. Nalingkod hiya dida han iya trono nga hitaas ngan mahimayaon, ngan an iya kapa nakaluob han bug-os nga Templo. Natukdaw palibot ha iya in maranggat nga mga binuhat, nga may tag-unom nga mga pako an kada usa. An duha nga pako natahob han bayhon han kada usa nga binuhat, ngan duha liwat nga pako natahob han lawas niya, ngan an duha pa liwat nga pako ginagamit niya hin paglupad. Nagbabatonbaton hira: “Baraan, baraan, baraan! Baraan an Ginoo nga Labi Kamakagarahum! An iya himaya nakakapuno ha kalibutan.” Nakabay-og han patukoranan han Templo an ira mga tingog ngan napuno hin aso an Templo.
Nagsiring ako, “Waray na ako paglaom. Kamakalolooy ko kay salaan an tagsa nga pulong nga nagawas han akon mga im-im ngan nag-uokoy ako tampo hin mga tawo nga salaan an tagsa nira nga pulong. Ngan bisan pa ngani, hini hinkit-an ko han akon kalugaringon nga mga mata an Hadi nga Ginoo nga Labi Kamakagarahum!” Niyan linupad ngadi ha akon in usa han mga binuhat. Nagdara hiya hin baga nga iya kinuha tikang han altar pinaagi hin kimpit.
Dinapatan niya han naglalaga nga baga an akon mga im-im ngan nagsiring, “Dinapat ini han imo mga im-im, ngan yana nakuha na an imo kasal-anan ngan ginpasaylo na an imo mga sala.”
Niyan hinbatian ko an Ginoo nga nasiring, “Hin-o an akon susugoon? Hin-o an amon magigin magsarangyaw?” Binaton ako, “Ako an makadto! Sugoa ako!”
An Pulong han Ginoo.
SALMO RESPONSORIO
Sal 93:1ab, 1cd-2, 5
℟. Hadi an Ginoo; hiya binadoan hin pagkaharangdon.
1. Hadi an Ginoo!
Hiya binadoan hin pagkaharangdon
ngan hin pagkakusgan.
℟. Hadi an Ginoo; hiya binadoan hin pagkaharangdon.
2. Diri mababantad inin kalibutan,
iginpahimutang gud ha kadig-onan.
Im’ trono, Ginoo, tindog na nga daan,
nga marig-on tikang pa ha tinikangan.
San-o magtikang an mga katuigan,
ikaw nakada na ha kamaihaan.
℟. Hadi an Ginoo; hiya binadoan hin pagkaharangdon.
3. O Ginoo, an imo mga balaod,
waray pagkabantad nagpapadayon gud;
ngan an imo Templo baraan nga gayod,
ha kadayonan gud baraan matuod.
℟. Hadi an Ginoo; hiya binadoan hin pagkaharangdon.
EBANGHELYO
Mt 10:24-33
Pagbasa tikang han santos nga Ebanghelyo sumala kan Mateo.
Nagsiring hi Jesus han iya mga apostol, “Waray tinun-an nga labaw han iya magturutdo; waray oripon nga labaw han iya agaron. Sanglit angay malipay an tinun-an kon makatupong hiya han iya magturutdo, ngan an oripon kon makatupong hiya han iya agaron. Kon tawgon nga Beelsebul an pangulo han panimalay, pagngangaranan hin labaw pa gud kamangil-ad an iya mga sakop!
“Sanglit ayaw kamo kahadlok han mga tawo. Bubuksan an bisan ano nga tinahoban, ngan igpapahayag an tagsa nga tinago. Kinahanglan igyakan niyo liwat ha kapaw-an an igsusumat ko ha iyo ha kasisidman, ngan kinahanglan igpasangyaw niyo tikang ha mga atop an nabatian niyo hin hilom. Ayaw kamo kahadlok han makakamatay han lawas, kundi diri makakamatay han kalag; asay lugod kahadloki niyo an Dyos nga makakamatay han kalag ngan han lawas didto ha impyerno. Usa ka sentabo an igpapalit niyo hin duha nga balinsasayaw kundi waray usa nga balinsasayaw nga nahuhulog ha tuna kon diri pagbuot han Amay niyo. An ha iyo nga bahin, gin-ihap na bisan ngani an ngatanan nga mga buhok han iyo ulo. Sanglit ayaw kamo kahadlok; mahal pa kamo kaupay kay hin damo nga mga balinsasayaw! Aangkonon ko man ha atubangan han akon Amay ha langit an bisan hin-o nga magpadayag ha kadam-an nga akon hiya. Kundi iglilirong ko man ha atubangan han akon Amay ha langit an bisan hin-o nga maglirong ha kadam-an nga akon hiya.”
An Ebanghelyo han Ginoo.