PAGBASA I
Os 14:2-10
Pagbasa tikang han Basahan ni Oseas nga manaragna.
Balik ngadto han Ginoo ngan ighalad niyo ha iya ini nga pag-ampo: “Pasayloa kami han ngatanan nga amon mga sala ngan karawta an amon pag-ampo, ngan pagdadayawon ka namon sumala han amon iginsaad. Diri gud makakatalwas ha amon an Asiria ngan diri makakapanalipod ha amon an mga kabayo hin pakig-away. Diri na gud kami masiring han amon mga diyosdiyos nga amon hira Dyos. O Ginoo, ipakita an imo kalooy hadton waray na gud iba nga sadang kadangpan.” Nasiring an Ginoo, “Pababalikon ko ngadi ha akon an akon mga tawo. Hihigugmaon ko hira hin kinasingkasing; diri na ako masisina ha ira. Para han mga tawo han Israel masusugad ako hin uran dida hin mamara nga tuna. Manmumuswak hira sugad hin mga bukad; manggagamot hira hin marig-on sugad han kakahoyan han Libano. Mabubuhi hira hin bag-o nga pagtubo, ngan magmamatahom sugad hin mga kahoy nga olibo. Magmamahamot hira sugad han mga sidro han Libano. Mag-uokoy na liwat hira ha ubos han akon pagpanalipod. Magtatanom hira ha ira mga uma, ngan magmamabungaon sugad hin urubasan. Masusugad hira kabantogan han bino han Libano.
Diri na manginginlabot hin mga diyosdiyos an mga tawo han Israel, babatonon ko an ira mga pag-ampo ngan mamangnoan ko hira. Sugad hin marampag nga kahoy pasisirongon ko hira; amo ako an burabod han ngatanan nira nga mga kaupayan.”
Masayod unta adton mga makinaadmananon han iginsurat dinhe ngan matugkad unta nira ini. Magtadong an mga paagi han Ginoo ngan nabubuhi an magtadong nga mga tawo pinaagi hin pagsunod hini, kundi mahipapakdol ngan matutumba an mga makasasala kay ginpapasibay-an ini nira.
An Pulong han Ginoo.
SALMO RESPONSORIO
Sal 51:3-4, 8-9, 12-13, 14 & 17
℟. Magpapasangyaw an akon baba han imo pagdayaw.
1. Kalooyi gad ako, O Dyos,
tungod han imo dayuday nga paghigugma.
Tungod han imo dako nga pagkalooy
paraa an akon mga sala!
Hugasi an ngatanan ko nga karat-an
ngan linisi ako han akon sala!
℟. Magpapasangyaw an akon baba han imo pagdayaw.
2. Pagkatangkod ug kamatuoran
an imo ginkikinahanglan;
pun-a an akon hunahuna han imo kinaadman.
uhaa an akon sala, ngan magmamalinis ako;
hugasi ako, ngan magmamabusag ako labaw pa hin gapas.
℟. Magpapasangyaw an akon baba han imo pagdayaw.
3. Linisi an akon kasingkasing, O Dyos,
ngan pagbag-ohi ako hin
mapinadayonon nga espiritu.
Ayaw ako isikway ha imo atubangan,
ngan ayaw kuhaa ha akon
an imo baraan nga espiritu.
℟. Magpapasangyaw an akon baba han imo pagdayaw.
4. Ipahioli ha akon an kalipay
han imo katalwasan,
ngan andama ako hin pagsugot ha imo.
Buligi ako pagyakan, O Ginoo,
ngan pagdadayawon ko ikaw.
℟. Magpapasangyaw an akon baba han imo pagdayaw.
EBANGHELYO
Mt 10:16-23
Pagbasa tikang han santos nga Ebanghelyo sumala kan Mateo.
Nagsiring hi Jesus han iya mga apostoles, “Pamati kamo! Sinusugo ko kamo sugad hin mga karnero ngadto ha panon hin mga lubo. Sanglit kinahanglan mag-ikmat kamo sugad hin mga halas ngan magmalumo kamo sugad hin sarapati. Pagbantay kamo kay may mga tawo nga magdadakop ngan magdadara ha iyo ngadto ha hukmanan, ngan paglalatobon kamo nira didto ha ira mga sinagoga. Pagdadad-on kamo ha atubangan han mga punoan ngan mga hadi tungod ha akon, hin pagsangyaw han Maupay nga Sumat ha ira ngan ha mga Hentil. Kon pagdad-on kamo ha hukmanan, ayaw kabaraka mahitungod han iyo igyayakan o kon uunanhon niyo hin pagyakan; kay pag-abot han panahon, tututdoan kamo han iyo igyayakan. Kay diri iyo an mga pulong nga igyayakan niyo, kundi tikang han Espiritu han Amay niyo nga magyayakan ha iyo. “Igtutubyan han mga tawo an ira kalugaringon nga kabugtoan basi patayon hira, ngan amo ngahaw an bubuhaton han mga amay ha ira mga anak; maato an mga anak han ira mga kag-anak ngan ipapapatay hira. Pagdudumtan kamo han ngatanan tungod ha akon, kundi matatalwas an magpailob tubtob ha kataposan. Kon pagpakurian kamo ha usa nga bungto, palagiw ngadto hin lain nga bungto. Nasiring ako ha iyo nga diri pa mahuhuman an iyo buruhaton ha ngatanan nga kabungtohan han Israel, maabot na an Anak han Tawo.”
An Ebanghelyo han Ginoo.