PAGBASA I
Is 55:10-11
Pagbasa tikang han Basahan ni Isaias nga manaragna.
Nagsiring an Ginoo, “Sugad an akon pulong han esno ug han uran, nga nahuhulog tikang ha langit hin pagtubig han tuna. Pinapatubo hini an mga tanom nga nahatag hin binhe para han parauma, hin pagtanom ngan hin pagkaon para han mga tawo. Sanglit amo man an pulong nga akon ginyayakan—magtutuman manta han akon ipinapagbuhat; pagbubuhaton gud hini an ngatanan nga diri gud mapapakyas.
An Pulong han Ginoo.
SALMO RESPONSORiO
Sal 65:10, 11, 12-13, 14
℟. An binhi nahulog ha maupay nga tuna ngan hinatag hin bunga.
1. Pagpaid han tuna im’ pinapakita,
pinaagi hin pagpauran ha ira;
amo ini an nag-aabuno manta,
ngan nagpapatambok hadton mga tuna.
Ginpupuno mo'n tubig an mga sapa,
nga ha tuna imo ginpahimutang na;
amo ini hira an nagpapabunga,
hin damo nga abot hadton mga tuna.
℟. An binhi nahulog ha maupay nga tuna ngan hinatag hin bunga.
2. Imo tinatagan hin uran nga damo;
adton mga kaumhan nga inarado,
ngan ha tubig ginpapahuroman nimo.
Ngan an tuna imo man ginpapalumo,
hadton tarahiti, nga tinuroturo;
hadton mga gahi amo'n napatubo.
℟. An binhi nahulog ha maupay nga tuna ngan hinatag hin bunga.
3. Ngan hin hura nga babrion an hatag mo!
Tanan nga dapit nga im' kinakadtoan,
nagkakamay-ada mga kahuraan;
Puno’ mga panon adton panabsaban,
puno hin pagrayhak adton kapungtoran.
℟. An binhi nahulog ha maupay nga tuna ngan hinatag hin bunga.
4. Kakarnerohan nagpuno han kaumhan,
puno man hin trigo mga kahamub-an;
nagoliat ngan narayhak an ngatanan,
ngan nagkakaranta nga may kalipayan.
℟. An binhi nahulog ha maupay nga tuna ngan hinatag hin bunga.
PAGBASA II
Rom 8:18-23
Pagbasa tikang han Surat ni San Pablo ngadto han mga taga Roma.
Mga kabugtoan: Gin-isip ko nga an mga gin-aantos naton hini nga panahon diri gud sadang mahitanding han himaya nga ipadadayag ha aton. An ngatanan nga mga binuhat naghuhulat upod in malaomon nga paghingyap nga igpapadayag han Dyos an iya mga anak. Kay ginhukman ha karat-an nga mawaray hinungdan an ngatanan nga mga binuhat, diri ha ira kalugaringon nga karuyag, kundi tungod nga pagbuot ini han Dyos. Kundi nagpabilin an paglaom: nga may adlaw nga matatalwas an mga binuhat ngahaw tikang han ira pagkaoripon hin pagkadunot ngan makakaangbit han mahimayaon nga kagawasan han mga anak han Dyos. Kay maaram kita nga ngada yana nga panahon nag-aaraba hin kasakit an ngatanan nga mga binuhat, sugad hin babaye nga tipag-aranak. Kundi diri an mga binuhat la; pati kita nga kinarawat na han Espiritu sugad nga syahan han mga hatag han Dyos, nag-aaraba liwat ha aton kalugaringon samtang naghuhulat kita kon san-o kita hihimoa han Dyos nga iya mga anak, ngan kon san-o liwat an aton hingpit nga katalwasan.
An Pulong han Ginoo.
EBANGHELYO
Mt 13:1-23
[Mt 13:1-9]
Pagbasa tikang han santos nga Ebanghelyo sumala kan Mateo.
[Hito manta nga adlaw binaya hi Jesus han balay, ngan kinadto ha tabi han lanaw, diin liningkod hiya hin pagtutdo. Duro hin kadamo han mga tawo nga nag-alirong ha iya, sanglit sinakay hiya hin sakayan ngan didto liningkod hiya, samtang an mga tawo nagkatukdaw ha baybayon. Ginamit hiya hin mga pananglitan hin pagtutdo ha ira. “May usa ka tawo nga kinadto ha uma hin pagsabod. Han pagsabod niya han binhe, may-ada nahulog ha dalan, ngan inabot in mga tamsi ngan pinanuktok an mga binhe. Nagkahuglog an iba nga binhe ngada hin batoon nga dapit nga manipis la an tuna. Nanurok dayon kay manipis man la an tuna. Kundi han pagsirak na han adlaw, pinasoan adto nga bag-o nga mga tanom, ngan nagkalalaya dayon kay waray man makapanggamot hin maupay. Nagkahuglog an iba nga binhe ngada hin tunokon nga kabanwaan; pagtubo han kabanwaan natabonan an mga tanom. Kundi may nagkahuglog nga mga binhe ngada hin maupay nga tuna, ngan namunga: may-ada namunga hin usa kagatos (100) ka pilo, kaunoman (60) ka pilo an iba, ngan an iba katloan (30) ka pilo.” Ngan siniring hi Jesus, “Sanglit pamati kamo, kon may-ada niyo durunggan!”]
Dinaop kan Jesus an mga tinun-an ngan nagpakiana ha iya, “Kay ano ngan nagamit ka man hin mga pananglitan kon nagyayakan ka ha ira?” Binaton hiya, “Iginhatag ha iyo an paghibaro han mga tinago han Ginhadian han langit, kundi waray ini ihatag ha ira. Kay an may-ada na tatagan pa, basi mamay-ada niya labaw pa han iya kinahanglan; kundi an tawo nga waray, kukuhaon, bisan ngani an gutiay nga aada ha iya. Amo ini an katadongan han akon paggamit hin mga pananglitan kon nagyayakan ako ha ira: kay natan-aw hira, kundi diri nakakakita, ngan namamati hira, kundi diri nakakabati o nakakasabot. Sanglit iginpahinungod ha ira an panagna ni Isaias: ‘Bisan unanhon niyo hin pamati; diri kamo makakasabot; bisan unanhon niyo pagtinan-aw, diri kamo makakakita, kay matig-a an ulo hini nga mga tawo, ngan ira ginsagpo an ira mga talinga, ngan ginpiyong an ira mga mata. Kay diri hira buot makakita, ngan diri hira buot makabati, kay bangin kon makasabot hira, makabalik hira ha akon, nasiring an Dyos, ngan tatambalon ko hira.’
“Kundi kamo, hin kapalaran niyo! Kay nakakakita an iyo mga mata ngan nakakabati an iyo mga durunggan. Tigamni ini: damo nga mga manaragna ngan damo nga mga tawo han Dyos in karuyag pagkita han iyo kinikita, kundi waray hira makakita, ngan karuyag pagbati han iyo hinbatian kundi waray hira makabati.
“Sanglit pamati ngan hibaroi niyo an kahulogan han pananglitan han magsarabod. Adton nakabati han mensahe mahitungod han Ginhadian sugad hira han binhe nga nahulog ha dalan, kundi waray makasabot hini. Inabot an Yawa ngan gin-agaw an iginsabod dida ha ira. An binhe nga nahulog ha batoon nga tuna, amo an mga tawo nga nakarawat nga malipayon han mensahe ha pakakabati nira hini. Kundi waray ini makagamot hin maupay dida ha ira, ngan diri nag-iiha. Sanglit ha pag-aabot hin mga kakurian ngan mga kasakitan tungod han mensahe, nabaya dayon hira. An binhe nga nahulog ha tunokon nga kabanwaan amo an mga tawo nga namamati han mensahe, kundi nalulumos ini nga mensahe han mga kabaraka mahitungod hini nga kinabuhi ngan han paghigugma han mga manggad, ngan diri hira nabunga. Ngan an binhe nga iginpugas ha maupay nga tuna amo an mga tawo nga namamati ngan nakakasabot han mensahe. Namumunga hira, may nabunga hin usa kagatos (100) ka pilo, kaunoman (60) ka pilo an iba, ngan an iba, katloan (30) ka pilo.”
An Ebanghelyo han Ginoo.