PAGBASA I
Is 26:7-9, 12, 16-19
Pagbasa tikang han Basahan ni Isaias nga manaragna.
O Ginoo, imo ginhahawanan an agian para han mag-upay nga mga tawo; patag an dalan nga ira ginlalaktan. Ginsusunod namon an imo kaburot-on ngan naglalaom kami ha imo; ikaw gudla an amon inuungara. Naghihingyap ako ha imo ha bug-os ko nga kasingkasing kon gab-i; kon paghukman mo an tuna ngan an mga tawo mahibabaroan nira ngatanan an katadongan. O Ginoo, ihatag ha amon in kauswagan; an ngatanan nga amon nahihimo, bunga ini han imo ginbubuhat.
O Ginoo, ginkastigo mo an imo mga tawo ngan ha kasakitan nag-ampo hira ha imo. Ikaw, O Ginoo, an nagpatangis ha amon, sugad nga nagtatangis ha kasakit in babaye nga tipag-aranak. Naglubag kami hin kasakit, kundi waray namon igin-anak. Waray kami nadaog para han amon tuna; waray gud kami nahimo. Mabubuhi gihapon adton amon mga tawo nga nagkamatay! Mababanhaw an ira mga lawas! An ngatanan nga nangangaturog didto han ira mga lubnganan magmamata ngan magkakanta tungod hin kalipay! Sugad nga an yamog nakakapatugnaw han tuna, pagbubuhion man han Ginoo adton mga maiha na nga nagkamatay.
An Pulong han Ginoo.
SALMO RESPONSORIO
Sal 102:13-14ab & 15, 16-18, 19-21
℟. Tikang ha langit tinamod an Ginoo nganhi ha tuna.
1. Kundi ikaw, Ginoo, hadi nga dayon,
mga katulinan ha imo manunumdom.
Ikaw mabangon ngan napaid han Sion,
kay inmabot gihapon ini nga panahon;
hin paghatag han imo kalooy ha iya,
amo na gud ini an igo nga takna.
Minahal hiya han mga surugoon nimo,
bisan kon human na hiya mapuo;
maloloy-on hira gihapon ha iya,
bisan kon ginbayaan hiya nga guba.
℟. Tikang ha langit tinamod an Ginoo nganhi ha tuna.
2. Mahahadlok han Ginoo an kanasoran,
ngan han iya gahom adton kahadian.
Kon tindogon na an Sion nga bungto,
ipapadayag an iya pagkadako.
Iya na gud nga pamamatian,
adton ginpabay-an nga iya katawhan.
Diri na gud niya pagpapakabungolan,
adton ira mga pag-ampo ngatanan.
℟. Tikang ha langit tinamod an Ginoo nganhi ha tuna.
3. Isurat kanan Ginoo binuhatan,
para han tiarabot nga katulinan;
basi an waray pa matawo nga katawhan,
ha iya man liwat magdayaw ngatanan.
An tuna han Ginoo gintinangboan,
tikang hadton dapit niya nga baraan;
tikang didto dayuday niya ginkikinitaan,
an tuna ha ubos han mga katawhan.
Tungod nga karuyag niya hibatian,
mga araba didto ha bilanggoan;
pagtalwas gud hadton mga sinirotan,
han kamatayon nga ira dadangatan.
℟. Tikang ha langit tinamod an Ginoo nganhi ha tuna.
EBANGHELYO
Mt 11:28-30
Pagbasa tikang han santos nga Ebanghelyo sumala kan Mateo.
Nagsiring hi Jesus, “Kadi kamo ha akon, ngatanan kamo nga ginugul-an hin pagdara han iyo mabug-at nga mga paras-anon, ngan tatagan ta kamo hin pahuway. Kuhaa an akon yugo ngan ibutang dida ha iyo, ngan pagtuon kamo ha akon kay malumo ako ngan mapinaubsanon ha kasingkasing; ngan hiaagian niyo an pagpahuway. Kay masayon an yugo nga ihinahatag ko ha iyo, ngan magaanay an darad-on nga ipapapas-an ko ha iyo.”
An Ebanghelyo han Ginoo.