PAGBASA I
Is 1:10-17
Pagbasa tikang han Basahan ni Isaias nga manaragna.
Mga tawo han Jerusalem, an iyo mga punoan ngan an iyo mga tawo sugad hadton mga taga Sodoma ug Gomora. Pamatii an igyayakan ha iyo han Ginoo. Pamatii an igtututdo ha iyo han aton Dyos. Nasiring hiya, “Naghuhunahuna ba kamo nga naruruyag ako hini ngatanan nga mga halad nga iyo gintutubod para ha akon? Sinusumhan na ako han mga karnero nga iyo gintutubod nga mga halad, ngan han mga tambok han iyo mag-upay nga mga hayop. Inuuyaman na ako han dugo han mga todo nga baka, mga karnero, ngan mga kanding.”
“Hin-o ba an naghangyo ha iyo nga dad-on ha akon ini ngatanan kon makanhi kamo hin pagsingba ha akon? Hin-o an naghangyo ha iyo hini nga pagpasipara dinhe han akon Templo? Waray la gamit an pagdara han iyo mga halad. Ikinangangalas ko an baho han insyenso nga iyo gintutubod. Diri na ako nakakailob han iyo mga Pyesta han Subang nga Bulan, han iyo mga Adlaw nga Iparahuway, ngan han iyo siringbahon nga katirok, nahugawan ini ngatanan han iyo mga sala. Napupungot ako han iyo mga Pyesta han Subang nga Bulan ngan baraan nga mga adlaw; paras-anon ini nga ginugul-an na ako hin pagdinara. Kon bayawon niyo an iyo mga kamot ha pag-ampo, diri ako magkikita ha iyo. Magkadiano kadamo an iyo pag-ampo, diri ako mamamati, kay puros dugo an iyo mga kamot. Paglinis kamo. Paukya na ini ngatanan nga magraot nga akon nakikita nga iyo ginbubuhat. Tinuod, ukoy na kamo hin pagbuhat hin maraot, ngan pag-aram kamo hin pagbuhat hin maupay. Tinguhaa nga pagbuhaton an katadongan—buligi an mga gintatalumpigos, tagi han ira mga katungod an mga ilo, ngan panalipdi an mga balo nga kababayen-an.”
An Pulong han Ginoo.
SALMO RESPONSORIO
Sal 50:8-9, 16bc-17, 21 & 23
℟. Ha mga magtadong ipapakita ko an gahum han Dyos nga nakakatalwas.
1. Diri ako nagsasaway ha iyo
tungod han iyo mga tinubod nga unong,
ngan han mga tinubod nga halad
nga ha dayuday iyo gindadara ha akon.
Diri ako nagkikinahanglan
hin mga todo nga baka tikang han iyo kaumhan
o kakandingan tikang han iyo mga panon.
℟. Ha mga magtadong ipapakita ko an gahum han Dyos nga nakakatalwas.
2. “Kay ano nga ginpapamatbat niyo an akon mga sugo?
Kay ano nga ginhihimangraw niyo an akon ginsaaran?
Nadiri kamo nga pagsawayan ko kamo;
iginsisikway niyo an akon mga sugo.
℟. Ha mga magtadong ipapakita ko an gahum han Dyos nga nakakatalwas.
3. Ginbuhat niyo ini ngatanan
ngan waray la ako magyakan,
sanglit naghunahuna kamo
nga pareho la ako ha iyo.
Kundi yana ginsasaway ko kamo
ngan nagsusumbong ako ha atubangan niyo.
An pagpasalamat amo an tinubod nga unong
nga nagpapasidungog ha akon,
ngan tatalwason ko gud
an ngatanan nga nagsusugot ha akon.”
℟. Ha mga magtadong ipapakita ko an gahum han Dyos nga nakakatalwas.
EBANGHELYO
Mt 10:34—11:1
Pagbasa tikang han santos nga Ebanghelyo sumala kan Mateo.
Nagsiring hi Jesus han iya mga apostol, “Ayaw kamo paghunahuna nga kinanhi ako pagdara hin kalinaw ha kalibutan; diri kalinaw an gindara ko, kundi espada. Kinanhi ako pagtugpo han mga anak nga kalalaken-an kontra han mga amay nira, han mga anak nga kababayen-an kontra han mga iroy nira, han mga umagad nga kababayen-an kontra han mga ugangan nira nga kababayen-an. An makaharadlok gud nga mga kaaway han tawo amo an mga sakop ngahaw han iya kalugaringon nga panimalay.
“Diri takos ha akon an nahigugma han amay o iroy niya labaw ha akon; diri takos ha akon an nahigugma han iya mga anak labaw ha akon. Diri takos ha akon an diri magpas-an han iya kros ngan diri magsunod ha akon. An karuyag magtipig han iya kinabuhi ini mawawara ha iya; kundi an kawad-an han iya kinabuhi tungod ha akon mabubuhi lugod.
“An bisan hin-o nga nakarawat ha iyo nakarawat ha akon; ngan an bisan hin-o nga nakarawat ha akon nakarawat liwat han nagsugo ha akon. An bisan hin-o nga nakarawat han sinugo han Dyos, tungod kay sinugo hiya han Dyos maangbit han balos nga kakarawaton han sinugo; ngan an bisan hin-o nga nakarawat hin tawo nga maupay, tungod kay maupay hiya maangbit man han balos nga kakarawaton hin maupay nga tawo. Ngan tigamni ini: an bisan hin-o nga magpainom hin tubig nga mahagkot han giuubosi hini nga akon mga sakop, tungod nga akon hiya sakop makarawat manta han iya balos.”
Katapos pagtugona ni Jesus an iya dose nga mga tinun-an, binaya hiya hadto nga dapit ngan kinadto hin pagtutdo ngan pagwali ha mga higrani nga bungto.
An Ebanghelyo han Ginoo.