PAGBASA I 

Is 7:1-9

Pagbasa tikang han Basahan ni Isaias nga manaragna.

Han paghadi han Juda ni Hadi Acas nga anak ni Jotam ngan apo ni Oseas, ginsulong an Jerusalem nira Rezin nga hadi han Siria, ngan hi Peka nga anak ni Remalias, nga hadi han Israel, kundi waray hira pakarikupo han Jerusalem. Han kasumati han hadi han Juda nga nakadto na han katunaan han Israel an mga kasondalohan han Siria, duro an kahadlok han hadi ngan han ngatanan niya nga mga tawo nga nangurog hira sugad hin kakahoyan nga nababay-og kon nahangin.

Nagsiring an Ginoo kan Isaias, “Dad-a hi Sear Yasub nga imo anak ngan tapoa hi Hadi Acas. Hiaagian mo hiya dida han dalan nga gintratrabahoan han mga parahablon hin panapton, didto han kataposan han kali nga inaawasan han tubig tikang han iraya ngalinaw. Sidnga hiya nga magtagam, maghilom la, ngan diri mahadlok o mabaraka. Sugad la han aso hin duha nga tikaurupos hin kaugtang nga sungo ngan diri makababaraka an kasina ni Hadi Rezin ngan han iya mga Siriahanon, ngan ni Hadi Peka. Nakahunahuna hin paglarang hin mabudhion an Siria upod an Israel ngan an iya hadi. Nakahunahuna hira hin pagsulong han Juda, hin paghadlok han mga tawo basi umugop ha ira, ngan hin paghimo nga hadi han anak ni Tabeel.

“Kundi ako nga Ginoo an nasiring nga diri gud ini mahinanabo. Kay ano? Kay diri makurukusog an Siria kon itanding han Damasco nga kapital nga syudad hini, ngan diri makurukusog an Damasco kay kan Hadi Rezin. Mahitungod han Israel, sulod hin kaunoman kaglima (65) ka tuig uraura ini kaguba ngan diri na matindog ini nga usa nga nasod. Diri makurukusog an Israel kay han Samaria nga kapital nga syudad hini, ngan diri makurukusog an Samaria kay kan Hadi Peka.

An Pulong han Ginoo.

SALMO RESPONSORIO

Sal 48: 2-3a, 3b-4, 5-6, 7-8

℟. Ginbabantayan han Dyos an iya bungto ha kadayunan.

1. An Ginoo hin pagkabantogan gudman,

dayaw ha iya hin dako kinahanglan;

nga ha syudad han aton Dyos pagtitikang,

didto han iya gud pungtod nga baraan.

Hin pagkahitaas ngan pagkamatahom,

hadton bukid han Dyos.

℟. Ginbabantayan han Dyos an iya bungto ha kadayunan.

2. Sion, syudad ini hadton hadi nga bantogan,

nga naglilipay han bug-os kalibutan.

Kanan hini nga Dyos iginpakita na,

nga waray kataragman kon upod ha iya;

dit’ ha sakob hadton mga salipdanan,

nga amo an kanan syudad arayopan.

℟. Ginbabantayan han Dyos an iya bungto ha kadayunan.

3. Nagkatitirok an mga kanasoran,

pagsulong han Sion, bukid nga baraan;

Han ira pagkit-i, ira naburongan,

hira nagkahadlok, largo pandadlagan.

℟. Ginbabantayan han Dyos an iya bungto ha kadayunan.

4. Didto hito hira hin kulba inalpan,

hin baga kahadlok ngan hin kasakitan.

Sugad hin babaye nga tipag-aranak,

daw hin mga barko hin bagyo gindagmak.

℟. Ginbabantayan han Dyos an iya bungto ha kadayunan.

EBANGHELYO    

Mt 11:20-24

Pagbasa tikang han santos nga Ebanghelyo sumala kan Mateo.

Niyan gintunglo ni Jesus an mga bungto diin ginbuhat niya an kaurog han iya mga milagro, kay waray man bumaya an mga tawo han ira mga sala. “Kairo nimo, Corasin! Kairo man liwat nimo, Betsaida! Kon an mga milagro nga ginbuhat dida ha iyo didto pa pagbuhata ha Tiro ngan ha Sidon, maiha na unta an mga tawo didto nga nagsusul-ot hin sako ngan nagsaribo hin agbon ha ira mga ulo, hin pagpakita nga binaya na hira han ira mga sala. Sanglit, hinumdomi nga ha Adlaw han Paghukom, labaw pa nga malolooy an Dyos han mga tawo han Tiro ug Sidon kay ha iyo! Ngan ikaw Capernaum, karuyag mo ba nga bayawon ka ngadto ha langit? Ilalabog ka ha impyerno! Kay kon didto pa pagbuhata ha Sodoma an mga milagro nga ginbuhat dida ha imo, matindog pa unta ini nga bungto yana. Sanglit, hinumdomi nga ha Adlaw han Paghukom, labaw pa nga malolooy an Dyos han Sodoma kay ha imo!”

An Ebanghelyo han Ginoo.