PAGBASA I
Is 10:5-7, 13b-16
Pagbasa tikang han Basahan ni Isaias nga manaragna.
Nagsiring an Ginoo, “Asiria! Gagamiton ko an Asiria sugad hin balbag hin pagkastigo hadton akon mga nasisinahan. Ginsugo ko an Asiria hin pagsulong hin nasod nga diri natoo hin diyos, hin mga tawo nga nag-aghat ha akon hin kasina. Ginsugo ko hira hin panikas, pangawat, ngan pagtamaktamak han mga tawo sugad hin lamsaw dida han kakalsadahan.” Kundi an hadi nga Asiriahanon may-ada nahuhunahunaan nga magpintas nga mga larang. Naglarang hiya hin pagbungkag hin damo nga mga nasod.
“Makusog, makinaadmananon, ngan listo ako. Ginpara ko an mga pag-ultan hin mga nasod ngan ginkuha ko an mga manggad nga ira ginhimos. Sugad hin todo nga baka gintamaktamakan ko an mga tawo nga nag-uokoy didto. Sugad hin salag hin tamsi an mga nasod han kalibutan. Waray ako pagkuri hin pagkuha han ira mga manggad sugad nga masayonay in panguha hin mga bunay hin tamsi. Waray gud bisan usa nga tamsi nga nagbuklad han iya pako nga nagpalapaka hin pako, nagnganga ngan nagpiyaik hin paghadlok ha akon!”
Kundi nasiring an Ginoo, “Makakasiring ba in usa nga parakol nga larulabaw hiya hin kagamhanan kay han tawo nga nagamit hini? Labaw pa ba ka importante in usa nga lagadi kay han tawo nga nagamit han lagadi? Diri an balbag an nag-aalsa hin tawo, kundi an tawo an nag-aalsa hin balbag. Magpapadara an Ginoo nga Labi Kamakagarahum han sakit basi pagkastigohon niya adton mga mag-upay an panlawas yana. Dida ha ira dayuday magdidilaab in kalayo.”
An Pulong han Ginoo.
SALMO RESPONSORIO
Sal 94:5-6, 7-8, 9-10, 14-15
℟. Diri mabaya an Ginoo ha iya bungto.
1. Katawhan mo dinudugmok, O Ginoo,
ginsasakit nira ngatanan nga imo.
Ginpapatay nira mga ilo, balo,
ngan mga langyaw nga dinhe pagpupuyo.
℟. Diri mabaya an Ginoo ha iya bungto.
2. Ngan amo man ini'n ginyayakan nira,
“An Ginoo diri ha aton nakita;
an Dyos han Israel, diri manta hiya
nga makakasabot han ginbubuhat ta!”
Katawhan ko, ano hin katapang niyo?
San-o pa ba kamo nga mahibabaro?
℟. Diri mabaya an Ginoo ha iya bungto.
3. Dyos an naghimo han mata ug talinga;
diri ba mabati hiya ngan makita?
Hadton mga nasod hiya magmarangno,
Di’ ba hiya ha ira magkakastigo?
Hiya magturutdo han tanan nga tawo,
sanglit di’ ba hiya an mahibabaro?
℟. Diri mabaya an Ginoo ha iya bungto.
4. Bunyog an Ginoo han iya katawhan,
mga sakop niya diri bubulagan.
Magmamatadong na liwat an hukmanan,
ngatanan magtadong ito uogopan.
℟. Diri mabaya an Ginoo ha iya bungto.
EBANGHELYO
Mt 11:25-27
Pagbasa tikang han santos nga Ebanghelyo sumala kan Mateo.
Hito nga panahon nagsiring hi Jesus, “O Amay, Ginoo han langit ngan han tuna! Nagpapasalamat ako ha imo, kay imo iginpahayag hadton mga tapang an imo gintago ha mga mag-aram ug may-ada hibaro. Tinuod, Amay ko, nahimo ini tungod han imo kalugaringon nga pagbuot ug karuyag. Iginhatag ha akon han akon Amay an ngatanan nga mga butang. Waray makilala han Anak labot han Amay, ngan waray makilala han Amay labot han Anak, ngan hadton karuyag han Anak nga magpadayag han Amay.”
An Ebanghelyo han Ginoo.