PAGBASA I
Miq 2:1-5
Pagbasa tikang han basahan ni Miqueas nga manaragna.
Hin kamakaharadlok para hadton nahigda nga nagmiminata ngan nagpipinanhunahuna hin maraot! Kon aga na, kon may-ada na nira higayon, binubuhat nira dayon an maraot nga ira nahunahunaan. Kon naruruyag hira hin mga uma, inaagaw ini nira; kon naruruyag hira hin mga balay, kinukuha ini nira; waray panimalay o hiagi nga diri nira paglabtan kon ira karuyagon. Sanglit nasiring an Ginoo, “Naglalarang ako hin pagdaot ha iyo, ngan diri kamo makakalikay hini. Mahingangadto kamo ha kasamokan ngan diri na kamo maglalakat nga mapahitas-on.
Kon umabot na ito nga panahon, gagamiton han mga tawo an susumaton mahitungod ha iyo sugad nga pananglitan hin karat-an, ngan pagkakantahon nira ini nga kanta hin pagturaw hiunong han iyo kaagi: Napuo na gud kita! Ginkuha na han Ginoo an aton tuna, ngan iginhatag ini niya ngadto hadton mga nagbihag ha aton.” Sanglit kon umabot na an panahon nga ig-uli na an tuna ngadto han mga tawo han Ginoo, mawawaray bahin an bisan hin-o ha iyo.
An Pulong han Ginoo.
SALMO RESPONSORIO
Sal 10:1-2, 3-4, 7-8, 14
℟. Ginoo, ayaw hingalimti an mga kablas.
1. O Ginoo, ano nga hirayo ka man,
Ngan natago ha takna hin kakurian?
Gindaot an kablas han mapahitas-on,
ha ira mga bitik, hira dadakpon.
℟. Ginoo, ayaw hingalimti an mga kablas.
2. Naghahambog adton maraot nga tawo,
tungod han magraot nga iya mga gusto;
nagtatamay ngan nasikway han Ginoo,
adton mga tawo nga halot hin duro.
Yawan-on nga tawo diri nagdidipara,
mahitungod hadto nga Ginoo niya;
ha iya parayaw naghunahuna,
nga an Dyos ha iya waray hinungdan la.
℟. Ginoo, ayaw hingalimti an mga kablas.
3. Puno hin pagdaot an iya pamulong,
mga panarhog ug pulong nga buwaon;
madagmit magyakan hin madinumtanon,
ngan magraot gud iya mga yayaknon.
Natago hiya ngahaw ha mga baryo,
hin paggama hin waray sala nga mga tawo.
Didto iya hira ginbibinantayan,
basi an makalolooy ira hidakpan.
℟. Ginoo, ayaw hingalimti an mga kablas.
4. Sayod ka han kasamok ug kakurian,
ngan pirme ka gud la andam hin pagtabang.
An makalolooy ha imo natubyan;
an kablas pirme nimo ginbubuligan.
℟. Ginoo, ayaw hingalimti an mga kablas.
EBANGHELYO
Mt 12:14-21
Pagbasa tikang han santos nga Ebanghelyo sumala kan Mateo.
Nagkalakat an mga Parisiyo ngan nagsarabot hin pagpatay kan Jesus.
Han pakabati ni Jesus mahitungod hini nga maraot nga hunahuna kontra ha iya, binaya hiya hadto nga dapit ngan sinunod ha iya in damo nga mga tawo. Gintambal niya an ngatanan nga magsakit, ngan gindid-an hira hin pagsumat han iba mahitungod ha iya, basi matuman an ginsiring han Dyos pinaagi kan Isaias nga manaragna:
“Iini an akon surugoon nga akon ginpili, an akon hinigugma nga akon nalilipayan. Ibubutang ko ha iya an akon Espiritu, ngan ipapasangyaw niya an akon paghukom ngadto han ngatanan nga mga nasod. Kundi diri hiya makikiglantugi o magoliat, diri ngani mamumulong hin dako nga tingog dida ha kadalanan. Diri hiya magbabari hin malubay nga tangbo, o maghuhuyop hin tikapaparong nga lampara. Magpapadayon hiya tubtob nga makapadaog hiya han katadongan; ngan paglalaoman hiya han ngatanan nga mga katawhan.”
An Ebanghelyo han Ginoo.