PAGBASA I
Is 38:1-6, 21-22, 7-8
Pagbasa tikang han Basahan ni Isaias nga manaragna.
Hadto nga panahon nasakit ngan haros mamatay hi Hadi Ezequias. Kinadto hi manaragna Isaias nga anak ni Amoz hin pakigkita ha iya ngan pagsiring, “Nasiring an Ginoo nga kinahanglan husayon mo an imo panimalay kay diri ka na mag-uupay. Pag-andam na la ikaw hin kamatay.” Liningi hi Ezequias ngadto han bungbong ngan nag-ampo:
“Hinumdomi, O Ginoo, nga nag-alagad ako nga matinumanon ngan maunongon ha imo, ngan dayuday gintinguha ko hin pagbuhat han imo kaburot-on.” Niyan nagtangis ngan nagnguyngoy hiya hin mapait.
Niyan ginsugo hi Isaias han Ginoo hin pagbalik ngadto kan Ezequias ngan pagsiring ha iya, “Nakabati ako nga Ginoo nga Dyos ni David nga imo ginikanan han imo pag-ampo ngan hinkit-an ko an imo mga luha; tutugotan ko ikaw nga mabuhi ka pa hin kinse ka tuig. Tatalwason ko ikaw ngan ini nga syudad han Jerusalem tikang han emperador han Asiria, ngan padadayonon ko an pagpanalipod han syudad.”
Ginsiring ni Isaias an hadi nga pagtamposan an iya hubag hin tampos nga hinimo tikang hin mga igos, ngan mag-uupay hiya. Niyan pinakiana hi Hadi Ezequias, “Ano man an tigaman nga magpapamatuod nga makakahimo ako hin pagkadto han Templo?”
Binaton hi Isaias, “Tatagan ka hin tigaman han Ginoo nga magpapamatuod nga tutumanon niya an iya saad. Dida han hagdan nga gintindog ni Hadi Acas paiisolon han Ginoo an lambong hin napulo ka pitad.” Ngan inmisol an lambong hin napulo ka pitad.
An Pulong han Ginoo.
SALMO RESPONSORIO
Is 38:10, 11, 12abcd, 16
℟. Gintalwas mo an akon kinabuhi, Ginoo;
diri ako mapatay.
1. An akon pakasabot
nga mapatay ako dida ha akon pagkabatan-on
ngan makadto na ako han kalibutan han mga patay,
ngan diri na gud ako mabubuhi.
℟. Gintalwas mo an akon kinabuhi, Ginoo;
diri ako mapatay.
2. An akon pakasabot nga dida hini
nga kalibutan han mga buhi
Diri na ako igkakakita han Ginoo
O hin bisan hin-o nga buhi nga tawo.
℟. Gintalwas mo an akon kinabuhi, Ginoo;
diri ako mapatay.
3. Nautod ngan natapos an akon kinabuhi,
Sugad hin tulda nga ginbulkas,
Sugad hin dugnit nga gintabas
tikang hin usa nga hablonan.
An akon pakasabot nga gintapos na han Dyos an akon kinabuhi.
℟. Gintalwas mo an akon kinabuhi, Ginoo;
diri ako mapatay.
4. O Ginoo, an akon kinabuhi para na ha imo,
para ha imo gudla!
Ibalik an akon maupay nga panlawas
Ngan ipadayon an akon kinabuhi.
℟. Gintalwas mo an akon kinabuhi, Ginoo;
diri ako mapatay.
EBANGHELYO
Mt 12:1-8
Pagbasa tikang han santos nga Ebanghelyo sumala kan Mateo.
Waray pag-iha, naglatas hi Jesus han kaumhan hin trigo ha Adlaw nga Iparahuway. Ginutom an iya mga tinun-an, sanglit nagtikang hira pangutos han mga uhay han trigo ngan pangaon han mga tipasi. Han pakakita hini han mga Parisiyo, nagsiring hira kan Jesus, “Kitaa daw, supak ha aton Balaod an ginbubuhat han imo mga tinun-an ha Adlaw nga Iparahuway!” Binaton hi Jesus, “Waray ba kamo makabasa han ginbuhat ni David dida nga ginutom hiya ngan an iya mga kaupod? Sinulod hiya han balay han Dyos ngan kinaon hiya ngan an iya mga kaupod han tinapay nga iginhalad sa Dyos, bisan kon supak han Balaod nga mangaon hira hadto nga tinapay kay an mga padi la an tinutugotan hin pagkaon hini nga halad. Waray ba niyo mabasa ha Balaod ni Moises nga ha kada iparahuway nga adlaw nagtatalapas an mga padi han Templo han balaod mahitungod han Adlaw nga Iparahuway, kundi diri man hira nakakasala? Nasiring ako ha iyo nga may-ada dinhe labaw pa han Templo. Nasiring an kasuratan, ‘Diri ko karuyag in mga mananap nga halad, kundi an pagkalooy.’ Kon nakasabot la kamo han karuyag sidngon hini, diri konta niyo ginhuhukman an mga tawo nga waray sala. Kay Ginoo han Adlaw nga Iparahuway an Anak han Tawo.”
An Ebanghelyo han Ginoo.