PAGBASA I
Jer 2:1-3, 7-8, 12-13
Pagbasa tikang han Basahan ni Jeremias nga manaragna.
Ginsiring ako han Ginoo hin pagsangyaw hini nga mensahe ngadto han ngatanan nga mga tawo didto ha Jerusalem: “Nahinunumdom ako han imo pagkamatinumanon han batan-on ka pa, han imo paghigugma ha akon han bag-o pa kita nga mag-asawa; ginsunod mo ako didto han kamingawan, didto hin tuna nga waray pa pagtamni. Israel, ako gud la an nagtag-iya ha imo; ikaw an akon baraan nga hiagi. Akon ginpadad-an hin pag-antos ngan kakurian an ngatanan nga nagraogdaog ha imo. Ako nga Ginoo an nagyakan.”
Gindara ko hira ngadto hin usa nga malangbo nga tuna, basi magpahimulos hira han mga abot ngan han iba pa nga mga kaupayan. Kundi ginbungkag lugod nira an akon tuna; ginhugawan nira an nasod nga iginhatag ko ha ira. Waray magpakiana an kapadian, ‘Hain na an Ginoo?’ Waray kumilala ha akon an kalugaringon ko nga kapadian. Sinupil ha akon an mga punoan; naghimangraw ha ngaran ni Baal an mga manaragna, ngan nagsingba hin waray pulos nga mga diyosdiyos.
Sanglit ginbay-og ko an langit upod an kahadlok, basi maburong ngan mahipausa hira, kay nakasala an akon mga tawo hin duha nga mga sala: binayaan nira ako, an burabod hin puraw nga tubig; ngan nag-ukad hira hin mga surudlan hin tubig, nga buong nga mga surudlan nga diri gud nakakabiaw hin tubig.
An Pulong han Ginoo.
SALMO RESPONSORIO
Sal 36:6-7ab, 8-9, 10-11
℟. Ikaw an burabod han kinabuhi, Ginoo.
1. Ginoo, an imo dayuday nga paghigugma
naabot ngadto ha kalangitan,
an imo kamatinumanon ngadto ha panganuron.
An imo pagkamatadong nananawantawan
sugad han kabukiran;
an imo paghukom sugad
han mga kahiladman han dagat.
℟. Ikaw an burabod han kinabuhi, Ginoo.
2. Hin pagkamahal, O Dyos,
han imo dayuday nga paghigugma!
Hin-aagian namon in panalipod
ha ilarom han lambong han imo mga pako.
Nagpapatakas kami han pagkaon
nga imo gin-aandam;
ginpapainom mo kami tikang han salog
han imo pagkamaupay.
℟. Ikaw an burabod han kinabuhi, Ginoo.
3. Ikaw an surok han ngatanan nga kinabuhi,
ngan tungod han imo kapawa
kinikita namon an kapawa.
Padayon hin paghigugma
hadton mga nakilala ha imo
ngan pagbuhat hin maupay
ngadto hadton mga magtadong.
℟. Ikaw an burabod han kinabuhi, Ginoo.
EBANGHELYO
Mt 13:10-17
Pagbasa tikang han santos nga Ebanghelyo sumala kan Mateo.
Dinaop kan Jesus an mga tinun-an ngan nagpakiana ha iya, “Kay ano ngan nagamit ka man hin mga pananglitan kon nagyayakan ka ha ira?” Binaton hiya, “Iginhatag ha iyo an paghibaro han mga tinago han Ginhadian han langit, kundi waray ini ihatag ha ira. Kay an may-ada na tatagan pa, basi mamay-ada niya labaw pa han iya kinahanglan; kundi an tawo nga waray, kukuhaon, bisan ngani an gutiay nga aada ha iya. Amo ini an katadongan han akon paggamit hin mga pananglitan kon nagyayakan ako ha ira: kay natan-aw hira, kundi diri nakakakita, ngan namamati hira, kundi diri nakakabati o nakakasabot. Sanglit iginpahinungod ha ira an panagna ni Isaias:
‘Bisan unanhon niyo hin pamati; diri kamo makakasabot; bisan unanhon niyo pagtinan-aw, diri kamo makakakita, kay matig-a an ulo hini nga mga tawo, ngan ira ginsagpo an ira mga talinga, ngan ginpiyong an ira mga mata. Kay diri hira buot makakita, ngan diri hira buot makabati, kay bangin kon makasabot hira, makabalik hira ha akon, nasiring an Dyos, ngan tatambalon ko hira.’
“Kundi kamo, hin kapalaran niyo! Kay nakakakita an iyo mga mata ngan nakakabati an iyo mga durunggan. Tigamni ini: damo nga mga manaragna ngan damo nga mga tawo han Dyos in karuyag pagkita han iyo kinikita, kundi waray hira makakita, ngan karuyag pagbati han iyo hinbatian kundi waray hira makabati.
An Ebanghelyo han Ginoo.