PAGBASA I
Miq 6:1-4, 6-8
Pagbasa tikang han Basahan ni Miqueas nga manaragna.
Pamatii an sumbong han Ginoo kontra han Israel. Tindog, O Ginoo, ngan ipasaka an imo sumbong. Pabatia an kabukiran ngan an kapungtoran han imo igsisiring. Kamo nga kabukiran, kamo nga waray kataposan nga mga patukoranan han tuna, pamatii an sumbong han Ginoo! May sumbong an Ginoo kontra han iya mga tawo. Ipapasaka niya in sumbong kontra han Israel.
Nasiring an Ginoo, “Mga tawo ko, ano an akon ginbuhat ha iyo? Kay ano nga binubug-atan na man kamo ha akon? Batona ako. Ginpagawas ko kamo ha Ehipto. Gintalwas ko kamo han pagkaoripon. Ginsugo ko hira Moises, Aaron, ug Miriam hin pagmando ha iyo.
Ano an akon pagdadad-on ngadto han Ginoo nga Dyos han langit, kon kumanhi ako hin pagsingba ha iya? Magdadara ba ako han gimamag-upayi nga mga nati nga baka nga pagtutuboron nga mga halad ngadto ha iya? Malilipay ba an Ginoo kon dad-an ko hiya hin yinukot nga mga karnero o hin waray paghubas nga mga sapa hin lana hin olibo? Ighahalad ko ba ha iya an akon suhag nga anak hin pagbayad han akon mga sala? Diri, ginsumatan kita han Ginoo kon ano an maupay. Amo ini an ginkikinahanglan niya ha aton: pagbuhat hin matadong, pagpakita hin dayuday nga paghigugma, ngan pag-ukoy ha mapinaubsanon nga pakigkausa han aton Dyos.
An Pulong han Ginoo.
SALMO RESPONSORIO
Sal 50:5-6, 8-9, 16bc-17, 21 & 23
℟. Ha magtadong igpapakita ko
an matalwason nga gahum han Dyos.
1. Nasiring hiya, “Pagtiroka an akon
magtinumanon nga mga tawo,
adton naghimo hin ginsabotan kaupod ha akon
pinaagi hin paghalad hin tinubod nga mga unong.”
Nagsasangyaw an kalangitan nga matadong an Dyos,
nga hiya ngahaw usa nga maghurukom.
℟. Ha magtadong igpapakita ko
an matalwason nga gahum han Dyos.
2. Diri ako nagsasaway ha iyo
tungod han iyo mga tinubod nga unong,
ngan han mga tinubod nga halad
nga ha dayuday iyo gindadara ha akon.
Diri ako nagkikinahanglan
hin mga todo nga baka tikang han iyo kaumhan
o kakandingan tikang han iyo mga panon.
℟. Ha magtadong igpapakita ko
an matalwason nga gahum han Dyos.
3. “Kay ano nga ginpapamatbat niyo an akon mga sugo?
Kay ano nga ginhihimangraw niyo an akon ginsaaran?
Nadiri kamo nga pagsawayan ko kamo;
iginsisikway niyo an akon mga sugo.”
℟. Ha magtadong igpapakita ko
an matalwason nga gahum han Dyos.
4. “Ginbuhat niyo ini ngatanan
ngan waray la ako magyakan,
sanglit naghunahuna kamo
nga pareho la ako ha iyo.
Kundi yana ginsasaway ko kamo
ngan nagsusumbong ako ha atubangan niyo.
An pagpasalamat amo an tinubod nga unong
nga nagpapasidungog ha akon,
ngan tatalwason ko gud
an ngatanan nga nagsusugot ha akon.”
℟. Ha magtadong igpapakita ko
an matalwason nga gahum han Dyos.
EBANGHELYO
Mt 12:38-42
Pagbasa tikang han santos nga Ebanghelyo sumala kan Mateo.
May-ada mga magturutdo han Balaod ngan mga Parisiyo nga nagsiring, “Magturutdo, karuyag namon nga magpakita ka hin milagro.” Binaton hi Jesus, “Pagkamaraot ngan pagkawaray pagtoo han mga tawo hini nga panahon! Naaro ba kamo ha akon hin milagro? Diri ako mahatag! An milagro nga ihahatag ha iyo amo la an milagro ni manaragna Jonas. Sugad nga nagpabilin hi Jonas hin tulo ka adlaw ngan tulo ka gab-i didto ha tiyan han dako nga isda, magpapabilin man an Anak han Tawo hin tulo ka adlaw ngan tulo ka gab-i ha ilarom han tuna. Ha Adlaw han Paghukom matindog an mga tawo ha Ninibe ngan magsusumbong ha iyo, kay ginbasolan nira an ira mga sala han pakabati nira han pagwali ni Jonas; ngan nasiring ako ha iyo, hahani yana in labaw pa kan Jonas! Ha Adlaw han Paghukom matindog an Rayna ha Seba ngan magsusumbong ha iyo, kay nagbaktas hiya tikang han iya tuna nga natawohan basi la makabati han kinaadman ni Solomon; ngan nasiring ako ha iyo, hahani yana in labaw pa kan Solomon!”
An Ebanghelyo han Ginoo.