PAGBASA I
Jer 14:17-22
Pagbasa tikang han Basahan ni Jeremias nga manaragna.
Ginsugo ako han Ginoo hin pagsumat han mga tawo hiunong han akon kabidoan ngan hin pagsiring: “Manabigis unta adlaw gab-i in mga luha ha akon mga mata, diri unta ako humunong hin pagtinangis, kay makalilisang an kasamdan han akon mga tawo, ngan maundag hin duro an ira kasamdan. Kon nagawas ako ngadto ha kaumhan, hinkikit-an ko an mga lawas hin mga tawo nga pinanmatay didto ha pag-awayan; kon nasulod ako ngadto han mga bungto, hinkikit-an ko in mga tawo nga nagkakamatay hin gutom. Nagtutuman han ira mga katungdanan an mga manaragna ug kapadian, kundi diri hira mag-aram kon ano an ira ginbubuhat.”
O Ginoo, iginsikway mo na ba hin hingpit an Juda? Napupungot ka ba han mga tawo han Sion? Kay ano nga makalilisang man an imo panamad ha amon nga makuri na kami magka-uupay? Nangita kami hin kalinaw, kundi waray gud kaupayan nga inmabot; naglaom kami hin pagtambal, kundi kahadlok lugod an amon dinangatan. Nakasala kami ha imo, O Ginoo; nagkokompisal kami han amon mga sala ngan han mga sala han amon kaapoy-apoyan. Hinumdomi an imo mga saad, ngan ayaw kami pagtamaya; ayaw pagpakaalohi an Jerusalem, an dapit han imo harangdon nga trono. Ayaw pagsupaka an ginsaaran nga imo ginhimo ha amon. May-ada ba mga diyosdiyos han mga nasod nga makakagpadara hin uran? Ug an langit makakapauran ba? Naglaom kami ha imo, O Ginoo nga amon Dyos, kay ikaw amo an nagbubuhat hini nga mga butang.
An Pulong han Ginoo.
SALMO RESPONSORIO
Sal 79:8, 9, 11 and 13
℟. Tungod han kadungganan han imo ngaran,
O Dyos, bawia kami.
1. Ayaw kami pagkastigoha
tungod han mga sala han amon kaapoy-apoyan,
kundi kalooyi kami yana,
kay waray na gud kami paglaom.
℟. Tungod han kadungganan han imo ngaran,
O Dyos, bawia kami.
2. Buligi kami, O Dyos nga amon magtaralwas,
tungod han imo kalugaringon nga kadungganan;
bawia kami ngan pasayloa an amon mga sala,
basi pagdayawon ka han mga tawo.
℟. Tungod han kadungganan han imo ngaran,
O Dyos, bawia kami.
3. Pamatii an mga pag-araba han mga binilanggo,
ngan talwasa pinaagi han imo dako nga gahom
adton mga sinirotan hin kamatayon.
Ngan kami nga imo mga tawo,
an kakarnerohan han imo panon,
magpapasalamat ha imo hin kadayonan,
ngan magdadayaw ha imo
ha ngatanan nga panahon nga tiarabot.
℟. Tungod han kadungganan han imo ngaran,
O Dyos, bawia kami.
EBANGHELYO
Mt 13:36-43
Pagbasa tikang han santos nga Ebanghelyo sumala kan Mateo.
Niyan binaya hi Jesus han mga tawo ngan sinakob hin balay. Hinarani ha iya an iya mga tinun-an, ngan nagsiring ha iya; “Sumati daw kami han kahulogan han pananglitan han mga banwa ha uma.” Binaton hi Jesus, “An Anak han Tawo amo an tawo nga nagpugas han maupay nga binhe; an kalibutan amo an uma; an mga tawo nga sakop han Ginhadian amo an maupay nga binhe; an mga tawo nga sakop han Yawa amo an mga banwa. Ngan an Yawa ngahaw amo an kaaway nga nagsabwag han mga banwa. An katapos han kalibutan amo an pag-ani; ngan an mga anghel amo an mga mag-arani. Sugad nga gintitirok an mga banwa ngan ginsusunog ha kalayo, amo man ini ha katapos han kalibutan. Magsusugo an Anak han Tawo han iya mga anghel, ngan titirokon nira tikang han iya Ginhadian an ngatanan nga nakadarahig han mga tawo hin pakasala ngan an ngatanan nga magbuhat hin maraot, ngan ilalabog hira ngadto han naglalaga nga hudno. Magtatangis hira didto ngan manliligot an ira mga ngipon. Niyan, masanag an mga tawo han Dyos pareho han adlaw didto han Ginhadian han Amay nira. Sanglit pamati, kon may-ada niyo mga durunggan!
An Ebanghelyo han Ginoo.