PAGBASA I
Is 55:1-3
Pagbasa tikang han Basahan ni Isaias nga manaragna.
Nagsiring an Ginoo, “Kadi, kamo ngatanan nga inuuhaw—aadi in tubig! Kadi, kamo nga mga waray kwarta—palit kamo ngan kaon! Kadi, palit kamo hin bino ug gatas—diri ini pababaydan ha iyo! Kay ano nga ginagasto niyo in kwarta dida hin diri nakakabusog? Kay ano nga ginagasto niyo an iyo mga suhol ngan ginugutom la kamo gihapon? Pamati kamo ha akon ngan buhata niyo an akon igsisiring, ngan magpapahimulos kamo han gimamaupayi nga pagkaon. Pamati yana, mga tawo ko, ngan daop kamo ha akon; daop ha akon ngan mabubuhi kamo! Hihimoon ko ha iyo in dayon nga ginsabotan, ngan ihahatag ko ha iyo an mga kaupayan nga akon iginsaad kan David.”
An Pulong han Ginoo.
SALMO RESPONSORiO
Sal 145:8-9, 15-16, 17-18
℟. Binubuksan mo an imo kamot, Ginoo,
ngan ginbubusog nimo kami.
1. An Ginoo mahigugmaon, maloloy-on,
mahinay masina, may gugma nga dayon.
Maupay ha tanan hiya nga Ginoo,
ha tanan binuhat napaid hin husto.
℟. Binubuksan mo an imo kamot, Ginoo,
ngan ginbubusog nimo kami.
2. Natan-aw nga malinaumon ha iya,
an ngatanan butang nga mga buhi pa.
Ngan ha ira ihinahatag man niya,
an pagkaon kon kinahanglan gud nira.
Igo an ihinahatag n’ya han tanan,
ginbubusog ira mga kinahanglan.
℟. Binubuksan mo an imo kamot, Ginoo,
ngan ginbubusog nimo kami.
3. An Ginoo matadong iya binuhatan,
tanan nga buhat niya maloloy-on man.
Duok h’ya han tanan natawag ha iya,
kon kinasingkasing an pagtawag nira.
℟. Binubuksan mo an imo kamot, Ginoo,
ngan ginbubusog nimo kami.
PAGBASA II
Rom 8:35, 37-39
Pagbasa tikang han Surat ni San Pablo ngadto han mga taga Roma.
Mga kabugtoan: Niyan, hin-o man in makakapabulag ha aton tikang han gugma ni Cristo? Makakahimo ba an kagul-anan, o an kakurian, o an pagpakurii, o an kagutom, o an kakablasan, o an kataragman, o an kamatayon? Diri, ha butnga hini ngatanan may-ada kita hingpit nga pagdarag-an pinaagi ha iya nga naghigugma ha aton! Kay maaram ako nga waray gud bisan ano nga makakapabulag ha aton han iya gugma: bisan pa an kamatayon o an kinabuhi; bisan pa an mga anghel o an iba nga kagamhanan; bisan pa an panahon yana o an tiarabot; bisan pa an mga kahitas-an o an mga kahiladman—waray gud bisan ano ha ngatanan nga mga binuhat nga makakapabulag ha aton han gugma han Dyos pinaagi kan Cristo Jesus nga aton Ginoo.
An Pulong han Ginoo.
EBANGHELYO
Mt 14:13-21
Pagbasa tikang han santos nga Ebanghelyo sumala kan Mateo.
Han pakabati ni Jesus nga ginpatay hi Juan, binaya hiya ngadto nga dapit, ngan nagsakay hiya. Kinadto hiya nga waray niya upod, hin dapit nga mamingaw. Hinbaroan ini han mga tawo. Binayaan nira an ira mga bungto, ngan nagbaktas hira hin pagsunod ha iya. Paghaw-as ni Jesus han sakayan hinkit-an niya an kadam-an nga mga tawo, ngan inalpan hiya hin dako nga kalooy ha ira, ngan gintambal niya an ira mga magsakit. Hadto ngahaw nga kulop, dinaop ha iya an mga tinun-an ngan nagsiring, “Tikasirom na, ngan tay-aw ini nga dapit. Palakta na an mga tawo ngan pakadtoa hira ha mga kabaryohan, basi makapalit hira hin pagkaon.” “Diri kinahanglan nga magkalakat hira,” binmaton hi Jesus. “Hi kamo ngahaw in pagpakaon ha ira.” Nagbaton hira, “Lilima la ka bug-os an aton tinapay ngan duduha an isda.” Nagsiring hi Jesus, “Dad-a niyo ngadi.” Pinapanlingkod niya an mga tawo ha kabanwaan; kinuha niya an lima nga tinapay ngan duha nga isda, ngan hinanggad hiya ha langit pagpasalamat han Dyos. Ginpinitpinit niya an tinapay ngan iginhatag ha mga tinun-an, ngan igindorot ini ngadto han mga tawo. Nangaon an ngatanan ngan nagkabubusog. Katapos, gintirok han mga tinun-an an mga salin nga nakapuno hin dose ka alat. Lima ka yukot nga kalalaken-an an nangaon, labot han kababayen-an ngan han kabataan.
An Ebanghelyo han Ginoo.