PAGBASA I
Jer 30:1-2, 12-15, 18-22
Pagbasa tikang han Basahan ni Jeremias nga manaragna.
Nagsiring ha akon an Ginoo nga Dyos han Israel, “Igsurat dida hin usa nga basahan an ngatanan nga akon iginsumat ha imo.
Nasiring an Ginoo ngadto han iya mga tawo, “Diri na matatambal an iyo mga samad, diri na mag-uupay an iyo mga pilas. Waray tawo nga magmamangno ha iyo, waray bulong para han iyo mga kaduntan, waray na paglaom nga matambal kamo. Hinngalimtan na kamo han ngatanan niyo nga mga hinigugma; diri na hira naninimangno ha iyo. Ginsulong ko kamo sugad hin kaaway; makuri an kastigo ha iyo, kay damo an iyo mga sala ngan duro an iyo pagkamaraot. Ayaw na kamo pagngurutob hiunong han iyo mga pilas; waray gud tambal para ha iyo. Amo ini an akon pagkastigo ha iyo, kay damo an iyo mga sala, ngan duro an iyo pagkamaraot.
Nasiring an Ginoo, “Pauulion ko ha ira tuna an akon mga tawo, pagtitindogon ko na liwat an Jerusalem; ngan ibabalik ko an iya palasyo. Magkakanta hin pagdayaw an mga tawo nga nag-uokoy didto; manggogogliat hira tungod hin kalipay. Magdadamo hira tungod han akon bendisyon, ngan tatagan hira hin dungog. Ibabalik ko an kadaan nga gahom han nasod, ngan pagpaparig-onon ko ini hin maupay; pagkakastigohon ko an ngatanan nga nagraogdaog ha ira. Matikang ha ira kalugaringon nga nasod an ira punoan, ha ira kalugaringon nga mga tawo an ira prinsipe. Madaop hiya ha akon kon pagdapiton ko hiya; kay hin-o an magpapasipara hin pagdaop nga diri dinapit? Magigin akon hira mga tawo; ngan magigin Dyos ako nira. Ako nga Ginoo an nagyakan.”
An Pulong han Ginoo.
SALMO RESPONSORIO
Sal 102:16-18, 19-21, 29 & 22-23
℟. Titindogon liwat han Ginoo an Sion
ngan mapakita hiya han iya himaya.
1. Mahahadlok han Ginoo an kanasoran,
ngan han iya gahom adton kahadian.
Kon tindogon na an Sion nga bungto,
ipapadayag an iya pagkadako.
Iya na gud nga pamamatian,
adton ginpabay-an nga iya katawhan.
Diri na gud niya pagpapakabungolan,
adton ira mga pag-ampo ngatanan.
℟. Titindogon liwat han Ginoo an Sion
ngan mapakita hiya han iya himaya.
2. Isurat kanan Ginoo binuhatan,
para han tiarabot nga katulinan;
basi an waray pa matawo nga katawhan,
ha iya man liwat magdayaw ngatanan.
An tuna han Ginoo gintinangboan,
tikang hadton dapit niya nga baraan;
tikang didto dayuday niya ginkikinitaan,
an tuna ha ubos han mga katawhan.
Tungod nga karuyag niya hibatian,
mga araba didto ha bilanggoan;
pagtalwas gud hadton mga sinirotan,
han kamatayon nga ira dadangatan.
℟. Titindogon liwat han Ginoo an Sion
ngan mapakita hiya han iya himaya.
3. Murayaw an kahimtang han amon kabataan;
mag-uokoy dayuday ira katulinan,
ha ubos han imo panalipdanan.
Ipasangyaw ha Sion an ngaran han Ginoo,
magdayaw ha Jerusalem an mga tawo.
Kon an mga nasod ug ginhadian magtampo,
ngan magsingba na gud hira han Ginoo.
℟. Titindogon liwat han Ginoo an Sion
ngan mapakita hiya han iya himaya.
EBANGHELYO
Mt 14:22-36
Pagbasa tikang han santos nga Ebanghelyo sumala kan Mateo.
Niyan ginpasakay hin sakayan ni Jesus an mga tinun-an ngan ginpauna niya ngadto ha tabok han lanaw, samtang ginpalakat niya an mga tawo. Kahuman niya palakta an mga tawo, sinagka hiya hin bukid nga usa la hiya, basi hiya mag-ampo. Han pagkagab-i na nag-usaan la didto hi Jesus. Hini nga takna nakadto na an sakayan ha lawod, gindadasmagan han mga balod kay sungsong adto han hangin. Ha may mga alas tres ngadto ha alas seis na han kaagahon kinadto ha ira hi Jesus nga naglalakat ha bawbaw han tubig. Han pakakita han mga tinun-an ha iya nga naglalakat hiya ha bawbaw han tubig, duro an ira kahadlok. “Iini in murto,” nagsiring hira, ngan ginoliat hira tungod hin kahadlok. Nagyakan dayon hi Jesus ha ira, “Ayaw kamo kahadlok! Ako gad ini!” Niyan nagsiring hi Pedro, “Ginoo, kon tinuod nga ikaw, palakata man ako ha bawbaw han tubig ngada ha imo.” “Pakadi!” binaton hi Jesus. Sanglit hinaw-as hi Pedro han sakayan ngan nagtikang hin paglakat ha bawbaw han tubig ngadto kan Jesus. Kundi han pakasabot niya nga makusog an hangin, nahadlok hiya ngan nagtikang hiya hin paglunod. “Tabagi ako, Ginoo!” ginoliat hiya. Kinaptan ngan binutong hiya dayon ni Jesus ngan sidngon, “Pagkagutiay han imo pagtoo! Kay ano nga nagruhaduha ka?” Sinakay hira han sakayan ngan hinugpoy an hangin. Nagsingba kan Jesus an mga tinun-an nga nakada han sakayan ngan nagsiring hira, “Matuod gud nga ikaw amo an Anak han Dyos!”
Tinabok hira han lanaw ngan inabot ha Genesaret, diin kinilala kan Jesus an mga tawo. Sanglit iginpakuha nira an mga magsakit didto hito nga katunaan ngan gindara nira ngadto kan Jesus. Nakimalooy hira ha iya nga tugotan niya an mga magsakit hin pagkapot bisan na manla han sidsid han iya bado; ngan nagkauupay an ngatanan nga nakakapot.
An Ebanghelyo han Ginoo.
________________
The following text may be substituted, especially in Year A when the above Gospel is read on Monday:
Mt 15:1-2, 10-14
Pagbasa tikang han santos nga Ebanghelyo sumala kan Mateo.
Niyan dinaop kan Jesus in mga Parisiyo ngan mga magturutdo han Balaod nga tikang ha Jerusalem, ngan nagpakiana ha iya: “Kay ano nga diri nagtutuman an imo mga tinun-an han pagturon-an nga igintutdo han aton mga kaapoy-apoyan? Diri anay hira nanhuhunaw han angay nga paagi nga diri pa hira nakaon!” Niyan gintawag ni Jesus an mga tawo ngan ginsiring hira: “Pamati, ngan sabota niyo! Diri an nasulod ha baba han tawo an nakakahugaw ha iya; an nagawas lugod ha baba an nakakahugaw ha iya.” Niyan hinarani ha iya an mga tinun-an ngan nagsiring, “Maaram ka ba nga napungot an mga Parisiyo han imo iginyakan?” Binaton hi Jesus, “Gagaboton an tagsa nga tanom nga waray igtanom han akon Amay ha langit. Ayaw kabaraka ha ira! Mga buta hira nga mga pangulo; ngan kon magtutugway in buta hin igkasi buta, mahuhulog hira nga duha ngadto hin kali.”
An Ebanghelyo han Ginoo.