PAGBASA I
Hab 1:12—2:4
Pagbasa tikang han Basahan ni Habacuc nga manaragna.
Ginoo, Dyos ka na tikang pa ha tinikangan. Ikaw an akon Dyos nga baraan ngan waray kataposan. O Ginoo nga akon Dyos ngan mananalipod, ginpili mo an mga Babilonianhon ngan ginpakusog mo hira basi makagkastigo hira ha amon. Kundi uunanhon mo hin pakailob hini nga maglingo ngan magraot nga mga tawo? Baraan hin duro an imo mga mata hin pagtan-aw han karat-an, ngan diri ka mailob hin pagkita hin mga tawo nga nagbubuhat hin sayop. Sanglit kay ano nga nahilom ka la samtang ginpupukan nira in mga tawo nga mas matadong kay ha ira? Uunanhon mo hin pagdumara hin mga tawo nga sugad hin isda o sugad hin kabalay hin gudtiay nga mga mananap nga waray pangulo nga nagmamando ha ira? Dinadakop han mga Babilonianhonan mga tawo pinaagi hin mga kawil ug mga pukot nga sugad hin mga isda la hira, ngan nagoliat hira nga malipayon tungod han ira dakop! Ginsisingba pa ngani nira an ira mga pukot ngan ginhahalaran ini hin mga halad nga tinubod, kay nahatag man an ira mga pukot han gimamaupayi nira nga pagkaon. Gagamiton ba nira ha kadayonan an ira mga espada ngan magpapadayon ba hira hin pagpuo hin waray pagkalooy han mga nasod? Masaka ako han akon lantawan ngan maghuhulat ako kon ano an igsusumat ha akon han Ginoo ngan kon ano an iya igbabaton han akon sumbong.
Ini an ibinaton ha akon han Ginoo: “Isurat hin klaro dida hin mga papan nga susuratan an akon igpapadayag ha imo, basi mabasa ini ha usa la ka pagsiplat. Isurat ini, kay diri pa ini panahon nga matutuman ini. Kundi diri maiha maabot na an panahon ngan matutuman na an akon igpapakita ha imo. Daw mahinay an iya pag-abot, kundi hulata la ini; maabot gud ini ngan diri na maglalangan. Ngan amo ini an mensahe: ‘Waray mabubuhi hadton mga magraot, kundi mabubuhi adton mga magtadong, kay mga magtinumanon hira sa Dyos.’”
An Pulong han Ginoo.
SALMO RESPONSORIO
*Sal 9:8-9, 10-11, 12-13
℟. Diri nimo isasalikway, Ginoo,
adton naghihingyap ha imo.
1. An Ginoo amo an hadi ha kadayonan;
nagtindog hiya hin lingkoran nga hukmanan.
Matadong an iya paghadi
han bug-os nga kalibutan;
naghuhukom hiya han kanasoran
dida hin katadongan.
℟. Diri nimo isasalikway, Ginoo,
adton naghihingyap ha imo.
2. Han mga ginraogdaog an Ginoo amo an darangpan,
himyang nga arayopan ha panahon hin kasamokan.
Masarig ha imo, adton nakilala ha imo, Ginoo;
kay diri ka nasalikway hadton nadangop ha imo.
℟. Diri nimo isasalikway, Ginoo,
adton naghihingyap ha imo.
3. Ngadto han Ginoo, hadi han Sion,
pag-awit kamo ha iya hin pagdayaw!
An iya mga ginbuhat nga orosahon,
ha kanasoran iyo igpasangyaw!
An mga nag-aantos han Dyos hinnunumdoman,
an ira mga pagtangis diri hinngangalimtan;
adton magpakaraot ha ira, iya ginsisirotan.
℟. Diri nimo isasalikway, Ginoo,
adton naghihingyap ha imo.
EBANGHELYO
Mt 17:14-20
Pagbasa tikang han santos nga Ebanghelyo sumala kan Mateo.
Pagbalik nira ngadto han mga tawo, dinaop kan Jesus in tawo, linuhod ha iya atubangan, ngan nagsiring, “Kalooyi gad an akon anak! Buntogon hiya ngan makalilisang an gin-aantos kon tinutulos, ngan agsob hiya mahulog ha kalayo ngan ha tubig. Gindara ko na hiya ngadto han imo mga tinun-an, kundi waray man hira makaupay ha iya.” Binaton hi Jesus, “Pagkawaray pagtoo ngan pagkasayop niyo nga mga tawo! Tubtob pa san-o an akon pag-inupod-upod ha iyo? Tubtob pa san-o an akon pag-inalagad ha iyo? Dad-a nganhi ha akon an bata!” Ginpaiwas ni Jesus an yawa ngan ginawas ini, sanglit hito ngahaw nga takna naupay dayon an bata. Niyan dinaop hin hilit kan Jesus an mga tinun-an ngan nagpakiana ha iya, “Kay ano nga waray man kami makapaiwas han yawa?” Binaton hi Jesus, “Tungod kay kulang kamo hin pagtoo. Tigamni ini: kon may niyo pagtoo nga sugad kadako hin liso hin mustasa, makakasiring kamo hini nga bukid, ‘Balhin ngadto hin iba nga dapit!’ Ngan mabalhin ito. Mahihimo niyo an ngatanan.
An Ebanghelyo han Ginoo.