PAGBASA I
Nah 2:1, 3; 3:1-3, 6-7
Pagbasa tikang han Basahan ni Nahum nga manaragna.
Tan-awa, naabot dida han kabukiran in magsarangyaw nga may maupay nga sumat! Aada na hiya han iya dalan hin pagpahibaro han pagdarag-an! Mga tawo han Juda, sauroga niyo an iyo mga pyesta ngan tagi an Dyos han iyo ginsumpa ha iya. Diri na gud susulongon han mga magraogdaog an iyo tuna. Ginpuo na gud hira! Ipapahiuli na han Ginoo an pagkaharangdon han Israel, sugad hadto han waray pa hiya pagtikasi han iya mga kaaway.
Maghihikaraot an buwaon nga parapamatay nga syudad, puno hin karikohan nga tirikason ngan karawaton! Pamatii! An hinagiyos han latigo, an kinaradol han mga ruyda, an rinapakdapak han mga kabayo, an harangkaol han mga karuwahe. Nasulong in mga dikabayo, nag-iidlap an mga espada, nag-iinggat an mga bangkaw! Natatambak in mga patay nga lawas, mga patay nga lawas nga diri maiihap—nahipapakdol ha ira an mga tawo! Pagtatamayon ko ikaw ngan pagpuputson ko ikaw hin hugaw. Matutok ha imo hin kahadlok an mga tawo. Maisol an ngatanan nga makakakita ha imo. Masiring hira, ‘Nalunay na ha kabungkagan an Ninibe! Hin-o in napaid ha iya? Hin-o in karuyag magliaw ha iya?’”
An Pulong han Ginoo.
SALMO RESPONSORIO
Deut 32:35cd-36ab, 39abcd, 41
℟. Hi ako an nahatag han kamatayon ug kinabuhi.
1. Maabot an panahon nga mapupukan hira;
hirani na an adlaw han ira karat-an.
Tatalwason han Ginoo an iya mga tawo,
kon hikikit-an niya nga maluya na hira.
Malolooy hiya hadton mga nag-aalagad ha iya.
℟. Hi ako an nahatag han kamatayon ug kinabuhi.
2. “Ako, ngan ako gudla, amo an Dyos;
waray na iba nga diyos nga matood.
May gahom ako hin pagpatay ngan pagbuhi,
pagsamad ngan pagtambal.”
℟. Hi ako an nahatag han kamatayon ug kinabuhi.
3. Babairon ko an akon nag-iidlap nga espada,
ngan tatalinguhaon ko nga buhaton an katadongan.
Mabulos ako han akon mga kaaway,
ngan makastigo ako hadton mga nagdudumot ha akon.
℟. Hi ako an nahatag han kamatayon ug kinabuhi.
EBANGHELYI
Mt 16:24-28
Pagbasa tikang han santos nga Ebanghelyo sumala kan Mateo.
Ngan nagsiring hi Jesus ha iya mga tinun-an, “Kon may-ada karuyag umupod ha akon, kinahanglan nagsalikway hiya han iya kalugaringon, magpas-an han iya kros, ngan magsunod ha akon. Kay adton karuyag magtalwas han iya kinabuhi mawawara ini ha iya; kundi adton kawad-an han iya kinabuhi tungod ha akon, hiaagian ini niya. Ano ba an makukuha han tawo kon maangkon niya an bug-os nga kalibutan, kundi kawad-an hiya han iya kinabuhi? Waray gud! Waray niya sadang mahatag basi mabawi an iya kinabuhi. Kay maabot na an Anak han Tawo dida han himaya han iya Amay, upod an iya mga anghel, ngan tatagan niya hin balos an ngatanan sumala han ira mga buhat. Tigamni niyo ini: May-ada pipira dinhe nga diri mapatay tubtob nga hikit-an nira an Anak han Tawo nga maabot usa nga hadi.”
An Ebanghelyo han Ginoo.