PAGBASA I
Ezeq 2:8—3:4
Pagbasa tikang han Basahan ni Ezequiel nga manaragna.
Nagsiring an Ginoo ha akon, “Anak hin tawo, pamatii an akon igsisiring ha imo. Ayaw pagmasupilon sugad ha ira. Abrehe an imo baba ngan kaona an akon ihahatag ha imo.”
Hinkit-an ko in kamot nga gin-unat ngadi ha akon, ngan nakapot ini hin usa nga linikid nga basahan. Ginbuklad han kamot an linikid nga basahan, ngan hinkit-an ko nga sinuratan ini paluyoluyo—mga pagtangis hin kabidoan, mga pagnguyngoy, ngan mga pag-araba an iginsurat dida hini.
Nagsiring an Dyos, “Anak hin tawo, kaona ini nga linikid nga basahan; katapos, pakadto ngan paghimangraw ha mga tawo han Israel.” Sanglit ginbungat ko an akon baba ngan iginhatag ha akon hin pagpakaon an linikid nga basahan. Nagsiring hiya, “Anak hin tawo, kaona ini nga linikid nga basahan nga akon ihinahatag ha imo; tunla ini.” Kinaon ko ini, ngan natilawan ko nga matam-is sugad hin dugos. Niyan nagsiring an Dyos, “Anak hin tawo, pakadto han mga tawo han Israel ngan sumati hira han bisan ano nga akon igpapayakan ha imo.
An Pulong han Ginoo.
SALMO RESPONSORIO
Sal 119:14, 24, 72, 103, 111, 131
℟. Hin kamatam-is han imo mga tugon.
1. Nalipay ako hin pagtuman han imo mga sugo,
labaw hin pakaangkon hin manggad nga damo.
℟. Hin kamatam-is han imo mga tugon.
2. An imo mga sugo nakakalipay ha akon,
kay amo an akon mga magsaragdon.
℟. Hin kamatam-is han imo mga tugon.
3. Ha akon, labaw an balaod nga hatag mo,
kay han mga bahandi hinin tuna nimo.
℟. Hin kamatam-is han imo mga tugon.
4. Hin kamatam-is han imo mga tugon,
mas matam-is pa kay han dugos nga pagkaon.
℟. Hin kamatam-is han imo mga tugon.
5. Akon dayon nga hiagi an imo mga sugo,
amo ini an kalipay han kasingkasing ko.
℟. Hin kamatam-is han imo mga tugon.
6. Naghahangos ako ha akon pagnganga,
han imo mga sugo ha akon pag-ungara.
℟. Hin kamatam-is han imo mga tugon.
PAGBASA II
Mt 18:1-5, 10, 12-14
Pagbasa tikang han santos nga Ebanghelyo sumala kan Mateo.
Hadto nga takna kinadto kan Jesus an mga tinun-an ngan nagpakiana, “Hin-o man an gidadakoi didto han Ginhadian han langit?” Gintawag ni Jesus in usa nga bata ngan ginpatukdaw niya ha atubangan nira, ngan nagsiring, “Tigamni ini: kon diri kamo magbalhin ngan masugad hin kabataan diri gud kamo makakasulod han Ginhadian han langit. An gidadakoi didto han Ginhadian han langit amo adton nagpapaubos ngan nasusugad hini nga bata. Ngan adton nakarawat hin sugad hini nga bata ha akon ngaran nakarawat man ha akon.
“Bantayi nga diri kamo magtamay han usa hini nga mga gudtiay nga kabataan. Nasiring ako ha iyo nga dayuday aada an ira mga anghel ha atubangan han akon Amay ha langit. “Ha iyo paghunahuna, ano an bubuhaton hin usa ka tawo kon mawad-an hiya hin usa han iya usa kagatos (100) nga mga karnero? Babayaan niya an kasiyaman kagsiyam (99) nga nananabsab ha ligid han pungtod, ngan malakat hin pamiling han nawara. Nasiring ako ha iyo, kon hiagian niya ini, labaw kamalipayon hiya tungod hini nga usa nga karnero kay han kasiyaman kagsiyam (99) nga waray mawara. Ha amo gud nga pagkaagi, diri karuyag han Amay niyo ha langit nga may mawara hini nga mga gudtiay nga kabataan.
An Ebanghelyo han Ginoo.