PAGBASA I
Ezeq 16:1-15, 60, 63
Pagbasa tikang han Basahan ni Ezequiel nga manaragna.
Naghimangraw liwat ha akon an Ginoo. Nagsiring hiya, “Anak hin tawo, ipakita ha Jerusalem an makapupungot nga mga butang nga iya ginbuhat. Sumati an Jerusalem han igyayakan ha iya han Ginoo nga Dyos: “Natawo ka didto han tuna han Canaan. Amoreohanon an imo amay, ngan Hiteohanon an imo nanay. Han katawo mo, waray nag-utod han imo pusod, o nagparigo ha imo, o naghaplas ha imo hin asin, o nagputos ha imo hin mga lampin. Waray nalooy ha imo hin pagbuhat hin bisan ano nga mga butang para ha imo. Han katawo mo waray ngani may hinigugma ha imo. Iginlabog ka la ngadto ha gawas. “Niyan linabay ako ngan hinkit-an ko ikaw nga nalunay ka dida han imo kalugaringon nga dugo. Napuputos ka hin dugo, kundi waray ako tumugot nga mamatay ka. Ginpatubo ko ikaw sugad hin linghod nga tanom. Nagmakusog ngan hinitaas ka ngan nahimo nga daraga. Buksol an imo mga dughan ngan tinubo an imo buhok, kundi hubo-labas ka. “Han paglabay ko na liwat, hinkit-an ko nga inabot na an imo panahon hin paghigugma. Gintahoban ko han akon bado an imo hubo nga lawas, ngan nagsaad ako hin paghigugma ha imo. Tinuod, iginsumpa ko an akon pangasawa ha imo ngan naangkon ko ikaw.” Amo ini an igyayakan han Ginoo nga Dyos.
“Niyan kinuha ako hin tubig ngan ginkarigoan ko ikaw basi mahugasan ka han dugo. Ginhaplasan ko ikaw hin lana hin olibo. Ginbadoan ko ikaw hin binordahan nga higlaba nga mga panapton, gintagan ko ikaw hin gimamaupayi nga anit nga sandalyas, hin lino nga pudong ha ulo, ngan hin kurugpos nga sida. Gin-adornohan ko ikaw hin mga alahas—mga pulsiras ngan mga kwintas. Gintagan ko ikaw hin singsing ha irong, mga ariyos, ngan hin matahom nga korona nga imo isusul-ot. May mga adorno ka nga bulawan ug salapi, ngan dayuday ka nagbabado hin binordahan nga lino ug sida nga mga panapton. An imo pagkaon amo an tinapay nga hinimo tikang han gimamaupayi nga harina, ngan hin dugos ug lana hin olibo. Makasirindak an imo kamahusay, ngan nahimo ka nga usa nga rayna. Nabantogan ka ha ngatanan nga mga nasod tungod han imo hingpit nga pagkamatahom, kay ako an nagpahusay ha imo.” Amo ini an igyayakan han Ginoo nga Dyos. “Kundi ginpahimulosan mo an imo katahom ngan kabantogan hin pakigdirig han ngatanan nga mga umaragi.
Kundi pagpapasidunggan ko an ginsaaran nga akon ginhimo ha imo han batan-on ka pa, ngan hihimoon ko ha imo in ginsaaran nga magpapadayon hin waray kataposan. Pasasayloon ko an ngatanan nga kasaypanan nga imo nabuhat, kundi hinunumdoman mo ini ngan ikakaawod mo hin duro hin pagbungat han imo baba.” An Ginoo nga Dyos an nagyakan.
An Pulong han Ginoo.
______________
Halipot nga Pagbasa I
Ezeq 16:59-63
Pagbasa tikang han Basahan ni Ezequiel nga manaragna.
Nasiring an Ginoo nga Dyos, “Pagdudumaraon ko ikaw han angay ha imo, kay ginpasibay-an mo an imo mga saad ngan ginsupak mo an ginsaaran. Kundi pagpapasidunggan ko an ginsaaran nga akon ginhimo ha imo han batan-on ka pa, ngan hihimoon ko ha imo in ginsaaran nga magpapadayon hin waray kataposan. Mahinunumdom ka han imo ginawian ngan maaawod ka hini kon mahibalik na ha imo an imo magurang ngan manghod nga kabugtoan nga kababayen-an. Susugaron ko hira hin mga anak mo nga kababayen-an, bisan kon diri ini bahin han akon ginsaaran ha imo. Babag-ohon ko an akon ginsaaran ha imo, ngan makilala ka nga ako amo an Ginoo. Pasasayloon ko an ngatanan nga kasaypanan nga imo nabuhat, kundi hinunumdoman mo ini ngan ikakaawod mo hin duro hin pagbungat han imo baba.” An Ginoo nga Dyos an nagyakan.
An Pulong han Ginoo.
______________
SALMO RESPONSORIO
Is 12:2-3, 4bcd, 5-6
℟. Hinngalimtan mo an imo kasina
kay karuyag ka maglipay ha akon.
1. An Dyos an akon magtaralwas;
masarig ako ha iya ngan diri ako mahahadlok.
Nahatag ha akon hin gahom ug kusog an Ginoo;
hiya an akon magtaralwas.
Sugad nga nakakalipay han mga inuuhaw
an matugnaw nga tubig,
nalilipay man an mga tawo han Dyos
kon talwason niya hira.”
℟. Hinngalimtan mo an imo kasina
kay karuyag ka maglipay ha akon.
2. “Pagpasalamat han Ginoo!
Tawga hiya hin pagbulig ha imo!
Sumati han iya ginbuhat an ngatanan nga kanasoran!
Sumati hira han iya pagkagamhanan!
℟. Hinngalimtan mo an imo kasina
kay karuyag ka maglipay ha akon.
3. Pagkanta ngadto han Ginoo
tungod han makaaramdok
nga mga butang nga iya ginbuhat.
Igsumat ini ha bug-os nga kalibutan.
Pagoliata ngan pakantaha
an ngatanan nga nag-uokoy didto ha Sion!
Gamhanan an baraan nga Dyos han Israel,
ngan nag-uokoy hiya tampo han iya mga tawo.”
℟. Hinngalimtan mo an imo kasina
kay karuyag ka maglipay ha akon.
Tuig I ngan II
EBANGHELYO
Mt 19:3-12
Pagbasa tikang han santos nga Ebanghelyo sumala kan Mateo.
Kinadto ha iya in mga Parisiyo ngan nagsari hin pagbitik ha iya pinaagi hin pagpakiana, “Natugot ba an aton Balaod nga in lalake makigbulag han iya asawa, hin bisan ano la nga pasangil?” Binaton hi Jesus, “Waray ba niyo mabasa ini nga bahin han kasuratan, ‘Ha tinikangan, an Magburuhat naghimo hin lalake ngan babaye?’ Ngan nagsiring hiya, ‘Tungod hini mabaya an lalake han amay ngan iroy niya ngan makikigtampo han iya asawa, ngan hira nga duha mauusa na la nga lawas.’ Sanglit diri na hira duduha kundi uusa nala. Kinahanglan diri han tawo pagbulagon an gin-usa han Dyos.” Nagpakiana ha iya an mga Parisiyo, “Kay ano nga tinmugot man hi Moises nga an lalake magsurat hin pagpahibaro hin pakigbulag ha iya asawa ngan makakabulag na hiya?” Binaton hi Jesus, “Tinmugot hi Moises nga makigbulag kamo han iyo asawa kay makuri man kamo pagtutdoan. Kundi diri amo ito ha tinikangan. Sanglit nasiring ako ha iyo, an bisan hin-o nga makigbulag han iya asawa labot kon an asawa naglalake, nakakasala hin panlibog, kon mangasawa hiya hin iba nga babaye.” Nagsiring ha iya an iya mga tinun-an, “Kon amo man ini an mahinanabo hiunong han bana ngan han iya asawa, maupay na la nga diri mangasawa.” Binaton hi Jesus, “Diri para han ngatanan ini nga pagturon-an, kundi para la hadton gintagan hini han Dyos. Kay damo ka lain an pangatadongan kon kay ano nga may mga lalake nga diri mahimo hin pag-asawa: may-ada diri makakahimo hin pangasawa tungod kay natawo hira nga daan sugad; an iba kay ginkaponan hira hin mga tawo; ngan an iba tungod han Ginhadian han langit. Hiya nga nakakahimo hin pagkarawat hini nga pagturon-an, tugotan hin pagbuhat.”
An Ebanghelyo han Ginoo.