PAGBASA I
Is 56:1, 6-7
Pagbasa tikang han Basahan ni Isaias nga manaragna.
Nagsiring an Ginoo ngadto han iya katawhan, “Buhata niyo an igo ngan matadong kay diri maiha tatalwason ko kamo.”
Ngan nagsiring an Ginoo ngadto hadton mga lumalangyaw nga kausa na han iya mga tawo, nga nahigugma ngan nag-aalagad ha iya, nga nagtutuman han Adlaw nga Iparahuway, ngan nagtutuman hin kinasingkasing han iya ginsaaran: “Pagdadad-on ko kamo ngadto han Sion nga akon baraan nga pungtod, paglilipayon ko kamo didto han akon balay hin pag-ampo, ngan kakarawaton ko an mga halad nga tinubod nga iyo iginhahalad dida han akon altar. Tatawgon an akon Templo nga usa nga balay hin pag-ampo para han mga tawo han ngatanan nga mga nasod.”
An Pulong han Ginoo.
SALMO RESPONSORIO
Sal 67:2-3, 5, 6 & 8
℟. An ngatanan nga mga tawo
magdayaw unta ha imo, Ginoo.
1. O Dyos, pagmaloloy-on manggad ha amon,
imo unta kami pagpakaupayon.
Tan-awa kami ha im’ kamaloloy-on,
nga sabton han ‘tanan imo kaburut-on.
Tanan mga nasod unta mahibaro,
han katalwasan nga natikang ha imo.
℟. An ngatanan nga mga tawo
magdayaw unta ha imo, Ginoo.
2. Maglipay na unta adton kanasoran,
ngan magkaranta na nga may kalipayan.
Kay matadong an paghukom mo han tanan,
ngatanan nga nasod im’ ginmamandoan.
℟. An ngatanan nga mga tawo
magdayaw unta ha imo, Ginoo.
3. Magdayaw unta, O Dyos, an mga tawo,
tanan nga katawhan magdayaw ha imo.
An Dyos, nga aton Dyos naglipay ha aton,
an Dyos amo an ha aton nagbendisyon.
Katawhan ha tanan dapit mag-uruyon
pagyukbo ha iya hin matinahoron.
℟. An ngatanan nga mga tawo
magdayaw unta ha imo, Ginoo.
PAGBASA II
Rom 11:13-15, 29-32
Pagbasa tikang han Surat ni San Pablo ngadto han mga taga Roma.
Mga kabugtoan: Naghihimangraw ako yana ha iyo nga mga Hentil: naparayaw ako hinin akon buruhaton samtang apostol pa ako ngadto han mga Hentil, basi mangabugho an akon igkasi mga Judiyo, ngan tungod hito matalwas an iba ha ira. Kay han pagsalikwaya ha ira, an mga tawo nga hadto mga kaaway han Dyos nahimo nga mga sangkay niya. Sanglit ano man an mahinanabo kon karawaton na hira? Magigin kinabuhi ini para han mga patay!
Kay diri nababalhin an hunahuna han Dyos mahitungod han iya ginpipili ngan ginpapakaupay. Mahitungod ha iyo nga mga Hentil, sinupak kamo han Dyos han nag-agi nga panahon; kundi yana kinarawat na niyo an kalooy han Dyos kay sinupak man an mga Judiyo. Ha sugad nga kaagi, tungod han kinarawat niyo nga kalooy, an mga Judiyo nasupak na yana han Dyos basi karawaton liwat nira yana an kalooy han Dyos. Kay ginhimo han Dyos an ngatanan nga mga tawo nga mga masupakon, basi makapakita hiya hin kalooy ha ira ngatanan.
An Pulong han Ginoo.
EBANGHELYO
Mt 15:21-28
Pagbasa tikang han santos nga Ebanghelyo sumala kan Mateo.
Binaya hi Jesus hadto nga dapit ngan kinadto ha katunaan hirani han mga syudad han Tiro ug Sidon. Hinarani ha iya in babaye nga taga Canaan nga nag-ukoy didto nga dapit ngan nakimalooy, “Ginoo, Anak ni David! Kalooyi gad ako! Sinasangkayan hin maraot nga espiritu an akon anak nga babaye ngan makuri gud an iya kamutangan.” Kundi waray magbaton hi Jesus ha iya. Dinaop an iya mga tinun-an ngan naghangyo kan Jesus, “Paiwasa hiya! Nagsusunodsunod hiya ha aton ngan maaringasa hiya!” Niyan binaton hi Jesus, “Ginpadara ako ngadto la han mga nagkawawara nga karnero han katawhan han Israel!” Kundi hinarani an babaye ngan hinapa ha tiilan ni Jesus ngan nagsiring, “Buligi gad ako, Ginoo!” Nagbaton hi Jesus, “Diri angay kuhaon an pagkaon han mga anak ngan ilabog ngadto han mga ayam.” Binaton an babaye, “Matuod gud an imo siring. Kundi bisan ngani an mga ayam nangangaon han mga salin nga natataktak tikang ha lamesa han ira agaron.” Sanglit binaton hi Jesus ha iya, “Babaye, pagkadako han imo pagtoo! Matutumanan ka han imo pinangangaro!” Ngan naupay an iya anak hito ngahaw nga takna.
An Ebanghelyo han Ginoo.