PAGBASA I
Ezeq 24:15-23
Pagbasa tikang han Basahan ni Ezequiel nga manaragna.
Naghimangraw ha akon an Ginoo. Nagsiring hiya, “Anak hin tawo, pinaagi hin usa nga paghampak kukuhaon ko an tawo nga imo hinihigugma labaw han ngatanan. Diri ka magngungurutob, o magtatangis, o magpapaagay hin luha. Ayaw ipabati an imo pagbakho. Ayaw paglakat nga waray pandong o sandalyas sugad nga tigaman hin pagmabidoon. Ayaw pagtahobi an imo bayhon o pagkaon han kinakaon han mga magsulob-on.” Temprano pa han pagkaaga, nakighimangraw ako han mga tawo. Hito manta nga gab-i namatay an akon asawa, ngan han pagkabuwas gintuman ko an iginsugo ha akon. Ginpakianhan ako han mga tawo, “Kay ano nga nanggagawi ka hin sugad?” Sanglit ginsiring ko hira, “Naghimangraw ha akon an Ginoo ngan ginsiring ako hin pagsumat ha iyo nga mga Israelita hini nga mensahe: Naparayaw kamo han kamadig-on han Templo. Naruruyag kamo hin pagtan-aw ngan pagduaw hini, kundi paghuhugawan ini han Ginoo. Ngan panmamatayon didto ha pag-awayan an batan-on nga mga sakop han iyo mga panimalay nga mahibilin didto ha Jerusalem. Niyan pagbubuhaton niyo an akon ginbuhat. Diri niyo tatahoban an iyo mga bayhon o kakaonon an kinakaon han mga magsulob-on. Diri kamo malakat nga waray pandong o waray sandalyas, o magmamabidoon, o magtatangis. Manggagasa kamo tungod han iyo mga sala, ngan maghaharoy kamo ngatanan.
An Pulong han Ginoo.
SALMO RESPONSORIO
Deut 32:18-19, 20, 21
℟. Hinkalimtan mo an Dyos
nga naghatag ha imo hin kinabuhi.
1. Nangalimot hira han ira Dyos,
an makagarahum nira nga magtaralwas,
an Dyos nga naghatag ha ira hin kinabuhi.
“Nasina an Ginoo han pagkakita niya hini,
ngan ginsikway niya an ngatanan nga iya mga anak.
℟. Hinkalimtan mo an Dyos
nga naghatag ha imo hin kinabuhi.
2. Nagsiring hiya, ‘Diri na ako mabulig ha ira;
niyan hisasabutan ko kon ano an ira dadangatan,
ito nga magtig-a an ulo ngan malingo nga mga tawo.
℟. Hinkalimtan mo an Dyos
nga naghatag ha imo hin kinabuhi.
3. Pinaagi han ira mga diyosdiyos
gin-aghat ako nira hin kasina,
hin pangabugho han tinatawag nira nga kadiyosan,
nga diri matood nga kadiyosan.
Sanglit magamit ako hin usa nga nasod
hin pag-aghat ha ira hin kasina;
basi mangabugho hira
hin usa nga nasod hin mga lurong.
℟. Hinkalimtan mo an Dyos
nga naghatag ha imo hin kinabuhi.
EBANGHELYO
Mt 19:16-22
Pagbasa tikang han santos nga Ebanghelyo sumala kan Mateo.
May hadto usa ka tawo nga dinaop kan Jesus. Nagpakiana hiya, “Magturutdo, ano an maupay nga butang nga kinahanglan ko buhaton basi maangkon ko an kinabuhi nga dayon?” Binaton hi Jesus, “Kay ano nga napakiana ka man ha akon kon ano in maupay? An Dyos la an maupay. Tumana an mga sugo kon buot ka makasulod ha kinabuhi.” “Ano nga mga sugo?” nagpakiana hiya. Nagbaton hi Jesus, “Diri ka magpatay; diri ka manlibog; diri ka mangawat; diri ka magbuwa; tahora an amay ug iroy nimo, ngan higugmaa an imo igkasi tawo sugad ha imo ngahaw.”
Binaton an batan-on, “Gintuman ko na ini ngatanan nga mga sugo, ano pa man an akon sadang buhaton?” Nagsiring ha iya hi Jesus, “Kon karuyag mo mahingpit, kadto na, ngan ipamaligya an ngatanan nga imo mga butang, ngan ihatag an kwarta ha mga kablas, ngan maaangkon mo in mga manggad ha langit; ngan kahuman, balik ngan sunod ha akon.” Han pakabati hini han batan-on, linakat hiya nga mabidoon, kay riko hiya.
An Ebanghelyo han Ginoo.