PAGBASA I
Ezeq 28:1-10
Pagbasa tikang han Basahan ni Ezequiel nga manaragna.
Naghimangraw ha akon an Ginoo. Nagsiring hiya, “Anak hin tawo, sumati an punoan han Tiro han akon, an Ginoo nga Dyos, igyayakan ha iya: Tungod han imo kamapahitas-on, nasiring ka nga usa ka nga diyos. Nasiring ka nga sugad hin dyos nalingkod ka dida hin usa nga trono, nga ginpapalibotan han kadagatan. Mahihimo nga magpakadiyos ka, kundi tawo ka la gihapon, diri ka diyos. Naghuhunahuna ka nga labi ka hin kamaaram kay kan Danel, ngan waray sekreto nga makakatago ha imo. Nakapariko ha imo in mga manggad nga bulawan ug salapi pinaagi han imo kinaadman ug kabatiran. Listo ka han imo mga pagpatigayon ngan nagpadayon ka hin pagkabahandianon. Dinmugang an imo pagparayaw han imo mga manggad! “Sanglit yana, amo ini an igyayakan ko, an Ginoo nga Dyos: Tungod nga naghuhunahuna ka nga sugad ka hin diyos hin kamaaram, pagdadad-on ko in magpintas nga mga kaaway hin pagsulong ha imo. Aagawon nira an ngatanan mo nga magtahom nga mga butang nga imo naangkon pinaagi hin kabatiran ug kinaadman. Papatayon ka nira ngan ikakadto ka hin usa nga tubigon nga lubnganan. Kon kumanhi na hira hin pagpatay ha imo masiring ka ba gihapon nga usa ka nga diyos? Kon umatubang ka na han mga magparatay ha imo, magigin tawo ka la nga diri gud diyos. Mamamatay ka sugad hin usa nga ayam, ha kamot hin waray diyos nga mga lumalangyaw. Ako nga Ginoo nga Dyos an nagsugo.”
An Pulong han Ginoo.
SALMO RESPONSORIO
Deut 32:26-27ab, 27cd-28, 30, 35cd-36ab
℟. Hi ako an nahatag han kamatayon ug kinabuhi.
1. Karuyag ko unta hin pagpuo ha ira,
basi hingalimtan hira ha kadayonan.
Kundi diri ako matugot nga maghinambog an ira mga kaaway,
nga ira ginpirde an akon katawhan.
℟. Hi ako an nahatag han kamatayon ug kinabuhi.
2. Kay ako man ngahaw an nagdugmok ha ira.’
“An Israel amo in usa nga nasod nga waray buot;
waray gud nira pagsabot.
℟. Hi ako an nahatag han kamatayon ug kinabuhi.
3. Kay ano nga ginpirde hin usa ka tawo in usa ka yukot,
ngan hin duha la ka tawo an napulo ka yukot?
Ginbayaan hira han Ginoo nga ira Dyos;
iginsalikway hira han ira makagarahum nga Dyos.
℟. Hi ako an nahatag han kamatayon ug kinabuhi.
4. Hirani na an adlaw han ira karat-an.
Tatalwason han Ginoo an iya mga tawo,
kon hikikit-an niya nga maluya na hira.
Malolooy hiya hadton mga nag-aalagad ha iya.
℟. Hi ako an nahatag han kamatayon ug kinabuhi.
EBANGHELYO
Mt 19:23-30
Pagbasa tikang han santos nga Ebanghelyo sumala kan Mateo.
Niyan nagsiring hi Jesus han iya mga tinun-an, “Nasiring ako ha iyo, magkukuri in riko hin pagsulod han Ginhadian han Langit. May-ada pa ako lain nga igsisiring ha iyo: mas makuri para hin riko hin pagsulod han Ginhadian han Dyos kay hin kamelyo hin pagsuhot ha taranogan hin dagom.” Han pakabati han iya mga tinun-an, nahipausa hira. Nagpakiana hira, “Hin-o man ngay-an in matatalwas?” Gintutokan hira ni Jesus ngan ginbaton, “Diri ini nahihimo hin mga tawo; kundi para han Dyos, nahihimo an ngatanan.” Niyan nagyakan hi Pedro, “Ginoo, kitaa, ginbayaan namon an ngatanan ngan sinunod kami ha imo. Ano man in amon maangkon?” Nagsiring ha ira hi Jesus, “Nasiring ako ha iyo hini: kon lumingkod na an Anak han Tawo didto han langitnon niya nga trono didto han Bag-o nga kalibutan, malingkod ha trono liwat kamo nga dose nga akon mga tinun-an hin paghukom han dose nga mga tribo han Israel. Ngan an ngatanan nga binaya hin mga balay, kabugtoan o mga kag-anak, o kabataan, o mga uma, tungod ha akon, makarawat hin labaw pa hin usa kagatos (100) ka pilo ngan tatagan pa han kinabuhi nga dayon. Kundi damo in mauorhe nga nag-uuna yana, ngan damo in mauuna nga nauorhe yana.
An Ebanghelyo han Ginoo.