PAGBASA I
Ezeq 34:1-11
Pagbasa tikang han Basahan ni Ezequiel nga manaragna.
Naghimangraw ha akon an Ginoo. Nagsiring hiya, “Anak hin tawo, sawaya an mga punoan han Israel. Panagna ngan sumati hira han akon, an Ginoo nga Dyos, igyayakan ha ira: Maghihikaraot kamo nga mga magmarangno han Israel! Nagmamangno kamo han iyo la kalugaringon, kundi diri gud niyo ginmamangnoan an mga karnero. Iniinom niyo an gatas, sinusul-ot an mga panapton nga hinimo tikang han delana, ngan iniihaw ngan kinakaon an gitatamboki nga mga karnero. Kundi diri gud niyo ginmamangnoan an mga karnero. Waray niyo paymangnoi an mga magluya, pagbulnga an mga magsakit, pagbutka an mga samad, pabalika an mga nahisalaag, o pagbilnga an mga nagkawawara. Ginraogdaog lugod niyo hira. Nagsasarang an mga karnero kay waray hira magmarangno, ngan pinanmatay ngan pinanngaon hira hin magpintas nga kamanampan. Sanglit nahisalaag an akon mga karnero didto han higtaas nga kapungtoran ngan kabukiran. Nagsarang hira ha bawbaw han tuna, ngan waray gud may nangita ha ira o nagtinguha hin pamiling ha ira.
“Sanglit pamati kamo nga mga magmarangno han igyayakan ha iyo nakon nga Ginoo. Sugad nga ako amo an buhi nga Dyos, maupay pa mamati kamo ha akon. Ginsulong hin magpintas nga kamanampan nga nanmatay ngan nanngaon ha ira, kay waray man nira magmarangno. Waray gud magtinguha an akon mga magmarangno hin pamiling han mga karnero. Ginmamangnoan nira an ira la kalugaringon ngan diri an mga karnero. Sanglit pamati kamo ha akon, kamo nga mga magmarangno. Nagsusumat ako nga Ginoo nga Dyos nga kaaway ako niyo. Kukuhaon ko ha iyo an akon mga karnero ngan diri na gud ako matugot ha iyo nga magin ira magmarangno; diri ko na gud kamo tutugotan hin pagmangno han iyo la kalugaringon. Babawion ko ha iyo an akon mga karnero ngan diri ko na kamo tutugotan hin pagkaon ha ira. “Nagsusumat ako nga Ginoo nga Dyos nga ako ngahaw an mamimiling han akon mga karnero ngan magmamangno ako ha ira.”
An Pulong han Ginoo.
SALMO RESPONSORIO
Sal 23:1-3a, 3b-4, 5, 6
℟. An Ginoo an akon magmarangno,
dida ha iya waray ko iiliwon.
1. An Ginoo an magmarangno ha akon,
dida ha iya waray ko iiliwon.
Gindara ako ngadto hin kabanwaan,
ngadto hin pahuwayan nga kapatagan.
Gindara ako niya ngadto han linaw,
tubig nga bulong hin kapaso ug kauhaw.
Hin bag-o nga kusog hi ako tinagan.
℟. An Ginoo an akon magmarangno,
dida ha iya waray ko iiliwon.
2. Ha matadong nga dalan ako gin-unhan;
pagtuman niya han iya ginsaaran.
Bisan kon magtarap ako han kasisidman,
Ginoo, waray ko sadang kahadlokan;
kay ikaw man an akon inuupdan,
imo tungkod ug tabog an akon abayan.
℟. An Ginoo an akon magmarangno,
dida ha iya waray ko iiliwon.
3. Hin sasaro para ha akon ikaw naghikay,
ha atubangan han akon mga kaaway.
Kinarawat ako, imo ginpasidunggan,
ginpalapwas nimo an akon irimnan.
℟. An Ginoo an akon magmarangno,
dida ha iya waray ko iiliwon.
4. Magpapabilin an imo paghigugma,
samtang nga aanhi pa ako ha tuna.
Ngan an imo balay akon puroy-anan,
nga buhi pa ako ha mga katuigan.
℟. An Ginoo an akon magmarangno,
dida ha iya waray ko iiliwon.
PAGBASA II
Mt 20:1-16
Pagbasa tikang han santos nga Ebanghelyo sumala kan Mateo.
Iginsiring ni Jesus ha iya mga tinun-an ini nga pananglitan, “An Ginhadian han langit sugad han tag-iya hin uma hin mga ubas nga timprano pa ha aga linakat pangita hin mga tawo nga iya susuholan hin pagtrabaho ha iya urubasan. Nakigsabot hiya pagbayad ha ira han nahiaaraan nga suhol nga usa ka salapi an usa ka adlaw, ngan ginsugo hira ngadto han iya urubasan. Ginawas liwat hiya ngadto ha merkado ha may alas nuybe han aga ngan nakakita hiya hin mga tawo nga nagkakatukdaw didto ngan waray mga trabaho. Sanglit ginsiring niya hira, ‘Pagtrabaho man kamo ha akon urubasan, ngan tatagan ko kamo hin angay nga suhol.’ Ngan kinadto hira. Niyan ha pagka-alas dose, ngan liwat ha alas tres, amo gihapon an ginbuhat niya. May mga alas singko na han kulop han pagkadto niya liwat ha merkado. Hinkit-an niya in iba pa nga mga tawo nga nagkakatukdaw la gihapon didto. ‘Kay ano nga kinakaragan niyo an bug-os nga adlaw dinhe nga waray ginbubuhat?’ nagpakiana hiya ha ira. Binaton hira, ‘Kay waray man nagpatrabaho ha amon.’ Ginsiring hira niya, ‘Kon amo ito, kadto liwat kamo pagtrabaho ha akon urubasan.’ “Han pagkakulop na, ginsiring han tag-iya an iya tinaporan, ‘Tawga an mga nagtrabaho ngan tagi hira han ira suhol. Unaha pagbayad adton mga urhe magtrabaho, ngan urhe adton mga una magtrabaho. Gintagan hin tag-usa ka salapi an mga tawo nga nagtrabaho ha alas singko na han kulop. Sanglit han pagdaop na hin pagkarawat han suhol an mga tawo nga una magtrabaho, naghunahuna hira nga darudako an ira kakarawaton, kundi tinagan liwat hira hin tag-usa ka salapi an kada usa. Ginkarawat nira an ira suhol, ngan nagtikang hira hin pagngurutob kontra han tag-iya han urubasan. Nagsiring hira, ‘Iini nga mga tawo nga orhe magtrabaho, nagtrabaho sulod hin usa ka oras la, samtang kami nagtrabaho ha bug-os nga adlaw, ngan nag-antos han kapaso han adlaw. Kay ano nga gintagan mo hira pareho han iginhatag mo ha amon?’ Ngan ginbaton han tag-iya an usa ha ira, ‘Sangkay, pamati daw! Waray ako maglimbong ha imo. Di’ ba inuyon ka hin usa ka salapi nga suhol hin usa ka adlaw nga pagtrabaho? Yana, karawta an imo suhol, ngan oli ha iyo. Karuyag ko tagan an orhe na magtrabaho hin pareho nga suhol han akon iginhatag ha imo. Waray ba ngay-an ako katungod paggamit han akon kwarta sugad han akon karuyag? O nauba ka ba tungod han akon kamahinatagon?’” Ngan gintapos ini ni Jesus hin pagsiring, “Sanglit, mahiuuna adton mga orhe, ngan mauorhe adton mga nahiuna.”
An Ebanghelyo han Ginoo.