PAGBASA I
Ezeq 43:1-7ab
Pagbasa tikang han Basahan ni Ezequiel nga manaragna.
Gindara ako han tawo ngadto han ganghaan nga naatubang ha sinirangan, ngan didto hinkit-an ko nga naabot tikang ha sinirangan an mabislaw nga kapawa han himaya han Dyos han Israel. Nag-aaningal an tingog han Dyos sugad han dinaguhob han dagat, ngan sinmilaw an tuna han mabislaw nga kapawa. Sugad ini nga panan-awon han akon hinkit-an han pag-abot han Dyos hin pagbungkag han Jerusalem, ngan han akon hinkit-an didto han ligid han Salog Quebar. Niyan hinapa ako ha tuna. Inagi an mabislaw nga kapawa dida han sinirangan nga ganghaan ngan sinulod han Templo. Gin-alsa ako han espiritu han Ginoo ngan gindara ako ngadto han sakob nga bungsaran, diin hinkit-an ko nga napuno an Templo han mabislaw nga kapawa han Ginoo. Didto tinindog ha sapit nakon an tawo ngan hinbatian ko an Ginoo nga naghihimangraw ha akon tikang han Templo: “Anak hin tawo, iini an akon trono. Mag-uokoy ako dinhe tampo han mga tawo han Israel ngan maghahadi ako ha ira ha kadayonan.
An Pulong han Ginoo.
SALMO RESPONSORIO
Sal 85:9ab & 10, 11-12, 13-14
℟. Magpapabilin ha aton katunaan an himaya han Ginoo.
1. Namamati ako han kanan Dyos mga pulong,
nga nasaad hin kalinaw ug kadait ha aton.
Waray ruhaduha hin pagtalwas hiya andam,
hadton nahatag ha iya hin kadungganan;
ngan aanhi an iya katalwasan,
magpapabilin ha aton katunaan.
℟. Magpapabilin ha aton katunaan an himaya han Ginoo.
2. Magtatapo an gugma ug an kamatinumanon,
maghahangkopay an kalinaw ug an kamatadong;
Tikang ha tuna an kamatinumanon,
tikang ha langit an pagpamatadong.
℟. Magpapabilin ha aton katunaan an himaya han Ginoo.
3. An Ginoo an magpapauswag ha aton,
ngan mahatag an tuna hin hura nga aranihon.
Mag-uuna han Ginoo an pagkamatadong,
ngan mag-aandam han dalan para ha aton.
℟. Magpapabilin ha aton katunaan an himaya han Ginoo.
EBANGHELYO
Mt 23:1-12
Pagbasa tikang han santos nga Ebanghelyo sumala kan Mateo.
Niyan nagsiring hi Jesus ha mga tawo ngan ha iya mga tinun-an, “An mga magturutdo han Balaod ngan an mga Parisiyo amo an tinagan hin gahom hin paghubad han balaod ni Moises. Sanglit, kinahanglan tumanon ngan sundon niyo an ngatanan nga iginpapabuhat nira ha iyo; kundi ayaw pagsubda an ira mga buhat, kay diri nira ginbubuhat an ira iginwawali. Nagbubutok hira hin magbug-at nga mga darad-on, ngan ira ini iginpapapas-an han mga tawo, kundi diri ngani nagamit bisan na man la usa han ira tudlo hin pagdara hito nga mga darad-on. Ginbubuhat nira an ngatanan basi la hikit-an hira han mga tawo. Kitaa hin kahalapad nga mga banda diin aada in mga sinurat nga bersikulo han kasuratan nga ibinutang ha ira mga agtang ngan mga butkon! Ngan kitaa hin kahiglaba han mga lagwas han ira mga panapton! Karuyag nira an gimauupayi nga mga lingkoran ha mga kombite ngan an linain nga mga lingkoran ha mga sinagoga; karuyag nira nga yumukbo ha ira an mga tawo didto ha mga taboan, ngan tawgon hira nga ‘Magturutdo.’ Diri kinahanglan tawgon kamo nga ‘Magturutdo,’ kay magburugto la kamo ngatanan, ngan uusa la an iyo Magturutdo. Ngan diri kinahanglan tawgon niyo nga ‘Amay’ an bisan hin-o dinhe ha tuna, kay uusa la an Amay niyo ha langit. Ayaw kamo pagpatawag nga ‘Pangulo,’ kay an Mesiyas la an iyo pangulo. Kinahanglan mahimo nga iyo surugoon an gilalabawi ha iyo. Adton magpahitaas han iya kalugaringon, pauubson; ngan adton magpapaubos, pagpapahitas-on.
An Ebanghelyo han Ginoo.