PAGBASA I
Ezeq 37:1-14
Pagbasa tikang han Basahan ni Ezequiel nga manaragna.
Inabat ako nga an Ginoo aanhi ha akon, ngan gindara ako han iya espiritu ngan iginbutang ako didto hin usa nga kahamub-an nga luob hin mga tul-an. Iginlibot ako niya han kahamub-an, ngan hinkit-an ko nga damo hin duro an mga tul-an ngan duro na hin ka mga uga. Nagsiring hiya ha akon, “Anak hin tawo, mabubuhi pa ba ini nga mga tul-an?” Binaton ako, “Ikaw la an makakabaton hito; Ginoo nga Dyos!” Nagsiring hiya, “Ipanagna ngadto han mga tul-an. Sidnga ini nga uga nga mga tul-an nga mamati han pulong han Ginoo. Sidnga ini nga nasiring ako nga Ginoo nga Dyos: Maginhawa ko ngada ha iyo ngan bubuhion ko kamo. Tatagan ko kamo hin mga ugat ngan mga kusog, ngan puputson ko kamo hin panit. Giginhawaan ko kamo hin gininhawa ngan bubuhion ko kamo. Niyan makilala kamo nga ako amo an Ginoo.” Sanglit nanagna ako sumala han iginsugo ha akon. Han nagyayakan ako, hinbatian ko in linagatak nga aringasa, ngan nagtikang pagturugkop an mga tul-an. Samtang nagkikinita ako, naputos hin mga ugat ngan mga kusog an mga tul-an, ngan naputos liwat hin panit. Kundi waray ginhawa dida ha ira. Nagsiring ha akon an Dyos, “Anak hin tawo, panagna an hangin. Sidnga an hangin nga nagsusugo an Ginoo nga Dyos, nga guminhawa hiya ngadto hini nga patay nga mga lawas, basi mabuhi hira.” Sanglit nanagna ako sumala han iginsugo ha akon. Nagkamay-ada gininhawa an mga lawas. Nabuhi hira ngan nanindog. Igo an ira kadamo hin usa ka hugpo hin kasondalohan. Nagsiring ha akon an Dyos, “Anak hin tawo, sugad an mga tawo han Israel hini nga mga tul-an. Nasiring hira nga uga na hira, nga waray na gud paglaom, ngan waray na kabubwason. Sanglit panagna ngadto han akon mga tawo, an Israel, ngan sidnga hira nga bubuksan ko, an Ginoo nga Dyos, an ira mga lubnganan. Igagawas ko hira ngan ibabalik hira ngadto han tuna han Israel. Kon buksan ko na an mga lubnganan nga ginlubngan han akon mga tawo ngan mahigawas na hira, makilala hira nga ako amo an Ginoo. Giginhawaan ko hira, bubuhion ko hira, ngan pauokyon ko hira didto han ira kalugaringon nga tuna. Niyan makilala hira nga ako amo an Ginoo. Nagsaad ako nga pagbubuhaton ko ini—ngan pagtutumanon ko gud. Ako nga Ginoo an nagyakan.”
An Pulong han Ginoo.
SALMO RESPONSORIO
Sal 107:2-3, 4-5, 6-7, 8-9
℟. Pagpasalamat han Ginoo,
kay an iya gugma waray katapusan.
1. Hini nga mga pulong sarabat kita,
adton ngatanan nga gintalwas na niya.
Ginbawi kam’ tikang mga kaaway man;
ginbalik tikang han langyaw kanasoran;
tikang ha sinirangan ngan ha katundan,
ngan tikang ha amihanan ngan timogan.
℟. Pagpasalamat han Ginoo,
kay an iya gugma waray katapusan.
2. May nagsudoysudoy hadton kamingawan,
waray makaagi’n syudad nga urokyan.
Nag-antos hin kagutom ngan kauhaw man,
waray nagud nira sadang paglaoman.
℟. Pagpasalamat han Ginoo,
kay an iya gugma waray katapusan.
3. Niyan ha butnga han ira kakurian,
an Ginoo ira ginsangpit, gintawag;
ngan iya tinagan hira’n katalwasan,
tikang hadton ira mga kasakitan.
Ginmandoan hira ha tadong nga dalan,
ngadto hadton syudad nga ira gin-ukyan.
℟. Pagpasalamat han Ginoo,
kay an iya gugma waray katapusan.
4. Ginoo ira gud pagpasalamatan,
tungod han gugma n’ya nga ha kadayonan,
tungod urosahon ginbuhat ha ira.
Mga inuuhaw’ya pinapatunga;
mga ginugutom binubusog niya
pinaagi’n mga kaupayan niya.
℟. Pagpasalamat han Ginoo,
kay an iya gugma waray katapusan.
Tuig I ngan II
EBANGHELYO
Mt 22:34-40
Pagbasa tikang han santos nga Ebanghelyo sumala kan Mateo.
Nagkausa nga hugpo an mga Parisiyo han pakabati nira nga ginpahilom ni Jesus an mga Sadusiyo. Ngan in usa ha ira nga magturutdo han Balaod karuyag magbitik kan Jesus pinaagi hin pakiana. Nagpakiana hiya, “Magturutdo, ano an gidadakoi nga sugo han Balaod?” Binaton hi Jesus, “‘Kinahanglan higugmaon mo an Ginoo nga imo Dyos ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.’ Amo ini an gidadakoi ngan labi ka importante nga sugo. Sugad hini an ikaduha hin ka importante nga sugo: ‘Kinahanglan higugmaon mo an igkasi tawo sugad han imo kalugaringon.’ Dida hini nga duha nga sugo nasandig an bug-os nga Balaod ni Moises ngan an mga pagturon-an han mga manaragna.”
An Ebanghelyo han Ginoo.