PAGBASA I
2 Tes 3:6-10, 16-18
Pagbasa tikang han Ikaduha nga Surat ni San Pablo ngadto han mga taga Tesalonica.
Kabugtoan, ha ngaran han Ginoo Jesu-Cristo, nagsusugo kami ha iyo: pahirayo kamo han ngatanan nga kabugtoan nga hubya, ngan diri nagsusunod han mga turumanon nga iginhatag namon ha ira. Maaram kamo ngahaw nga kinahanglan niyo buhaton an amon ginbuhat. Diri kami mga hubya han nakada pa kami ha iyo. Waray kami kumarawat hini bulig bisan kan kanay nga waray namon pagbayari. Lugod, nagtrabaho ngan nagkabudlay kami adlaw-gab-i, basi diri kami makasagipo hin bisan hin-o ha iyo. Ginbuhat namon ini, diri tungod nga waray kami katungod pangaro hin bulig para ha amon, kundi gihimo ini namon basi magin susbaranan kami niyo. Han nakada pa kami ha iyo, ginsumatan kamo namon: “Adton diri magbudlay, diri pakaonon.”
Tagan unta kamo hin kamurayaw, ha ngatanan nga panahon nga ha ngatanan nga paagi, han Ginoo ngahaw nga amo an aton burabod han kamurayaw. Maada unta an Ginoo ha iyo ngatanan.
Ako, hi Pablo, amo gud an nagsusurat hini nga pangumosta. Amo ini an pagpirma ko han ngatanan nga surat, ngan amo ini an akon pagsurat. Maada unta ha iyo ngatanan an grasya han aton Ginoo Jesu-Cristo.
An Pulong han Ginoo.
SALMO RESPONSORIO
Sal 128:1-2, 4-5
℟. Palaran adton nahadlok han Ginoo.
1. Palaran adton nahadlok han Ginoo,
an nagtutuman han iya mga sugo!
Maaangkon mo an ginkinahanglan mo,
may kalipay ngan kauswagan pa nimo.
℟. Palaran adton nahadlok han Ginoo.
3. Sugad hini an kaupayan hin tawo,
kon nahahadlok gud hiya an Ginoo.
Paglilipayon gud hiya hin tutoo.
Ha Sion an Dyos maglipay gud ha imo!
Kauswagan hadton Jerusalem unta
tanan nga adlaw mo imo makikita!
℟. Palaran adton nahadlok han Ginoo.
EBANGHELYO
Mt 23:27-32
Pagbasa tikang han santos nga Ebanghelyo sumala kan Mateo.
Nagsiring hi Jesus, “Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Sugad kamo hin mga lubnganan nga pinintaran hin busag, nga maupay pagkit-on ha gawas, kundi puno hin tul-an hin mga patay ngan hin dunot nga mga lawas ha sulod. Ha amo man nga paagi, nakikita han ngatanan nga maupay kamo ha gawas, kundi puno kamo hin mga pagkamalabyaw ngan mga sala ha sakob.
“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Naghihimo kamo hin makaruruyag nga mga lubnganan para han mga manaragna, ngan gin-aadornohan pa niyo an mga munomento hadton mga mag-upay an kinabuhi, ngan nasiring kamo, ‘Kon kami an nabuhi han panahon han amon mga kaapoy-apoyan, diri unta namon ginbubuhat an ginbuhat nira hin pagpatay han mga manaragna.’ Ha pagyakan niyo hini, inuuyonan niyo nga kamo mga tulin hadton nagpatay han mga manaragna. Sanglit padayona ngan taposa niyo an gintikangan han iyo mga kaapoy-apoyan!
An Ebanghelyo han Ginoo.