PAGBASA I
1 Cor 1:17-25
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Waray ako sugoa ni Cristo hin pagbunyag. Ginsugo ako niya hin pagwali han Maupay nga Sumat, ngan pagwali hito hin waray paggamit hin mga pulong nga makuri masabtan han mga tawo, basi diri kawad-an hin gahom an kamatayon ni Cristo ha kros. Kay para hadton waray katalwasan kalurongan la an mensahe hiunong han kamatayon ni Cristo ha kros; kundi para ha aton nga gintatalwas, gahom ini han Dyos. Nasiring an Kasuratan, “Kakawangon ko an hibaro han mga makinaadmananon, ngan isasalikway ko an pagsabot han mga mag-aram.” Kon sugad, ano an kapulsanan han mga mag-aram? O han mga makinaadmananon? O han batid nga mga makilalantugion hini nga kalibutan? Iginpakita han Dyos nga kalurongan la an kinaadman hini nga kalibutan! Kay iginbuot han Dyos tungod han iya kinaadman, nga diri an mga tawo makahimo hin pagkilala ha iya pinaagi han ira kalugaringon nga kinaadman. Lugod pinaagi han ira sinisiring nga “linurong” nga mensahe nga amon iginwawali, an Dyos nakahunahuna hin pagtalwas hadton mga natoo. An mga Judiyo nagkinahanglan hin mga milagro basi hira tumoo, ngan an mga Griego nangita hin kinaadman. Para ha amon ginpapasangyaw namon an Cristo nga iginraysang ha kros, mensahe nga makaurulang para han mga Judiyo ngan kalurongan la para han mga Hentil; kundi para han mga tinawag han Dyos, ma Judiyo o ma Hentil, ini nga mensahe amo hi Cristo, an gahom ngan an kinaadman han Dyos. An kalurongan han Dyos labaw pa nga kinaadman kay han kanan tawo kinaadman, ngan an kamaluya han Dyos labaw pa kamakusog kay han kanan tawo kusog.
An Pulong han Ginoo.
SALMO RESPONSORIO
Sal 33:1-2, 4-5, 10-11
℟. Puno an tuna han pagkamaupay han Ginoo.
1. Ngatanan nga magtadong, paglipay kamo,
tungod hadton mga ginbuhat han Ginoo;
kamo ngatanan, dayawa hiya niyo,
ngatanan nga masinugtanon nga tawo.
An Ginoo aton pagpasalamatan,
nga tokar hin mga arpa dinuyogan.
Hiya liwat angay naton pagkantahan,
upod in mga turunggon nga dinul'san.
℟. Puno an tuna han pagkamaupay han Ginoo.
2. Matuod an mga pulong han Ginoo,
an iya buhat katataporan nimo.
Hinigugma han Ginoo an matadong,
lukop an tuna han iya gugma nga dayon.
℟. Puno an tuna han pagkamaupay han Ginoo.
3. Han Dyos ginpakyas kanan kanasoran tuyo,
waray itugot matuman an ira plano.
Padayon an iya nahunahunaan,
an iya panuyo waray kataposan.
℟. Puno an tuna han pagkamaupay han Ginoo.
EBANGHELYO
Mt 25:1-13
Pagbasa tikang han santos nga Ebanghelyo sumala kan Mateo.
“Hadto nga adlaw an Ginhadian han langit masusugad hin napulo nga kadaragan-an nga nagdara han ira mga suga ngan kinadto hin pagtapo han karaslon nga lalake. Mga waray buot an lima ha ira ngan mga may-ada buot an lima. Nagdara an mga waray buot han ira mga suga kundi waray hira magbalon hin idurugang nga lana. Kundi nagdara an mga may buot hin mga surudlan nga puno hin lana upod han ira mga suga. Nalangan pag-abot an karaslon nga lalake, sanglit pinamiraw ini nga mga daraga, ngan nanhingaturog. “Han katutnga na, may ginoliat ‘Aadi na an karaslon? Pakadi na kamo ngan tapoa niyo hiya!’ Nagkamata an napulo nga kadaragan-an ngan gin-andam nira an ira mga suga. Niyan siniring an mga waray buot ngadto han mga may buot, ‘Tagi gad kami han iyo lana kay nagtitikaparong na an amon mga suga.’ Binaton an mga may buot, ‘Ayaw, bangin diri masadang an lana para ha iyo ngan ha amon. Kadto lugod kamo ha tindahan ngan palit kamo para ha iyo.’ Sanglit linakat an mga waray buot hin pagpalit hin lana, ngan han paghilakat nira, inmabot man an karaslon nga lalake. Sinakob upod ha iya ngadto han kombite han pagkasal an lima nga mga daraga nga andam, ngan ginsadhan an porta. “Waray pag-iha, inabot an mga waray buot nga kadaragan-an, ‘Pasudla kami!’ ginoliat hira. Kundi binaton an karaslon, ‘Nasiring ako ha iyo: diri gud ako nakilala ha iyo.’” Gintapos ni Jesus an pananglitan hin pagsiring, “Sanglit pagbantay kamo, kay diri kamo maaram han adlaw o han takna.”
An Ebanghelyo han Ginoo.