PAGBASA I
1 Cor 3:18-23
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Kinahanglan waray maglimbong ha iya ngahaw. Kon may-ada ha iyo naghuhunahuna nga maaram hiya sumala han mga suruklan hini nga kalibutan, kinahanglan magin lurong hiya basi hiya magin tinuod nga maaram. Kay kalurongan la ha atubangan han Dyos an gin-iisip nga kinaadman hini nga kalibutan. Sumala han siring han Kasuratan, “Ginbibitik han Dyos an mga mag-aram dida han ira kaabtik,” ngan nasiring ha lain nga Kasuratan, “Maaram an Ginoo nga waray pulos an mga panhunahuna han mga mag-aram.”
Sanglit kinahanglan waray gud pumarayaw mahitungod han nahihimo hin mga tawo. Ha tinuod iyo na an ngatanan nga mga butang: hira Pablo, Apolo, ug Pedro; ini nga kalibutan, an kinabuhi, ngan an kamatayon; an yana ngan an tiarabot nga panahon; iyo ini ngatanan, ngan kan Cristo kamo, ngan kanan Dyos hi Cristo.
An Pulong han Ginoo.
SALMO RESPONSORIO
Sal 24:1bc-2, 3-4ab, 5-6
℟. Tag-iya an Ginoo han tuna
ug han ngatanan nga aanhi ha tuna.
1. An Ginoo han kalibutan an tag-iya,
an ngatanan pa nga butang nga aada:
Pati an tuna upod an mga butang,
hiya an tag-ada hini ngatanan.
Ha hilarom nga dagat iya ini gintindog,
didto ha ilarom han tuna iya gin-usok;
ngan ginbutang an mga patukoranan,
didto ha kahiladman han kalalawdan.
℟. Tag-iya an Ginoo han tuna
ug han ngatanan nga aanhi ha tuna.
2. Hin-o an may katungod nga mga tawo,
pagsagka ngadto ha pungtod han Ginoo?
Hin-o in makakahimo hin pagkadto
pagsakob han iya baraan nga Templo?
Amo adton mga putli ha buhat nira,
ngan malinis an ira panhunahuna.
℟. Tag-iya an Ginoo han tuna
ug han ngatanan nga aanhi ha tuna.
3. Pagpapakaupayon gud han Ginoo,
ngan pagtatalwason in sugad nga tawo.
An Dyos amo gud an magpapahibaro,
nga waray hira sala nga bisan ano.
Ini nga mga tawo han Dyos madangop,
ha atubangan han Ginoo ni Jacob.
℟. Tag-iya an Ginoo han tuna
ug han ngatanan nga aanhi ha tuna.
EBANGHELYO
Lc 5:1-11
Pagbasa tikang han santos nga Ebanghelyo sumala kan Lucas.
Usa ka adlaw natukdaw hi Jesus ha baybayon han Lanaw han Genesaret, samtang nagdadaisog an mga tawo ngadto ha iya, pamati han pulong han Dyos. Hinkit-an niya in duha nga sakayan nga iginsangya ha baybayon. Nagkahaw-as an mga mangirisda, ngan nagbulyas han ira mga pukot. Sinakay hi Jesus ha usa hini nga sakayan, nga hi Simon an tag-iya, ngan ginhangyo hi Simon nga iduso niya ini hin gutiay tikang ha baybayon ngadto ha tubig. Linmingkod hi Jesus ngan nagtutdo han mga tawo tikang han sakayan. Han katapos niya paghimangraw, nagsiring hiya kan Simon, “Palawod ngan itunod niyo an mga pukot, ngan makakadakop kamo.” Binaton hi Simon, “Agaron, nagkabudlay kami ha bug-os nga gab-i, ngan waray gud kami makadakop. Kundi kon amo man an imo siring, tutunoron namon an mga pukot.” Gintunod nira an mga pukot, ngan nakadakop hira hin damo nga isda, nga haros magisi an mga pukot. Sanglit ginkampay nira an ira mga kaupod didto hin lain nga sakayan basi buligan hira. Hinarani hira ngan gintugob hin isda an duha nga sakayan, nga haros malunod na hira. Pakakita ni Simon Pedro han nahinabo, linuhod hiya ha atubangan ni Jesus ngan nagsiring, “Pahirayo ha akon, Ginoo! Makasasala ako nga tawo!” Nahipausa hi Simon ngan an iba nga mga kaupod niya han duro kadamo nga isda nga ira nadakop. Nahipausa man liwat hira Santiago ug Juan nga mga anak ni Sebedeo ngan mga kabulig ni Simon. Nagsiring hi Jesus kan Simon, “Ayaw kahadlok; tikang yana mananakop ka na hin mga tawo.” Iginsangya nira an mga sakayan, ginbayaan an ngatanan, ngan sinunod hira kan Jesus.
An Ebanghelyo han Ginoo.