PAGBASA I
1 Cor 3:1-9
Pagbasa tikang han Syahan nga Surat ni San Pablo ngadto han mga taga Corinto.
Ha kamatuoran, kabugtoan, waray ako pakakaghimangraw ha iyo sugad han paghimangraw ko ha mga tawo nga nakaangkon na han Espiritu. Kinahanglan maghimangraw ako ha iyo sugad hin mga tawo hini nga kalibutan, sugad hin kabataan pa ha Cristohanon nga pagtoo. Ginbuhi ko kamo hin gatas, diri hin matig-a nga karaonon kay diri pa man kamo andam para hini. Ngan bisan ngani yana diri pa kamo andam kay an iyo kinabuhi sugad pa hin kanan kalibutan nga mga tawo. Kon may-ada kaawa dida ha iyo, ngan paglarolantugi, diri ba nagpapamatuod ini nga mga tawo pa kamo hini nga kalibutan, nga nabubuhi subay han mga ginawian hini nga kalibutan? Kon may ha iyo nasiring, “Kan Pablo ako,” ngan an iba, “Kan Apolo ako”—diri ba ini kanan kalibutanon nga kinabuhi han tawo?
Kon baga sidngon, hin-o hi Apolo? Ngan hin-o hi Pablo? Mga surugoon la kami han Dyos nga nagtutdo ha iyo han pagtoo. Kada usa ha amon nagtutuman han iginpabuhat han Ginoo: ako an nagtanom, hi Apolo an nagbaribe, kundi an Dyos an nagpapatubo han tanom. Adton nagtatanom ngan adton nagbabaribe diri amo an importante, kundi an Dyos nga nagpapatubo han tanom. Waray kalainan han nagtatanom ngan han nagbabaribe; babaloson han Dyos an kada usa ha ira sumala han ira nabuhat. Kay nagbubulig kami hin pagbuhat para han Dyos, ngan kamo amo an uma han Dyos.
An Pulong han Ginoo.
SALMO RESPONSORIO
Sal 33:12-13, 14-15, 20-21
℟. Malipayon adton bungto nga ginpili han Ginoo nga iya kalugaringon.
1. Palaran an nasod nga Dyos an Ginoo,
sugad man an pinili nga mga tawo.
Tikang ha langit tinmamod an Ginoo,
ngan kinita niya an ngatanan nga mga tawo.
℟. Malipayon adton bungto nga ginpili han Ginoo nga iya kalugaringon.
2. Tikang didto han iya ginhadian,
an mga umurukoy iya tinatamdan.
Hiya an nabantad han ira hunahuna,
han ngatanan nga buhat maaram hiya.
℟. Malipayon adton bungto nga ginpili han Ginoo nga iya kalugaringon.
3. An Ginoo an amon ginlalaoman,
amon panalipod ngan amon katabang.
Hiya an surok han amon kalipayan,
natapod kami han iya mahal nga ngaran.
℟. Malipayon adton bungto nga ginpili han Ginoo nga iya kalugaringon.
EBANGHELYO
Lc 4:38-44
Pagbasa tikang han santos nga Ebanghelyo sumala kan Lucas.
Binaya hi Jesus han sinagoga, ngan kinadto ha balay ni Simon. Hinihirantan an babaye nga ugangan ni Simon, ngan ginsumatan nira hi Jesus mahitungod ha iya. Dinmuok ngan tinindog hi Jesus ha ligid han iya higdaan. Ginpagawas niya an hiranat, ngan nalungasan hiya dayon. Binuhat dayon hiya ngan nagdurot ha ira. Han katunod na han adlaw, gindara nira ngadto kan Jesus an ira kasangkayan nga may-ada magkalainlain nga sakit. Kinamkam ni Jesus an tagsa ha ira, ngan gin-upay hira ngatanan. Nagkagawas liwat in mga yawa tikang hin damo nga mga tawo, nga naggoliat, “Ikaw amo an Anak han Dyos!” Kundi ginsaway hira ni Jesus, ngan waray hira tugoti hin pagyakan, kay maaram hira nga hiya amo an Mesiyas.
Han pagpunias han adlaw, ginawas hi Jesus han bungto ngan kinadto hin mamingaw nga dapit. Nagbiling ha iya an mga tawo, ngan han paghiagii nira ha iya, nagtalingoha hira hin paghawid ha iya. Kundi nagsiring hiya ha ira, “Kinahanglan igwali ko an Maupay nga Sumat han Ginhadian han Dyos ngadto liwat ha iba nga mga bungto, kay ginsugo ako han Dyos tungod hini.” Sanglit nagwali hiya didto ha mga sinagoga han bug-os nga Judea.
An Ebanghelyo han Ginoo.