PAGBASA I
1 Cor 5:1-8
Pagbasa tikang han Syahan nga Surat ni San Pablo ngadto han mga taga Corinto.
Mga kabugtoan: Niyan iginkakasumatsumat nga may-ada maglaw-ay nga buhat dida ha iyo, nga makalilisang hin duro, nga diri ngani hiaagian ha mga diri nakilala han Dyos. Nasumatan ako nga may usa ha iyo nga nakikig-asawa han iya pinakairoy! Sanglit uunanhon man pakaparayaw niyo? Angay pa ngani kamo maawod ngan magmasubo, ngan kinahanglan paiwason tikang ha iyo hugpo an tawo nga nagbuhat hini. Para ha akon, bisan kon tinuod nga hirayo ako ha iyo, ha espiritu sugad nga aada ako ha iyo, ha ngaran han aton Ginoo nga Jesus, ginhukman ko na an tawo nga nagbuhat hini nga makangingirhat nga butang. Ha pagkatirok niyo, ngan kausa ako niyo ha espiritu pinaagi han gahom han aton Ginoo nga Jesus nga aanhi ha aton, itubyan niyo ini nga tawo kan Satanas, basi malaglag an iya lawas ngan matalwas an iya espiritu kon umabot na an Adlaw han Ginoo.
Diri kamo angay magpalabilabi! Maaram man kamo han darahonon, “An gutiay nga patubo nakakapadako han bug-os nga minasa.” Kinahanglan kuhaon niyo ini nga daan nga patubo han sala basi mahingpit an iyo pagkaputli. Niyan masusugad na kamo hin bag-o nga minasa nga waray gud patubo, ngan maaram ako nga amo gud ini kamo. Kay andam na an Pyesta han Paglabay, yana nga iginhalad na hi Cristo nga amo an aton kordero han Paglabay. Sanglit saurugon ta an aton pyesta, diri pinaagi hin tinapay nga may daan nga patubo, an patubo hin sala ug karat-an, kundi pinaagi han tinapay nga waray patubo, an tinapay han pagkaputli ngan kamatuoran.
An Pulong han Ginoo.
SALMO RESPONSORIO
Sal 5:5-6, 7, 12
℟. Dad-a ako dida han imo pagkamatadong, Ginoo.
1 Usa ka nga Dyos nga diri nalilipay han maraot nga binuhatan;
diri ka natugot hin karat-an ha imo atubangan.
Nangangalas ka pagtan-aw han mga magpahitas-on;
Napupungtan mo an ngatanan nga magburuhat hin magraot.
℟. Dad-a ako dida han imo pagkamatadong, Ginoo.
2. Ginpupuo mo an ngatanan nga mga buwaon
ngan gintatamay an mga magpintas
ngan mga maglimbong.
℟. Dad-a ako dida han imo pagkamatadong, Ginoo.
3. Kundi magkakalipay an ngatanan nga gintalwas mo;
dayuday makakagkanta hira hin kalipay.
Panalipdi adton mga nahigugma ha imo;
tungod ha imo malipayon gud hira.
℟. Dad-a ako dida han imo pagkamatadong, Ginoo.
EBANGHELYO
Lc 6:6-11
Pagbasa tikang han santos nga Ebanghelyo sumala kan Lucas.
Ha lain nga Adlaw nga Iparahuway, kinadto hi Jesus ha sinagoga ngan nagtutdo. May tawo didto nga patay an tuo nga kamot. Karuyag mangita hin pasisikaran hin pagsumbong kontra kan Jesus in pira nga mga magturutdo han Balaod ngan mga Parisiyo; sanglit gin-ininawan hiya nira kon magtatambal ba hiya ha Adlaw nga Iparahuway. Kundi nahibaroan ni Jesus an ira panhunahuna, ngan nagsiring hiya ha tawo nga patay an kamot, “Buhat ngan pa kadi ha atubangan.” Binuhat an tawo ngan tinukdaw ha iya atubangan. Niyan nagsiring hi Jesus ha ira, “Napakiana ako ha iyo: ano an itinutogot han aton Balaod hin pagbuhat ha Adlaw nga Iparahuway? Pagbulig ba o pagdaot? Pagtalwas ba hin kinabuhi hin tawo o pagkuha ba hito?” Siniplat hi Jesus ha ira ngatanan, ngan kahuman ginsiring niya an tawo, “Unata an imo kamot.” Gin-unat han tawo an iya kamot ngan naupay. Kundi duro gud an ira kapungot, ngan nagsarabot hira kon ano an angay pagbuhaton nira kan Jesus.
An Ebanghelyo han Ginoo.