PAGBASA I
1 Cor 10:14-22
Pagbasa tikang han Syahan nga Surat ni San Pablo ngadto han mga taga Corinto.
Sanglit, mga hinigugma ko, ayaw kamo pagsingba hin mga diyosdiyos. Naghihimangraw ako ha iyo kay kamo may-ada man maupay nga konsensya; paghukmi niyo an akon iginsisiring. An kupa han pag-ampo nga tungod hini aton ginpapasalamatan an Dyos; diri ba kita naangbit han dugo ni Cristo kon nainom kita tikang hini nga kupa? Ngan an tinapay nga aton ginpipinitpinit: diri ba kita naangbit han lawas ni Cristo kon nakaon kita hini nga tinapay? Tungod nga uusa la an tinapay, uusa la nga lawas kita ngatanan bisan kon damo, kay naangbit kita ngatanan han amo ngahaw nga tinapay.
Painoinoha daw an mga Israelita; adton mga nakaon han iginhahalad, nakakaangbit han mga pag-alagad sa Dyos dida ha altar. Ano an buot ko sidngon? Nga an diyosdiyos o an pagkaon nga iginhalad ha altar waray la hinungdan? Diri! Nasiring ako nga an iginhahalad dida hin diri dyosnon nga altar iginhahalad ngadto ha mga yawa, diri ngadto sa Dyos. Ngan diri ko karuyag nga magin kabulig kamo han mga yawa. Diri kamo makakainom tikang han kupa han Ginoo ngan tikang han kupa liwat han mga yawa; diri kamo makakakaon ha lamesa han Ginoo ngan ha lamesa liwat han mga yawa. O karuyag ba naton nga mangabugho an Ginoo? Naghuhunahuna ba kita nga labi hin kagamhanan kita kay ha iya?
An Pulong han Ginoo.
SALMO RESPONSORIO
Sal 116:12-13, 17-18
℟. Ha imo Ginoo maghahalad ako hin kadarayawan.
Ano an akon igbabalos han Ginoo,
han ngatanan niya nga kaupayan ko?
Pagdadad-an ko h'ya hin halad nga bino,
nga pasalamat nga gintalwas n’ya ako.
℟. Ha imo Ginoo maghahalad ako hin kadarayawan.
2. Ighahalad, ighahatag ko ha imo,
halad nga tinubod nga pasalamat ko;
ngan maghahalad ak' han akon pag-ampo,
ngan matatawag han ngaran han Ginoo.
Ha katirok han tanan mo nga katawhan,
ha Templo han Jerusalem nga bungsaran.
℟. Ha imo Ginoo maghahalad ako hin kadarayawan.
EBANGHELYO
Lc 6:43-49
Pagbasa tikang han santos nga Ebanghelyo sumala kan Lucas.
Nagsiring hi Jesus ha iya mga tinun-an, “Diri nahatag hin maraot nga bunga in maupay nga kahoy, o nahatag hin maupay nga bunga in maraot nga kahoy. Kinikilala an tagsa nga kahoy pinaagi han iya mga bunga; diri ka naburo hin mga igos tikang hin mga sapinit, o nagtitirok hin mga ubas tikang hin mga niyutiyo. Nagpapagawas an tawo nga maupay hin mga kaupayan tikang han manggad hin mag-upay nga mga butang han iya kasingkasing; an maraot nga tawo, tikang han iya manggad hin magraot nga mga butang. Kay iginyayakan han baba an nakakapuno han kasingkasing.
“Kay ano nga gintatawag ako niyo, ‘Ginoo, Ginoo,’ ngan diri niyo ginbubuhat an iginsusumat ko ha iyo? An tagsatagsa nga nadaop ha akon, ngan namamati han akon mga pulong, ngan iya gintutuman, ipapakita ko ha iyo kon ano an itatanding ha iya. Sugad hiya hin tawo nga nagbalay: nag-ukab hiya hin halarom, ngan gintungtung ha bato nga patukoran. Binmaha an salog ngan gin-agmakan adto nga balay, kundi waray ini mabay-og, kay madig-on gud an katukod. Kundi an namamati han akon mga pulong ngan diri niya gintutuman, sugad hiya hin tawo nga nagbalay ha tuna, nga waray magbutang hin patukoran; natumba la dayon han pag-agmaki han baha. Hin pagkamakaharadlok hadto nga pagkapukan!”
An Ebanghelyo han Ginoo.