PAGBASA I
1 Cor 9:16-19, 22b-27
Pagbasa tikang han Syahan nga Surat ni San Pablo ngadto han mga taga Corinto.
Waray ako katungod hin pagparayaw tungod la nga nagwawali ako han Maupay nga Sumat. Kay ha tinuod, ginsugo ako hin pagbuhat hini. Ngan kairo ko kon waray ko igwali an Maupay nga Sumat! Kon akon ini ginbuhat ha akon la kalugaringon nga kaburot-on, magpapaabot unta ako hin suhol; kundi diri ini ha akon kaburot-on tungod kay katungdanan ini nga igintapod ha akon han Dyos. Niyan, ano man nga balos an akon kakarawaton? An balos amo ini: nga dida han akon pagwali han Maupay nga Sumat, waray ako magpasuhol, ngan waray ko angkona an akon mga katungod han akon pagkabudlay para han Maupay nga Sumat.
Talwas ako nga tawo, diri oripon hin bisan hin-o; kundi nagpapaoripon ako ha ngatanan basi makakabig ako hin damo nga mga tawo. Ha mga magluya an pagtoo nagin maluya ako sugad ha ira, basi makabig ko hira. Sanglit nakig-usa ako ha ngatanan nga mga tawo ha ngatanan nga paagi, basi matalwas ko in pira ha ira sugad han akon mahimo. Ginbubuhat ko ini ngatanan tungod han Maupay nga Sumat, basi makaangbit ako han mga kaupayan hini.
Sayod man kamo nga dida hin paisan-isan, nadalagan an ngatanan nga naapi, kundi usa la ha ira in nakarawat han primyo. Sanglit paniguro kamo hin pagdalagan basi madaog niyo an primyo. An kada nadalagan nagsusunod hin masigpit nga disiplina basi niya madaog an korona nga may pagkalaya; kundi binubuhat ta ini para hin korona nga waray pagkatapos. Amo ini an hinungdan nga nadalagan ako hin pagidinadaogan; sanglit pareho ako hin boksingero nga dayuday nakakaigo an iya mga suntok. Ginpapadig-on ko an akon lawas pinaagi hin mga suntok ngan ginpupugngan ko ini hin masigpit, basi diri ako igsalikway kahuman ko pagpaapi han iba han paisan-isan.
An Pulong han Ginoo.
SALMO RESPONSORIO
Sal 84:3, 4, 5-6, 12
℟. Kamakaaramdok han imo orokyan,
Ginoo, makagarahum nga Dyos.
1. Duro na gud an akon pag-ikaradto,
nahihidlaw ako han mga ruwang mo.
Mga ruwang hadton Templo han Ginoo
amo'n ginhihingyap han kinabuhi ko.
Hin malipayon gud magkakanta ako,
ngadto hadton Dyos nga buhi hin tutoo!
℟. Kamakaaramdok han imo orokyan,
Ginoo, makagarahum nga Dyos.
2. Bisan katamsihan may-ada urokyan,
mga balinsasayaw nagsasalag man.
Ha may altar piso nira ginmangnoan,
Dyos, Hadi, Ginoo Gamhanan han 'tanan.
℟. Kamakaaramdok han imo orokyan,
Ginoo, makagarahum nga Dyos.
3. Pagkamalipayon, hin pagkapalaran,
adto hira nga im’ templo an urokyan!
Dayuday ikaw nira ginkakantahan,
ha im’ nag-aawit mga padayaw man!
Hin pagkapalaran, pagkamalipayon
han may kusog nga tikang ha im’ naangkon;
an may’da kasindak hin paglinakaton,
ha dalan tikadto ha Bukid Sion!
℟. Kamakaaramdok han imo orokyan,
Ginoo, makagarahum nga Dyos.
4. Ginoo an panalipod, arayopan,
ngan amo an aton hadi nga gamhanan;
an nahatag ha aton hin kaupayan,
hin mga kalooy ngan hin kadungganan.
Waray maupay nga iya pinupugngan
hadton mga magtadong an binuhatan.
℟. Kamakaaramdok han imo orokyan,
Ginoo, makagarahum nga Dyos.
EBANGHELYO
Lc 6:39-42
Pagbasa tikang han santos nga Ebanghelyo sumala kan Lucas.
Iginsumat ni Jesus ha ira ini nga pananglitan: “Diri makakagtugway in buta hin igkasi buta; kon buhaton niya ini, mahuhulog hira nga duha ngadto ha kali. Waray tinun-an nga labaw han iya magturutdo; kundi masusugad han iya magturutdo an tagsa nga tinun-an, kon tapos na an iya pag-aram. “Kay ano nga asay mo kinikita an poling ha mata han imo bugto, kundi diri ka nanginginano han nabalabag ha imo kalugaringon nga mata? Uunanhon nimo pagsiring ha imo bugto, ‘Tugoti daw ako pagkuha han poling ha imo mata,’ nga diri ka ngani nakita han nabalabag ha imo kalugaringon nga mata? Salingkapaw! Kuhaa anay an nabalabag ha imo kalugaringon nga mata, ngan niyan makakakita ka na hin pagkuha han poling ha mata han imo bugto.
An Ebanghelyo han Ginoo.