PAGBASA I

Jer 33:14-16

Pagbasa kinuha han basahan ni Jeremias.

​

Nagsering an Ginoo, “Maabot an panahon nga pagtutumanon ko an akon iginsaad ha mga tawo han Israel ug Juda. Hiton nga panahon pagpipilion ko nga hadi in usa nga matadong nga tulin ni David. Magbubuhat ini nga hadi han matadong ngan husto ha bug-os nga tuna. Matatalwas ngan mag-uokoy hin waray kahadlok han Juda ug Jesrusalem. Pagtatawgon an syudad nga ‘Aton Katalwasan An Ginoo.’”

​

An pulong han Ginoo.

SALMO RESPONSORIO

Sal 25:4-5, 8-9, 10, 14

Ginoo, ibinabayaw ko ha imo an akon kalag.

1. GINOO, tutdoi ako han imo mga paagi, ipahayag hira ha akon.

Tutdoi ako pagkinabuhi sumala han imo kamatuoran,

Nasarig ako ha imo ha bug-os nga adlaw,

kay ikaw man an akon Magtaralwas.

Ginoo, ibinabayaw ko ha imo an akon kalag.

2. Matadong ngan maupay an GINOO;

nagtututdo hiya han dalan

nga angay pag-agian han mga makasasala.

Nagmamando hiya han mapinaubsanon

ha matadong nga paagi ngan nagtututdo ha ira han iya kaburut-on.

Ginoo, ibinabayaw ko ha imo an akon kalag.

3. Nagmamando hiya hin mahigugmaon

ngan matinumanon han ngatanan

nga nagsusugot han iya ginkauyonan ngan han iya mga sugo.

Ginoo, ibinabayaw ko ha imo an akon kalag.

PAGBASA II

1 Tes 3: 12-14,2

Pagbasa nga kinuha han syahan nga surat ni San Pablo han mga taga-Tesalonica.

​

Patuboon unta han Ginoo an iyo paghigugmaay ha iyo ngahaw ngan ha ngatanan nga mga tawo, ngan masugad unta iton kadako han amon paghigugma ha iyo. Dida hini nga paagi, paririg-onon niya an iyo kasingkasing, ngan mahihingpit ngan mababaraan kamo ha atubangan ha aton Dyos ngan Amay, kon umabot  na an aton Ginoo nga Jesus upod an ngatanan nga mga sakop niya.

Ha kataposan, kabugtoan, mahibaroan niyo tikang ha amon an kinabuhi nga nakakalipay han Dyos. Matuod, amo man ini an iyo kinabuhi tikang pa hadto. Ngan yana, ha ngaran han Ginoo nga Jesus, nangangamuyo ngan nag-aaghat kami ha iyo nga mabuhi kamo hin labi pa nga nakakalipay han Dyos.

​

An pulong han Ginoo.

PAGBASA III

Lc 21: 25-28, 34-36

Pagbasa tikang han Santos nga Ebanghelyo sumala kan San Lucas.

​

Magkakamay-ada mga orosahon nga tigaman han adlaw, han bulan, ngan han mga bitoon. Magtuturaw in bug-os nga mga nasod ha tuna, ha kahadlok han dinaguhob han kadagatan ngan han mga humatol han balod. Manhihiraptay hin kahadlok an mga tawo samtang naghuhulat hira kon ano an mapaabot han bug-os nga tuna; kay masimang ha ira mga agianan an mga kagamhanan ha kahitas-an. Katapos, mapakita na an Anak han Tawo nga maabot dida hin dampog, may gahom ug himaya. Kon makakita na kamo nga mahinabo ini nga  mga butang, tindog ngan hangad, kay hirani na an iyo katalwasan.

​

Pagbantay kamo! Ayaw itugot nga magpatakas kamo hin pagkinaon ngan pag-ininom, ngan magkinabaraka kamo hini nga kinabuhi, kay bangin kamo hikalitan kon umabot ito nga adlaw. Kay maabot ini sugad hin bitik ha ngatanan nga mga tawo ha bug-os nga tuna. Pagbantay ngan dayuday pag-ampo kamo nga maangkon niyo an kusog hin pag-ilob hini ngatanan nga mga butang nga mahinanabo, ngan pagtindog ha atubangan han Anak han Tawo.

​

An Ebanghelyo han Ginoo.