PAGBASA I

Bar 5:1-9

Pagbasa han basahan ni Baruc.

Jerusalem, paghukas han imo bado han kamabiduon ug kamasurob-on. Isul-ot an kamaanyag han himaya han Dios ha kagayunan. Ig-alikos in kurugmos han katadungan tikang  sa Dios. Ibutang ha imo ulo an maranggat nga bato han himaya ha waray katapusan nga ngaran, kay ipapakita han Dios ha bug-os nga kalibutan  an imo kaanyag  tungod kay an ngaran nga ihahatag ha imo han Dios ha  kadayunan amo ini: Kalinaw pinaagi han katadungan, ngan himaya pinaagi han pagsingba sa Dios.

​

Buhat, Jerusalem. Tukdaw ha pungkay han bukid ug siplat ngadto ha  sinirangan ngan kitaa an imo mga anak nga nagtitirok tikang ha katungdan ug  sinirangan, ha ubos han pag-una han Baraan nga Ginoo samtang nagrarayhak hira  tungod kay  nahinunumdum ha ira an Dios.

Binayaan ka nira nga nagbabaktas ha pagtugway han ira mga kaaway. Kundi  ibabalik hira han Dios ngada ha imo, nga pinapas-an nga mahimyaon sugad hin gin-uusong nga hadi dida ha iya lingkuranan. An Dios nagsugo nga pahibub-on an tagsa  nga bukid, an mga luog-luong patagon, basi mapatag an tuna ngan an Israel maglakat hin waray kahadlok dida han himaya han Dios. An kagurangan ug an tagsa nga kahoy nga nahatag hin mahamot nga alimyon in maglalambaong han Israel  ha pagsugo la han Dios. Malipayon nga tutugwayan han Dios an Israel pinaagi  han kapawa han iya himaya nga dinuyugan han iya kalooy ug pagkamatadong.

​

An pulong han Ginoo.

​

SALMO RESPONSORIO

Sal 126:1-2,2-3,4-5,6

Nagbubuhat ha aton an Ginoo hin dagko nga mga butang;

hi  kita naputos hin dako nga kalipay.

1. Ha ibalik han Ginoo an mga kaupayan ha Sion,

an hunahuna namon daw nag-iinop la kami.

Napuno hin mga pagtawa an amon mga baba; 

awit hin kalipay tinmikang ha am’ dila.

Nagbubuhat ha aton an Ginoo hin dagko nga mga butang;

hi  kita naputos hin dako nga kalipay.

2. Niyan nagsiring pa an mga kanasuran,

“Gintagan hira han Ginoo hin damo nga butang.”

Gintagan kami han Ginoo hin damo nga butang;

Duro gud an amon inabat, duro nga kalipayan!

Nagbubuhat ha aton an Ginoo hin dagko nga mga butang;

hi  kita naputos hin dako nga kalipay.

3. An mga kalungganayan, Ginoo, ibalik gad ha amon,

daw sugad hin mga salog ha mamara nga Negueb.

An nagtatanum hin luha, mag-aani hin kalipay.

Nagbubuhat ha aton an Ginoo hin dagko nga mga butang;

hi  kita naputos hin dako nga kalipay.

4. Adton naglalakaton nga inupdan hin pagbakho

nga an  iya gindara in mga binhi ha sako,

hiya in mabalik nga naguliat hin kalipay,

hiya in magagayngan hin mga butok hin uhay.

Nagbubuhat ha aton an Ginoo hin dagko nga mga butang;

hi  kita naputos hin dako nga kalipay.

PAGBASA II

Fil 1:4-6,8-11

Pagbasa han surat ni San Pablo ngadto han mga taga Filipo.

Ha kada pag-aampo ko para ha iyo iginlalakip ko in malipayon nga pag-ampo, tungod kay nakikig-urusa kamo ha amon dida han ebanghelyo, tikang  pa han takna han pagkarawat niyo hini tubtob yana. Tungod  hini nga hinungdan nasarig ako nga hinaut pa unta an nagtikang pagbuhat hin maupay dida ha iyo amon an magpadayon paghuman hini tubtob nga umabot na an Adlaw ni Cristo Jesus. Kay saksi ko an Dios nga an akon kamingaw ha iyo  ngatanan sugad hanpaghingyap ha iyo ni Cristo Jesus. Ngan amo ini an akon pag-ampo: Nga an iyo gugma dumugang pa gud tumubo dida han hibaruan ngan ha bisan ano nga panabutan, ha pagkilala kon ano nga butang an may hinungdan basi mahimo kamo nga mga waray dum-it ngan mga waray ikasasayop kon umabot na an Adlaw ni Cristo. Mapun-an unta kamo han pagkamatadong nga ihahatag ni JesuCristo para han paghimaya nga pagdayaw han Dios.

An pulong han Ginoo.

​

PAGBASA III

Lc 3:1-6

+ Pagbasa tikang han Ebanghelyo nga sinurat ni San Lucas.

​

Han ika-kinse na katuig an pagkahadi ni Emperador Tiberio, han panahon nga hi Poncio Pilato an gubernador han Judea, ngan hi Herodes an tetrearka han Galilea, ngan hi Felipe nga iya bugto an tetrearka han katunaan han Iturea ngan  Tranconities, ngan  hi Lisias an tetearka ha Abelen, han panahon nga an labaw nga pagkapadi nakada kanda Anas ug Caipas, dinangat didto ha kamingawan an pulong ha Dios ngada kan Juan nga anak ni Sacarias. Ginlibot niya an bug-os nga katunaan han Jordan, pagpasangyaw han bunyag hiunong han pagbasol ngan pagpasaylo han sala, ka sumala han nahisurat dida han basahan han mga pulong ni Isaiyas nga manaragna:

“Usa nga tingog na nagguliat ha kamingawan:

‘Andama an dalan han Ginoo,

tadunga an iya mga aagian.

Pagpupun-an an kada kahibub-an

ngan papanason an kada bukid

ngan kabungtoran.

Tatadongon an baliko nga dalan

ngan hahamison na luong-luong nga mga aragian,

ngan an bug-os ngakatawhan makita han pagtalwas han Dios.’”

An Ebanghelyo han Ginoo.