PAGBASA I

Sir 48: 1-4, 9-11

Pagbasa tikang han Basahan ni lsaias nga manaragna.

​

Pinakita liwat an maisog nga manaragna nga hi Elias, kanay mga pulong naglalaga sugad hin sulo. Gindad-an niya hin gutom an mga tawo ngan damo ha ira an nagkamatay tungod han iya tinguha nga magpadayon ini nga gutom. Ha pagyakan niya ha ngaran han Ginoo, ginpugngan niya an uran ngan hin tulo kahigayon ginpauran niya hin kalayo. Elias, makaaramdok an imo mga milagro! Waray na gud iba nga makakapanhambog hin sugad nga mga binuhatan! Gindara ka ngadto ha langit dida hin kalayo nga buhawe, usa nga karuwahe nga ginsasaog hin nagkakalayo nga mga kabayo. Nasiring an kasuratan nga andam ka hin pagpakita dida han igintalaan nga panahon, basi hugpoyon mo an kasina han Dyos ha diri pa ini maulyab ha kapungot; nga imo pagtitirokon liwat an mga amay ngan mga anak, ngan ibabalik mo an mga tribo han Israel. Palaran adton mga buhi pa hin pagkita ha imo kon makanhi ka, sugad man adton mga nagkamatay na ha paghigugma, kay mabubuhi man liwat kami.

​

An Pulong han Ginoo.

SALMO RESPONSORIO

Sal 80: 2ac & 3b, 15-16, 18-9

Pakadaa kami ha imo, Ginoo:

Pakitaa kami han imo bayhon ngan matatalwas kami.

1. Pamatii kami, O Magmarangno han Israel;

O ikaw nga nalingkod han imo trono dida han kerubim,

Ipakita ha amon an imo kusog.

Pakadaa kami ha imo, Ginoo:

Pakitaa kami han imo bayhon ngan matatalwas kami.

2. Lingia kami, O Dyos nga Labi Kamakagarahum!

Tamdi kami tikang ha langit;

kadi ngan panimangnoa an imo balagon hin ubas!

Kadi ngan panimangnoa

ini nga balagon nga ikaw ngahaw nagtanom

ini nga luyat nga balagon

nga imo ginpakusog hin duro.

Pakadaa kami ha imo, Ginoo:

Pakitaa kami han imo bayhon ngan matatalwas kami.

3. Panalipdi ngan bantayi an katawhan nga imo ginpili,

an nasod nga imo ginpakusog hin duro!

Diri na gud kami matalikod ha imo;

buhia kami, ngan

Pakadaa kami ha imo, Ginoo:

Pakitaa kami han imo bayhon ngan matatalwas kami.

​

PAGBASA II

Mt 17: 10-13

+Pagbasa tikang han Ebanghelyo nga sinurat ni San Mateo.

​

Han paglugsong nira han bukid, nagpakiana kan Jesus an mga tinun- an, “Kay ano nga nasiring an mga magturutdo han Balaod nga makanhi anay hi Elias?” Binaton hi Jesus, “Makanhi man ngani anay hi Elias ngan aandamon niya an ngatanan. Kundi nasiring ako ha iyo, kinanhi na hi Elias, ngan waray kumilala an mga tawo ha iya, kundi ginbuhat nira ha iya an ira karuyag. Ha amo man nga paagi, pagpapakurian man liwat nira an Anak han Tawo.” Niyan nakasabot an mga tinun-an nga naghimangraw hiya ha ira mahitungod kan Juan nga Parabunyag.

​

An Maupay nga Sumat han aton katalwasan.