PAGBASA I

Awit 2:8-44

Pagbasa tikang han Basahan han Awit han mga Awit.

​

Nabati ako han tingog han akon higugmaon. Naabot hiya ngà nagdadalagan ha kabukiran, ngan ha kapungtoran ngadi ha akon. Sugad hin malaksi nga bugsok an akon hinigugma, sugad hin nati nga lalaki nga bugsok. Natindog hiya ha ligid han pader. Nahiling hiya ha bintana, ngan nag-iinaw hiya dida han mga rehas. Nakikighimangraw ha akon an akon higugmaon.

​

 Sanglit kadi na, akon hinigugma; akon minahal, bunyog ha akon. Linabay na an kathagkot; hinunong na an pag-inuran; namumukalkag ha kaumhan an mga bukad. Amo ini an panahon hin pagkanta, hinbabatian ha kaumhan an honi han mga sarapati. Nagtikang na an pagkahinog han mga igos; nangangalimyon an namumukad nga mga ubas. Sanglit kadi na, akon hinigugma, akon minahal, bunyog ha akon.

Sugad ka hin sarapati nga natago ha mga lungag hin bato. Pakitaa ako han imo mahusay nga bayhon ngan pabati-a ako han imo manamit nga tingog.

​

An Pulong han Ginoo.

​

SALMO RESPONSORIO

Sal 33:2-3, 11-12,20-21

​

Guliat, mga baraan, hin kalipay han Ginoo;

pag-awit ha iya hin bag-o nga  kanta.

1. An Ginoo aton pagpasalamatan,

nga tokar hin mga arpa dinuyogan.

Hiya liwat angay naton pagkantahan

upod in mga turunggon nga dinulsan.

Hiya angay niyo nga pagkantahan,

bag-o nga mga kanta nga sinabayan;

sanglit an arpa upaya an kaangay,

ug igoliat an iyo mga kalipay.

​

Guliat, mga baraan, hin kalipay han Ginoo;

pag-awit ha iya hin bag-o nga  kanta.

2. Padayon an iya nahunahunaan,

an iya panuyo waray kataposan.

Palaran an nasod nga Dyos an Ginoo,

sugad man an pinili nga mga tawo.

Guliat, mga baraan, hin kalipay han Ginoo;

pag-awit ha iya hin bag-o nga  kanta.

3. An Ginoo an amon ginlalaoman,

amon panalipod ngan amon ka tabang.

Hiya an surok han amon kalipayan,

natapod kami han iya mahal nga ngaran.

Guliat, mga baraan, hin kalipay han Ginoo;

pag-awit ha iya hin bag-o nga  kanta.

​

PAGBASA II

Lc. 1.39-45

+ Pagbasa tikang han Ebanghelyo nga sinurat ni San Lucas.

​

Waray pag-iha, nag-andam hi Maria ngan nagdagmit hin pagkadto ha usa nga bungto ha sagkahon nga tuna han Judea. Kinadto hiya ha balay ni Zacarias ngan naghatag hin katalahoran kan Isabel. Han pakabati la ni Isabel han mga pulong ni Maria, nagkiwa an bata ha sulod han iya tiyan. Napuno hi Isabel han Espiritu Santo, ngan nagyakan hin dako nga tingog “Ikaw an labi kabaraan han ngatanan nga kababayen-an, ngan baraan an bata nga gindadara nimo ha imo tiyan! Kay ano nga itinugot man ini nga makanhi hin pagduaw ha akon an iroy han akon Ginoo? Kay han pakabati ko han imo nga pulong, linukso hin kalipay an bata ha akon tiyan. Hin kabaraan niya nga natoo nga matutuman an ginpamulong ha iya han Ginoo!”

​

An Ebanghelyo han Ginoo.

​