PAGBASA I

Miq 5: 2-4

Pagbasa tikang han Basahan ni Miqueas nga manaragna.

Nasiring an GINOO, Betlehem Efrata, usa ka han gigugutiayi nga mga bungto han Juda, kundi tikang ha imo paguguwaon ko in punoan para han Israel, kanay mga ginikanan natikang pa han kadaan nga mga katuigan. Sanglit itutubyan han GINOO an iya mga tawo ngadto han ira mga kaaway tubtob han pag-anak han babaye nga tipag-aranak han iya anak nga lalake. Niyan magkakausa na liwat an ira kalugaringon nga mga tawo ngan an ira igkasi taga nasod nga aadto ha pagkabihag. Kon umabot hiya, paghahadian niya an iya mga tawo pinaagi han kusog nga natikang han GINO0 ngan ngan pinaagi han pagkaharangdon han GINOO nga Dyos. Mag-uokoy nga murayaw an iya mga tawo kay an mga tawo ha bug-os nga kalibutan makilala han iya pagkagamhanan.

An Pulong han Ginoo.

​

SALMO RESPONOSRIO

Sal 80:2-3,15-16,18-19

Pakadaa ha imo, Ginoo kami;

kumita han imo bayhon ngan matatalwas kami.

1. Pamati gad man, O Magmarangno han Israel.

Iginpadayag nimo tikang han imo trono

an imo kalugaringon ha mga kerubin.

Bantara an imo gahum, kadi kami talwasa.

Pakadaa ha imo, Ginoo kami;

kumita han imo bayhon ngan matatalwas kami.

2. Atubang na liwat, Dyos han kagam¬hanan;

tamdi ug kitaa kami tikang ha kalangitan.

Panginanoa man gad ini nga imo balagon;

tanum ini nga saha han kamot mo nga tuo.

Pakadaa ha imo, Ginoo kami;

kumita han imo bayhon ngan matatalwas kami.

3. Tabangan mo unta an tawo ha imo tuo,

kay hiya an hadto anay ginpakusog nimo.

Niyan diri na kami mapahirayo ha imo; buhia kami;

masangpit kami han nga¬ran mo.

Pakadaa ha imo, Ginoo kami;

kumita han imo bayhon ngan matatalwas kami.

​

​

PAGBASA II

Heb 10: 5-10

Pagbasa tikang han Surat ngadto han mga Hebreo.

​

Tungod hini, han tikanhi na hi Cristo ha kalibutan, nagsiring hiya sa Dyos, Diri ka buot hin mga tinubod nga unong ngan mga halad, kundi nag-andam ka hin lawas  para ha akon. Diri ka nalilipay hin mga mananap nga ginsusunog ha bawbaw han halaran, o hin mga halad pagkuha hin mga sala. Niyan nagsiring ako, “Aadi ako. O Dyos, pagtuman han buot mo ipabuhat ha akon, sumala han nahisurat hiunong ha akon, dida han basahan han Balaod.” Syahan nagsiring hiya, “Diri ka naruruyag o nalilipay hin mga tinubod nga unong ngan mga halad, o hin mga mananap nga tinubod ha halaran, ngan han mga halad pagkuha hin mga sala.” Ginsiring ini niya bisan kon iginhahalad ini nga mga tinubod nga unong sumala han Balaod. Ngan nagsiring hiya, “Aadi ako, O Dyos, pagtuman han karuyag mo ipabuhat ha akon.” Sanglit iginsalikway han Dyos an ngatanan nga daan nga mga tinubod nga halad, ngan ginliwanan niya ini han paghalad ni Cristo. Tungod nga gintuman ni Cristo an karuyag han Dyos ipabuhat ha iya, nalinisan kita ngatanan han sala pinaagi han paghalad niya han iya kalugaringon nga lawas makausa ngan para han ngatanan.

An Pulong han Ginoo.

​

​

PAGBASA III

Lc 1: 39-45

Pagbasa tikang han Ebanghelyo nga sinurat ni San Lucas.

​

Waray pag-iha, nag-andam hi Maria ngan nagdagmit hin pagkadto ha usa nga bungto ha sagkahon nga tuna han Judea. Kinadto hiya ha balay ni Zacarias ngan naghatag hin katalahoran kan Isabel. Han pakabati la ni Isabel han mga pulong ni Maria, nagkiwa an bata ha sulod han iya tiyan. Napuno hi Isabel han Espiritu Santo, ngan nagyakan hin dako nga tingog, “Ikaw an labi kabaraan han ngatanan nga kababayen-an, ngan baraan an bata nga gindadara nimo ha imo tiyan! Kay ano nga itinugot man ini nga makanhi hin pagduaw ha akon an iroy han akon Ginoo? Kay han pakabati ko han imo nga pulong, linukso hin kalipay an bata ha akon tiyan. Hin kabaraan niya nga natoo nga matutuman an ginpamulong ha iya han Ginoo!”

​

An Maupay nga Sumat han aton katalwasan.