PAGBASA I

Mal 3:1-4,23-24

Pagbasa tikang han Basahan ni Malaquias nga manaragna.

​

Nagsiring an Ginoo nga Labi Kamakagarahum, “Susugoon ko an akon magsarangyaw hin pag-andam han dalan para ha akon. Niyan maabot dayon ngadto han iya Templo an Ginoo nga iyo ginpipinamiling. Maabot an magsarangyaw nga iyo karuyag hikit-an ngan magsasangyaw hiya han akon ginsaaran.” Kundi hin-o man an makakailob han adlaw nga ikakanhi niya? Hin-o an mabubuhi kon magpakita na hiya? Sugad hiya hin mapintas nga sabon, sugad hin kalayo nga nagpupurog hin metal. Maabot hiya hin paghukom sugad hin tawo nga nagpupurog ngan naghihinlo hin salapi. Sugad hin usa nga panday hin metal nga nagpupurog hin salapi ug bulawan, paglilinisan man han magsarangyaw han Ginoo an kapadian basi pagdad-on nira ngadto han Ginoo an angay nga mnga halad. Niyan makakapahimuot na han Ginoo an mga halad nga gindadara ha iya han mga tawo han Juda ug Jerusalem sugad han hadto anay.

​

“Kundi san-o umabot an makarit ngan makalilisang nga adlaw han Ginoo, susugoon ko ngada ha iyo hi Elias an manaragna. Pag-uusaon na liwat niya an mga amay ngan mga  anak; kay kon diri, makanhi ako ngan bubungkagon ko an iyo nasod.”

​

An Pulong han Ginoo.

​

SALMO RESPONSORIO

Sal. 25:4-5ab,8-9,10 &14

Hangad ngan kita; an imo katalwasan harani na.

1. Ginoo, tutdoi ako han imo mga paagi

ipahayag hira ha akon.

Tutdoi ako pagkinabuhi

sumala han imo kamatuoran,

Nasarig ako ha imo ha bug-os nga adlaw

kay ikaw man an akon Magtaralwas.

Hangad ngan kita; an imo katalwasan harani na.

2. Matadong ngan maupay an Ginoo;

nagtututdo hiya han dalan

nga angay pag-agian han mga makasasala.

Nagmamando hiya han mapinaubsanon

ha matadong nga paagi ngan nagtututdo ha ira han iya kaburut-on.

Hangad ngan kita; an imo katalwasan harani na.

3. Nagmamando hiya hin mahigugmaon

ngan matinumanon han ngatanan

nga nagsusugot han iya ginkauyonan

ngan han iya mga sugo.

Sangkay an Ginoo hadton mga nasugot ha iya,

ngan nagtututdo hiya ha ira han iya ginkasabotan.  

Hangad ngan kita; an imo katalwasan harani na.

​

PAGBASA II

Lc. 1:57-66

+ Pagbasa tikang han Ebanghelyo nga sinurat ni San Lucas.

​

Inabot an panahon han pag-anak ni Isabel, ngan nag-anak hiya hin lalake. Nakabati an iya mga anyaw ngan kauropdan han dako nga kalooy han Ginoo ha iya, ngan dinuyog hira ngatanan ha iya hin pagkalipay. Han walo na kaadlaw an bata, kinadto hira basi buhaton nira an seremonyas hin pagtori ha iya. Ginngangaranan na unta nira nga Zacarias, an ngaran han amay han bata. Kundi nagsiring an iroy niya, “Diri! Juan an igngangaran ha iya.” Nagsiring hira ha iya, “Kundi waray man niyo uropod nga may sugad hini nga ngaran!” Niyan ginsenyasan nira hi Zacarias kon ano an iya karuyag igngaran han bata. Nag-aro hi Zacarias hin susuratan, ngan nagsurat, “Juan an iya ngaran.” Duro gud an paghipausa nira ngatanan. Hito manta nga takna nakayakan na liwat hi Zacarias ngan nagtikang hiya hin pagdayaw han Dyos. Kinulba gud an ngatanan nga mga amyaw, ngan nabantog ha bug-os nga katunaan han Judea an sumat mahitungod hini nga hinabo. An ngatanan nga nagpakabati namalandong mahitungod hini ngan nagpakiana hira, “Ano daw la an aabutan hini nga bata?” Dayag gud nga nakada ha iya an gahom han Ginoo.

​

An Ebanghelyo han Ginoo.